2 Abatuki 3
3
Ohulwaana akatikaati wa Yisiraeli neende Moabbu
1Mu mwaaka kw'ehumi neende kitaanu-na-kidatu, eky'obutuki bwa Yehosafati, omutuki wa Yuda, Yehoramu omwaana wa Ahabbu yeehaswa ohuba omutuki wa Yisiraeli mu Samaria, mani yaatuka ohumala emyaaka ehumi neende kibiri. 2Yahola ebiindu bibi mu moni w'Omwaami, nae haba siyaliho omubi koti laatang'ene neende Yesebbeeli, ng'ina; olwohuba yafunaka-funaka esiiro cha Bbaali chi laatang'ene yali niyombaahe. 3Kata katyo, Yehoramu yoomiirira hu syonoono sya Yerobboamu, omwaana wa Nebbati, mani yaakera Yisaraeli syonoona, haandi syaahayira sa mu bwonooni.
4Nae bulaanu, Mesa, omutuki wa Moabbu yali omutuki w'amakoondi; mani buli mwaaka yatuungaanga omutuki wa Yisiraeli amakoondi madoto elifu emia ndala (100,000) neende obwooya bw'amakoondi mamiiku akoola elifu emia ndala (100,000). 5Nae Ahabbu, omutuki wa Yisiraeli niyafwa, Mesa, omutuki wa Moabbu yajeemera omutuki wa Yisiraeli. 6Omutuki Yehoramu yatula Samaria yahung'aanisira eye lyae mu Yisiraeli mwoosi. 7Yatumira Yehosafati, omutuki wa Yuda emboosi n'aboola ati, “Omutuki wa Moabbu yaanjemeere; ochia ohwiicha alala naange humulwaanie?” Mani Yehosafati yaakobolamo ati, “Njia ohwiicha alala nawe; olwohuba ese naawe huli esiindu silala, abaandu baange nabao nibo, haandi efaraasi chaange nechao nichio.” 8Yamuteeba ati, “Hunaabitire hu ngira siina nihumuseeta?” Yehoramu yakobolamo ati, “Hu ngira yomu sichiimi sy'Edomu.”
9Omutuki wa Yisiraeli yachia neende omutuki wa Yuda alala neende omutuki wa Edomu. Nae nibamala endaalo chitaanu-na-chibiri nibahuumba nibebodoohania, amaachi kabawaaho; mani ab'amaye neende ebisolo bi bali nabyo byaahaywa esyohung'wa. 10Mani omutuki wa Yisiraeli yahuumula ati, “Wuuwi! Omwaami abuusire alala abatuki badatu bano, ohubadiisa mu mahono ka Moabbu.” 11Mani Yehosafati n'ateeba ati, “Ano abulao hoo omunabbi w'Omwaami yi hunyala ohubitiraho hweteeba hu Omwaami?” Mani mulala hu bahalaabani b'omutuki wa Yisiraeli n'akobolamo ati, “Elisa, omwaana wa Safati ali ano, oyo owali omuhalaabani wa Elija.” 12Yehosafati yaboola ati, “Oyo ali neende Emboosi y'Omwaami.” Mani omutuki wa Yisiraeli neende Yehosafati alala neende omutuki wa Moabbu nibachia eyiri Elisa.
13Elisa yabateeba ati, “Ndi neende endagaano siina naang'we? Bakuuka eyiri abanabbi ba balaata yeeng'we neende aba bang'ineeng'we mani mubeteebeho.” Nae omutuki wa Yisiraeli yamukobolamo ati, “Haba”, Omwaami niye olaangire abatuki badatu bano ohubata mu mahono ka Moabbu. 14Nae Elisa yakobolamo n'aboola ati, “Mubwadyeeri bweene, Omwaami w'amaye haandi omulamu, oyo yi halaabanira, mba niteesa oluyaali mu Yehosafati, omutuki wa Yuda, sindahahudeebereho, oba ndaahubonaho. 15Nae bulaanu, ndeetereho omuhubbi w'obuhana.” Mani omuhubbi w'obuhana niyahubba, amaani k'Omwaami keeha hu Elisa. 16Mani yaaboola ati, “Omwaami aboola ati, ‘Njia ohuhola ehooho lyoomu lino liichulemo esulo ch'amaachi.’ 17Olwohuba Omwaami aboola ati, Haba simuchia ohubonaho omuyaka oba efula, nae ehooho elyo lichia ohwiichulamo amaachi, mani munyale ohung'wa, eng'we, neende eng'oombe cheeng'we neende ebyaayo byeeng'we.” 18Mani sino siindu syaangu muno mu moni w'Omwaami; haandi achia ohudiisa Abamoabbu mu mahono keeng'we, 19mani muchia ohuwaamba ebiko byasitwaho olukaka byoosi. Muchia ohutema emisaala kyaabwe ky'ebyaamo kyoosi, haandi mwiikale esulo chaabwe choosi, mani musihirise endalo chaabwe ndai nimuchiichusamo amakina. 20Nae nibwahya echuli, mu biha by'ohuyaaniramo ebiyaanwa, amaachi kachaaka ohuhulukusa nikatulira olwaande lw'Edomu, ohwoola lu syaalo syoosi syeechulamo amaachi.
21Nae Abamoabbu nibawulira bati abatuki badatu bali nibeechere ohubalwaania, abaandu boosi abali nibanyala ohukiinga ebilwaaniso, ohuchaakira elalira hu muyere ohiramo ohwoola hu muhuluundu ohiramo, bebuusa alala baachia beema hu lwaaho. 22Nae nibwahya echuli mu mabwiibwi, esulwe yahosa hu maachi, mani Abamoabbu baabona amaachi kali engereha nikaahaanye nikafwaana koti amabaanga. 23Mani nibaboola bati, “Mubwadyeeri bweene, abatuki bahuyaane, mani beetana. Mani lehe huchie huyaaye ekaambi yaabwe.” 24Nae niboola hu kaambi y'Abaisiraeli, Abaisiraeli basiingira baaseeta Abamoabbu babayiingira; baboongaho manu baabeeta. 25Abaisiraeli basihirisa ebiko byaabwe, mani buli muundu yaasukuna amakina mu ndalo chaabwe ohwoola lu cheechuliramo amakina. Beekala buli sulo y'amaachi, haandi baatema buli musaala mulai. Amakina kong'eene niko akadoong'a mu Kirihareseeti, mani ab'esimulo nibasyebodoohania nibasiwaamba. 26Nae omutuki wa Moabbu niyabona ati bali ohumuyiingira, yabukula abasaacha emia chitaanu-na-chibiri (700) abalwaanira engaanga, babalwaanie ohwoola lu boolera hu mutuki w'Edomu; nae haba sibanyala daawe. 27Yeemao bulaanu yaabukula omwaana wae muhuluundu, owali owohumukobola mu makulu k'obutuki, yaamuyaanayo koti esiyaanwa sisaambe hu sida sy'esiko esyo. Abaisiraeli banyoolera muno; mani baakamira ao ohulwaana, baakobolayo mu syaalo syaabwe syeene.
©Bible Society of Kenya, 2019
©Bible Society of Uganda, 2019