Aroma 13

Kwayu'wa alongosi ba nni'ma

1Kila mundu apalikwa kwayu'wa atawala ba silikali, kwa mwanjaa utawala woti ubu'ka kwa Nnu'ngu', na wembe ubi'kilwe na Nnu'ngu'. 2Kwa nyo ywataukana na utawala wa silikali, aywo aitaukya amuli ya Nnu'ngu', na babapanga nyo bailetya ukumu bene. 3Kwa mwanjaa babapanga manogau baayogopali atawala, ila kwa balu' babapanga maakau bai. Kwa nyo mana kokana kwayogopa atawala upange makowe ganannoga, na bembe baalu'a kulumba. 4Ntawala wa silikali nga ntumisi wa Nnu'ngu', na lyengo lyapanga lya pwaila yinu mwabene. Lakini mana upangite maakau, upalikwa yogopa! Kakape panga abile nawo uweso wo ukumu. Ywembe apanga ntumisi ywa Nnu'ngu', kwa kwaukumu balu' babapanga malau. 5Kwa nyo mpalikwa kwayu'wa atawala ba silikali, kwenda kwa kitumbu so yogopa ukumu baili, ila kai' kwa kitumbu sa zamili kaneikuauye.

6Kwa kitumbu so muli'pe koli, kwa mwanjaa atawala nga atumisi ba Nnu'ngu', babatumya masaa gambone kuntumikia mwenga. 7Mumpei kila mundu aki yake. Ywalonga koli yoyoti ali'pi'lwe, mundu ywapalikwa isimilwa aisimilwe.

Pendana kwa bandu boti

8Kanemube na lileni kwa mundu ywoywoti, ila mupendane, kwa mwanjaa yu'lu' ywampenda nnyine atimisa salya. 9Kwa mwanjaa amuli yi' yaibaya, “Kaneupange upege, kaneubulage, kaneuyibe, kaneuminyikiye,” na amuli yi'ngi' yoti, iyongeyelwa muamuli ayi' yimo, “Umpende ywapapipi yako kati mwawipenda wamwene.” 10Mundu ywampenda ywapapipi yake awesali kumpangya ulau. Kwa nyo upendo nga ndi'la yo timisa salya ya Nnu'ngu'.

11Na mwenga mupange nya, ku'no kamuukwipwa nsimu watubile nawo. Saa yo yumuka bu'ka mulugono iikite, kwa mwanjaa nambi'yambi' ukosopoli witu wi pipi muno kulikoni patumbu patwaau'bi'lile. 12Kilo kiyendelile muno na muntwekati kwendaegelya. Bai tugataikuli kuutalu makowe goti ga lubi'ndu', na tuwale ingondwa ya bweya. 13Tutame kati mwaipalikwa kwa wakati wa muntwekati, na kwenda kwo mila no lobya, usapu na upege, nnomo na bwigu li. 14Bai Bwana Yesu Kilisitu abe kiwalo sinu, kanemwiauye kai' na maminyikio ga yi'ga yinu yene ali ya sambi.

Currently Selected:

Aroma 13: Matumbi

Highlight

Copy