1 Petero 2
2
Ekina lamu neende esyaalo syoolerefu
1Sakira mwemalemo ehiinda yoosi, ohuchuunia abasyeeng'we, obubacha bwoosi, oba, ehiinda yoosi, neende obumoonyi bwoosi. 2Mube koti abaana bayere baheebulwa sa, abawulira obuluwo bw'amabeere moolerefu k'omwooyo, mani nimukang'wa muchia ohuhula munyoole obuwonia. 3#Sab 34:8. Olwohuba ebyandiiko byoolerefu biboola biti, “Mumalire ohuhoombaho hu sisa sy'Omwaami.”
4Mwiiche eyiri Omwaami, ekina elamu li baandu bahaya bati libulamo obuhoonyi, nae Nasaae yaalidoola koti eliri neende obuhoonyi yali. 5Olwohuba mwesi muli amakina malamu akoombahirwa Enyuumba ya Nasaae y'omwooyo, yi muchia ohuhalaabanira koti abalaamisi boolerefu, nimuwaana ebiyaanwa by'omwooyo bi Nasaae yakaanira ohubitira mu Yesu Kristo. 6#Yis 28:16. Olwohuba ebyandiiko byoolerefu biboola biti,
“Bone, mbao bulaanu ndaao ekina lisiira enyuumba mu Siyooni, ekina lyalobolwa haandi ely'engaanga y'aakulu;
haandi omuundu yeesi omufukiirira haba saachia hudiirwa esoni.”
7 #
Sab 118:22. Ekina lino ly'engaanga y'akulu muno eyiri eng'we abafukiiririra; nae eyiri abo abatafukiirira liri:
“Ekina li boombahi bahaya bati liwuma obuhoonyi
nilyo elyeeholere ekina huluundu lisiira enyuumba.”
8 #
Yis 8:14,15. Haandi biti,
“Lino nilyo ekina likera abaandu nibateremuha,
ekina likera nibakwa”.
Bateremuha olwohuba haba sibafukiirira emboosi yira koti lu syatekehwa siti b'ohuhola batyo.
9 #
Hut 19:5,6; Yis 43:20;
Hut 19:5; Amal 4:20; 7:6; 14:2; Tit 2:14;
Yis 43:21;
Yis 9:2. Nae eng'we muli abaandu badoolebwa, abalaamisi, enyuumba njolerefu, abaandu ba Nasaae beene, hu munyale ohufumia emirimo kya Nasaae kiwukisa, ba Nasaae yalaanga ohutula mu siirima ohwiingira mu bulafu bwae bulai butalomwalomwaho. 10#Hos 2:23. Mu biha byaahale, haba simwali abaandu badoolebwa, nae bulaanu muli abaandu ba Nasaae; mu biha byaahale haba simwaakaanira esisa sya Nasaae nae bulaanu mwanyoola esisa sya Nasaae.
Abawaambe ba Nasaae
11Eng'we basyaange, mbahubbira omulaanga bawalukeenda haandi abeyikami mu syaalo muno endi, mweyolobye obwekoombi bubi bw'omubiri obulwaania obulamu bweeng'we buli ludaalo. 12Ebiima byeeng'we eyiri abakafiiri bihoyere ohuba ebilai, kata neende nibateemaho ohubayaasa bati muli abahola-mbi, bachia ohubona ebiholwa byeeng'we bilai, mani bafumie Nasaae hu Ludaalo lw'ohwiicha hwae.
13Hulw'obulai bw'Omwaami, wulirenge abeemeresi boosi abohu syaalo: kata abe omutuki muhunuufu otuka abaandu baandi boosi, 14kata neende gafana, bayatuma ohusaandya abahola-mbi neende ohweebasa abaholi b'ebiindu bilai. 15Olwohuba Nasaae adaha ati, ebiholwa byeeng'we bilai bibwiihe hu nomanoma mbi ey'abaandu basiru. 16Obulamu bweeng'we buhoyere ohuba koti obw'abaandu bali neende omuleembe, nae mutehoonyera obulehuule bweeng'we ohubwiiha hu esibi syoosi, ohutusaho obulamu bweeng'we bube koti obw'abahalaabani ba Nasaae. 17Yiseenge oluyaali mu baandu boosi: heereenge abafukiiriri basyeeng'we, ticheenge Nasaae, haandi yiseenge oluyaali mu batuki omutuki muhunuufu.
Esyohuboneraho syohusaanda hwa Kristo
18Eng'we abahalaabani, wulireenge abaami beeng'we haandi yekeseenge oluyaali lwiichufu eyitaali abo ababaholera ebilai haandi babaasaho boong'ene, nae kata eyiri abaalaba bosi. 19Olwohuba aliwo obuhoonyi eyiri omuundu wesimiirisira obuchuuni bw'ohusaanda olwohuba akalusa ebibaaso byae eyiri Nasaae. 20Nae ngaanga siina yi munyoola nimweesimiirisira ohuhuywa hubahoyera nimuholere esibi? Ohutusaho nimweesimiirisira ohusaanda kata nimumalire ohuhola ebiindu bilai, ao nilwo lu Nasaae aba achia ohubaberesa ehabi. 21Nasaae yabalaangira sino, olwohuba Kristo yesi yabasaandira mani yaabalehera esyohuboneraho, ati munyale ohuloonda mu makulu kae. 22#Yis 53:9. Ebyandiiko byoolerefu biboola biti, “Haba siyaholaho esyonoono syoosi, haandi abulao obubacha bwatulaho muhanwa mwae.” 23#Yis 53:7. Nibamunyeka, siyakalusamo yesi naanyeka; niyasaandisibwa, haba siyatiisa-tiisaho omuundu yeesi, ohutusaho yata esuubi lyae mu Nasaae, oheenga emisaango mu buluungifu. 24#Yis 53:5,6. Omweene yakiinga ebyonoono byeefwe mu mubiri kwae hu musalabba, hu hunyale ohuba abafwa eyiri esyonoono, nae hube abalamu eyiri obuluungifu. Ohweema hu bikoonjo byae mwanyoola ohuwonisibwa. 25Olwohuba mwali nimuli koti amakoondi kakota, nae bulaanu mwakaluha eyiri Omwaayi haandi Omuliindi w'obulamu bweeng'we.
©Bible Society of Kenya, 2019
©Bible Society of Uganda, 2019