1 Samueli 3
3
Omwaami abonehera Samueli
1Ao omwaana Samueli yali ahalaabanira Omwaami naali aasi w'obunyala bwa Eli. Mu ndaalo echo, Omwaami siyaheera ohulomaloma neende abaandu oba ohubabonehera. 2Mani mu siro siindi, Eli owali naatabona bulai olwohuba emoni chae chali aambi ohuwofula, yali niyeyaliise mu siseenge syae syeene. 3Samueli nae yali naakonere Abuundu Woolerefu, yi Esanduuku ly'Endagaano lyali. Obwiire bwali nibutamuuhana, etaara nilisyaaduha 4Omwaami yalaanga Samueli. Samueli yakobolamo ati, “Ndiwo omuhuluundu!” 5Mani niyeeruha n'achia eyiri Eli n'aboola ati, “Mbano nduwo, olwohuba wunaangire.”
Eli naakobolamo ati, “Haba sihulaangire daawe; kobolerayo weyalise.” Samueli naakobolerayo mani niyeyalisa.
6Haandi Omwaami naalaanga Samueli ehabi liindi. Samueli yali n'asisiiri ohumanya ati Omwaami niye owali naamulaanga, olwohuba Omwaami yali n'asisiiri ohulomaloma nae. Samueli mani naasimuha n'achia eyiri Eli, n'aboola ati, “Mbano nduwo, olwohuba wuunangire.” Nae Eli yakobolamo ati, “Mwaana waange, haba sihulaangire daawe, kobolayo weyalise.” 7Bulaanu Samueli yali n'asisiiri ohumanya Omwaami haandi Omwaami yali n'asisiiri ohulomalomaho neende Samueli daawe.
8Omwaami haandi naalaanga Samueli ehabi lyohudatu; Samueli yasiingira mani naachia eyiri Eli, n'aboola ati, “Wuunaangire, mani mbano nduwo.”
Eli bulaanu naamanya ati Omwaami niye owali naalaangaanga omwaana wuno, 9mani naaboolera Samueli ati, “Kobolayo weyalise, nae naahulaanga haandi, boola oti, ‘Omwaami lomaloma, omuhalaabani wao awulira.’ ” Samueli mani n'akobolayo niyeyalisa.
10Omwaami yeecha mani niyeema ao, mani naalaanga koti lu yali naaholere hale ati, “Samueli! Samueli!” Samueli naakobolamo ati, “Lomaloma, omuhalaabani wao awulira.”
11Omwaami yaboolera Samueli ati, “Njia ohuhola esiindu hu baandu ba Yisiraeli bano, esy'amatiichasi si buli muundu ochia ohusiwulira yahawukeho sa. 12Hu ludaalo olwo, njia ohwooseresa ebyo byoosi bi ndalomaloma ebidiira hu bomu nyuumba ya Eli, ohutulira elalira hu njaako ohwoolera hu njakamo. 13Ndamala ohumuboolera endi njia ohusaandya abomu nyuumba yae endaalo choosi pe, olwohuba abaana bae baanomanomaho ebiindu bibi. Eli yali n'amanyire sino, nae naahaya ohubaakamia. 14Mani maliriire ohulaangirira eyiri abomu nyuumba ya Eli endi sibulao esiyaanwa syoosi oba esisaambwa syoosi esichia ohumalao ebiholwa bituunga esyonoono syamatiichasi sino.”
15Samueli yadoong'a mu buliri ohwoola lu bwahya echuli; mani naasiingira niyeekulao emilyaango ky'enyuumba y'Omwaami. Yali naatiire ohuboolera Eli ebidiira hu ohuboneherwa huno. 16Nae Eli yeecha yamulaanga ati, “Samueli, mwaana waange!”
Samueli yamukobolamo ati, “Ndiwo, omuhuluundu.”
17Eli yamuteeba ati, “Omwaami ahubooleere siina? Otaangisaho esiindu syoosi daawe. Nasaae achia ohuhusaandya muno n'otamboola buli siindu.” 18Mani Samueli naaboolera Eli buli siindu syoosi; haba siyamukisaho esiindu syoosi daawe. Eli yaboola ati, “Omwaami niye; leha ahole koti lu asiima.”
19Samueli mani naahula, haandi Omwaami naaba alala nae. Omwaami naatakanya emboosi chae kata ndala yoong'ene ohuhaya ohwoolerera. 20Ao mani abaandu boosi ba Yisiraeli, ohutula hu lwaande lw'esyaalo lulala ohwoola hu luundi, bamanya bati Samueli yali omunabbi w'Omwaami wadyeeri. 21Omwaami yemeeda ohumubonehera mu Silo, yi yali niyabonehera Samueli haandi naalomaloma nae. Mani Samuel buli si yalomalomaanga, Abaisiraeli boosi basiwuliraanga.
©Bible Society of Kenya, 2019
©Bible Society of Uganda, 2019