1 Kedinto 16
16
Kingking a isidong so kakteh do cinai
1O peysinsinmowen rana isidong so sinjya do Yelosaleng am to nyo manginarai o mina ciring ko so peycyakyokyokayan na do Cyalatay. 2Mangday ka niciyo na o kamimin nyo a mapasina do nizpi nyo a nimahap nyo a kakpeh nyo sya. Am to nyo palolwa do karwaro no nimahap nyo a nizpi o pasinahen nyo. Ji nyo nanala yaken, ta to nyo ngonongonongi o kapeysinsinmo nyo sya. 3No si makaranes ko na am manovoy ko so ipeyhanhan nyo a tao a maciralay do teygami a kano nipeysinsinmo nyo a nizpi a yangay da do Yelosaleng. 4Am no si paciralayan ko nizpi am to sira na macihza jyaken a mangay.
Naknakmen na ni Pawlo a mangay jira do Kedinto
5Yaken rana am ko meyliktaw do Maciton. Si mateyka ko a itazogaw o aro a kyokay do Maciton am mangay ko jinyo. 6Ala miseysan ko jinyo do dang so makanateng a araw. Ala si mavitos rana o amyan am ori o yangay ko rana mangilili a sidongen nyo pa yaken a meypangay do angayan ko. 7Ta no si apyahen na ni Ama ta do to am ko ikakza o kownay ko pa a macikaop jinyo do dang. 8Am to ko pa vezed do Ivoso eya mangay do araraw no ipamarimaring ta so kanen a somaray no nihakawan ta. 9Tana yaro yamrahet jyaken a yameylimwang no ciriciring na ni Ama ta do to am ko ji macimazai. Ta yatey yaro o makza no ciriciring na ni Ama ta do to.
10No si mangay si Timotay jinyo dang am taotawwen nyo an, a kapiya na no onowned na an. Ta yanamen meyyangay a yamahap so vazay na ni Ama ta do to. 11Ji nyo ngolala. Ta sidongen nyo a meypangay jyaken do jya. Ta yako nanalahen si Timotay a kano kakehza na a mai jyaken do jya.
12O kakteh ta si Apolo am ko masangib a ipanci jya o kakekehza da sira kakteh ta mangay tomazogaw ninyo. Am na sapasapan pa. Cyaha, ta amyan so kasaraw a yangay na jinyo.
Ney manowji a ciring na
13Meytataziman kamo an. Makahadpet kamo so nakenakem a omraralay ni Ama ta do to. Ji kamo a nyahey. 14Pangozayan nyo o pangangarilawan na do makakaday a vazay nyo.
15Nyo katenngan sira Setiva yasa ka vahay, ta sira rana yasa ka vahay do Sila am ney manma sira niomanoyong ji Yeso a tao a tey mowyat a somidong so sinjya. 16Am ori o amizngen nyo so akman sang a tao a kano kararay da mahap so vazay na ni Ama ta do to. Amizngen nyo o yokodan da ninyo.
17Ko masaray do da kanimai da Setiva kani Votonato a kani Akayko. Yakmey kataotao nyo sira do nyo ikabo do jya. 18Tana yaken a tana inyo am tamo meyyangay a yasomaray nira. O akman rana sira ya am ikanig nyo sira ya an.
19Da ipeyminaminasi inyo no peycyakyokyokayan na do Yasiya. Tana si Akwila kani Paycila kano aro a sinjya a meyneynozi do vahay da am yakman sang sira yameyminaminasi ninyo do tamo kakmey yasa yamraralay ni Yeso. 20Sira mamimin o kakteh ta do jya yameyminaminasi ninyo. Inyo rana am masicyakarilaw kamo a meyminaminasi no kadwan jinyo.
21Yaken rana am si Pawlo ko a yamapadket so aryarilaw ko jinyo do vakong eya. Makapya kamo an.
22No myan so ji raralay ni Yeso Kizisto a tao am manoyong kapeygegcin na jya no oyaoya na ni Ama ta do to.
Mo Yeso Kizisto, inaoy si mai ka na.
23Inaoy si itoro na ni Yeso a Panirsirngen ta o pangangarilawan na jinyo.
24Ko ikarilaw inyo, ta kamo macikaop ji Yeso Kizisto.
Currently Selected:
1 Kedinto 16: snt
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan
