Romanos 7
7
Casarakuymanta rijch'anachina
1Kunanqa Moisespa kamachisqanta yachajkunaman parlani. Wawqe panakuna, qankuna yachankichej, kamachisqata kasuna kasqanta kawsananchejkamalla. 2Kamachisqaj nisqanman jina, qosayoj warmeqa qosan kawsanankamalla warmin kanan tiyan. Qosan wañupojtinrí, kamachisqallataj nin chay warmeqa manaña qosanpa makinpichu kasqanta. 3Chayrayku sichus qosan kawsashajtin chay warmi waj qhariwan qosanta wasanchan chayqa, pay khuchichakuspa, qhenchachakun. Qosan wañupojtinrí, kamachisqa nisqanman jina chay warmeqa manaña qosanpa makinpichu. Jinaqa sichus waj qhariwan casarakun chayqa, mana khuchichakunchu.
4Ajinallatataj qankunapis, wawqe panaykuna, maypachachus Cristowan wañorqankichej chaypacha, manaña Moisespa kamachisqanpa atiyninpichu kankichej. Kunanrí pichus wañusqamanta kawsarichisqa karqa, chayman ujchasqa kankichej. Ajinamanta Diospaj allin imakunata ruwayta atinchej. 5Maypachachus juchallinaman aysaj sonqonchejpa munasqanta kasuspa kawsarqanchej chaypacha, juchalliyta munana noqanchejpi llank'arqa. Jinapitaj Moisespa kamachisqan mana allin kajta ruway munanata astawan rijch'aricherqa. Chayta kasusqanchejraykutaj Diosmanta wiñaypaj karunchasqa kanata tarerqanchej. 6Kunanrí, Moisespa kamachisqanmanta kacharichisqaña kanchej, imajtinchus chay kamachisqapaj wañunchejña, jinataj manaña kamachisqaj makinpichu kanchej. Ajinamanta manaña chay ñawpa kamachisqaj nisqanman jinachu Diospa munayninta ruwanchej, manachayqa chayta waj jinamanta ruwanchej, Santo Espirituta kasuspa.
Diospa kamachisqanqa juchasapa kasqanchejta sut'inchan
7Jinaqa, nisunmanchu Moisespa kamachisqan mana allinchu kasqanta runapi mana allin ruway munanata rijch'arichisqanrayku? Ni imarayku. Manachus Moisespa kamachisqan kanman karqa chayqa, imachus jucha kasqanta mana yachaymanchu karqa. Nisunman: Manachus kamachisqa ninman karqa: Ama wajpa tiyapuyninta munapayankichu nispa chayqa, mana yachaymanchu karqa wajpa kapuyninta munapayay mana allinchu kasqanta.#Ex 20.17; Dt 5.21. 8Jucharí chay kamachisqamanta valekuspa, tukuy imaymana munapayayta noqapi rijch'aricherqa, imaraykuchus kamachisqa mana kajtenqa, jucha mana atiyniyojchu kanman.#Ro 5.13. 9Ñawpajta kawsaj kani Moisespa kamachisqan imatachus kamachiwasqanta mana yachaspalla. Chaywanpis maypachachus mana munapayanamanta kamachisqanta yacharqani chaypacha, juchalliyta munana noqapi rijch'arerqa. Chayraykutaj Diospa ñawpaqenpi wañusqa jina rikhurerqani. 10Chay kamachisqaqa kawsayta qonawan karqa. Chaywanpis chaynejta noqaqa Diospa ñawpaqenpi wañusqa jina rikhurerqani. 11Chayqa ajina, imaraykuchus jucha kamachisqamanta valekuspa, q'otiyawarqa, chay kamachisqanejtataj jucha wañuchiwarqa. 12Chayrayku nisunman kamachisqakuna Diospa qosqan kasqanrayku may llimphu kasqanta, cheqan, jinataj allin.
13Chantá, chay jina sumaj kamachisqachu noqata wañuchiwarqa? Ni imarayku. Aswanpis juchamin allin kajmanta valekuspa, wañuchiwarqa. Ajinaqa Dios kamachisqankunanejta rikuchiwanchej juchaqa imayna millaypunichus kasqanta.
14Yachanchej kamachisqaqa Diospa churasqan kasqanta. Noqarí runalla kaspa, juchallinaman aysaj sonqoypa munayninwan atipachikuni. Ajinamanta juchaj wata runan kanaypaj vendesqa jina kani. 15Ajinaqa, imatachus ruwasqayta mana yachanichu, imaraykuchus allin kajta ruwayta munaspapis, mana chayta ruwanichu. Aswanpis imatachus chejnini, chayta ruwani.#Gl 5.17. 16Noqa yachani imatachus ruwasqayqa mana allinchu kasqanta. Jinapi sichus mana allin kajta ruwani chayqa, yachayta qoshani kamachisqaqa allin kasqanmanta. 17Jinaqa mana noqachu chay mana allin kajta ruwani, manachayqa noqapi kashan, chay juchalliyta munanamin chayta ruwan.
18Yachani noqapi, juchallinaman aysasqa sonqoypi allin kaj mana kasqanta, imaraykuchus allin kajta ruwayta munani chaypis, mana atinichu. 19Allin kajta ruwayta munasqayta mana ruwanichu. Aswanpis mana allin kajta mana ruwayta munaspapis, chaytapuni ruwani. 20Ajinaqa sichus mana munasqayta ruwani chayqa, mana noqachu chayta ruwani. Aswanpis juchalliyta munana noqapi kashan, chaymin chayta ruwan.
21Ajinaqa kayta reparani: Allin kajta ruwayta munani chaypis, mana allin kajllata ruwani. 22Sonqoypeqa noqa Diospa kamachisqanta munakuni. 23Chaywanpis sonqoy ukhupi waj atiy kasqanta reparani, chaytaj yuyayniywan maqanakushan. Chay ateyqa noqapiraj kashan, chaytaj juchaj wata runanman tukuchiwan.
24Ay, imanallasajtaj? Pitaj juchaj makinpi, jinataj wañuypa atiyninpi kawsanamanta kacharichiwanqari? 25Diosta pachis nini, imaraykuchus paymin Tukuyta Kamachej Jesucristonejta kacharichiwan. Ajinaqa kayta reparani: Yuyayniywanqa noqa Diospa kamachisqanta kasuspa kawsayta munani. Chaywanpis juchallinaman aysasqa sonqoyrayku juchaj wata runan kani.
Revisión Biblia Quechua Boliviano © Sociedad Bíblica Boliviana, 2017.