2 Ebyomubiha 7
7
Ohuyaanwayo hw'Enyuumba ya Nasaae
(1 Abat 8:62-66)
1 #
Lef 9:23-24. Bulaanu Omutuki Solomooni niyamaliirisa sa ati ohusaba hwae, omuliro kweeha aasi nikutula Muukulu nikusaamba nikumala ebiyaanwa byali nibiyaanirwe hu alutaari, mani obulafu bumesa-mesana bw'ohubaao hw'Omwaami bweechula mu Nyuumba ya Nasaae eyo. 2Koti lu Nyuumba ya Nasaae yali niyichuulemo obulafu bumesa-mesana obwo, abalaamisi haba sibanyala ohuyiingiramo daawe. 3#1 Biha 16:34; 2 Biha 5:13; Esir 3:11; Sab 100:5; 106:1; 107:1; 118:1; 136:1; Yer 33:11.Nae abaandu ba Yisiraeli nibabonaho sa omuliro nikukwa nikutula Muukulu mani obulafu nibwiichula mu Nyuumba ya Nasaae eyo, bakwa aasi mafumaame, obweeni bwaabwe nibutingaalire hu buloba hu bweeru, nibeenamira Nasaae, haandi nibamufumia hulw'obulai bwae haandi neende obuheeri bwae butaakama. 4Bulaanu Solomooni alala neende abaandu boosi bayaanayo ebiyaanwa byaabwe eyiri Omwaami. 5Solomooni yayaanayo eng'oombe elifu amahumi kabiri neende chibiri (22,000), neende amakoondi elifu emia ndala neende amahumi kabiri (120,000) ohuba koti ebiyaanwa by'obusaangirani. 6Abalaamisi bano beemaanga mu bweyaango bwalichiingi obwaabwe, nae Abaleefi beemaanga nibabatingaalire, nibafumia Omwaami neende ebihubba bi Mutuki Daudi yali niyakula, mani nibeemba olweembo lwa Nasaae luboola luti, “Obuheeri Bwae Bw'endaalo choosi!” koti lu bali nibehaaswe neende Daudi mweene oyo. Abalaamisi boobba eturumbete nae abaandu boosi nibasiingira nibeema sa.
7Solomooni yalabya esituundu sy'akatikaati w'olwaanyi, abuundu ali mu moni w'Enyuumba ya Nasaae, mani nayaanirao ebiyaanwa bisaambwa byoosi, ebiyaanwa by'emere, haandi neende amasinya kali nikatula mu biyaanwa by'ohusaasania. Yahola atyo, olwohuba alutaari y'omugasa yino, yi yali niyahola yali ediidi muno ohuyeraho ebiyaanwa bino byoosi.
8Solomooni alala neende abaandu boosi ba Yisiraeli bahusa Esidyaalo sy'Ebikaali ohumala endaalo chitaanu-na-chibiri choosi. Yaliwo esidiiyiha esihoongo muno esy'abaandu ohutula eyale koti Hamati Paasi esiri emukulu bweene, haandi neende hu lwaaho lwa Misiri oluli emwaalo bweene. 9Bali nibamalire endaalo chitaanu-na-chibiri choosi mu huyaanwayo alutaari, haandi endaalo chiindi chitaanu-na-chibiri ech'esidyaalo esyo. Hu ludaalo lwamaliirihayo baba neende ohuhusa hwiikalao, 10mani hu ludaalo luloondaho, olwali oludaalo lw'amahumi kabiri-na-chidatu ech'omwoosi kwa hataanu-na-habiri, Solomooni yaseebula abaandu baakobola engo waabwe. Bali abasangaafu muno hulw'ehabi choosi chi Omwaami yali nabereese Yisiraeli abaandu bae, Daudi neende Solomooni.
Nasaae abonehera Solomooni ehabi liindi
(1 Abat 9:1-9)
11Luunyuma lwa Solomooni ohumala ohwoombaha Enyuumba ya Nasaae eyo, haandi neende edooho lyae, n'amalire ohwooseresa bulai bweene endekeha chae chali hu byeene bino, 12Omwaami haandi yamubonehera esiro. Yamuboolera ati, “Ese mbuliire ohulaama hwao, mani ndi ohufukiirira ohubukula Enyuumba ya Nasaae yino ohuba eyaange, haandi abuundu yi biyaanwa bichia ohuumbereserwaanga. 13Buli lu ndakairaanga efula ohukwa, kata sa ohutumaanga esike ohuchia ohuliira elalira ebilime, kata nindatumaanga oluumbe lubi eyiri abaandu baange, 14nibananaanga mani beeyolobya bakaluuhana batula hu syonoono si baba nibali bahola, ese njia ohubawuliraanga ni ndi muukulu, ndehera ebyonoono byaabwe, haandi mala hola esyaalo syaabwe sihulaahulana ehabi liindi. 15Ese njia ohuliindaanga Enyuumba ya Nasaae yino, haandi mbecheenge omweetekefu esiha syoosi ohuwuliraanga ohulaama hwoosi ohunaletwaanga yiindi, 16olwohuba ese mweene niise oyedoleere, haandi ndaamala ndaayilabya yaaba abuundu yi ese njia ohwiinamirwaangao endaalo choosi. Ese njia ohuyiliindaanga haandi ohuyilwaniiriraanga ebiha byoosi. 17Nikali mbwe ochia ohukanya ohuhalaabaniraanga neende obweesikwa koti lu Daudi lataao yaholaanga, niwiisa oluyaali mu malako kaange, haandi neende ohuholaanga buli siindu si ndahulagira, 18#1 Abat 2:4.ese mba njia syesi ohwooseresaanga esisuubise syaange sindaholera Daudi lataao koti lu ndamuboolera endi Yisiraeli sichia ohutukwaangwa neende abeechuhulu bae boong'ene. 19Nae nikali mbwe ewe neende abaandu bao muhaya ohwiisa oluyaali mu malako neende ebilagiro bi ndababeresa, mani mwenamira banasaae baandi, 20mani ese mba njia ohubatusa mu syaalo sino si ndi ohubaberesa, mba njia ohujwaang'a Enyuumba ya Nasaae yino yi ndamala ohulabya ohubeechaanga abuundu ahoyere ohwiinamirwaangao. Abaandu buli abuundu baba bachia ohuyichalaasa mani bayebwaabe.
21“Enyuumba ya Nasaae yino bulaanu yibereswa oluyaali luhunuufu muno, nae nibiba bityo, buli muundu ochia ohuyibitaangaho aba achia ohwesiinduhaanga mani ateeba ati, ‘Siina syeene esyakera Omwaami n'ahola sino hu syaalo huno neende hu Nyuumba ya Nasaae yino?’ 22Abaandu baba bachia ohukobolaangamo bati, ‘Ni olwohuba bajwaang'a Omwaami Nasaae waabwe, owatusa bakuuka yaabwe mu Misiri. Bakaluuhana baaberesaanga banasaae baandi obweesikwa bwaabwe, haandi baabeenamiraanga. Mani esyo nisyo esikera Omwaami niyabaleetaho omusihiriro kuno.’ ”
©Bible Society of Kenya, 2019
©Bible Society of Uganda, 2019