Números 36
36
Warmikuna chayaqeta jap'ejkuna
1Josejta churin Manasés karqa, Manasespata churintaj Maquir, Maquirpata churintaj Galaad. Chantá Galaadpa mirayninmanta kurajkuna rispa, Moisestawan, tukuy israelitakunaj kurajninkukunatawan ima nerqanku: 2Wiraqochiyku Moisés, Tata Dios qanta kamachisorqa kay jallp'ata suerteta choqaspa, israelitakunaman qonaykita. Chantá aylluykumanta karqa Selofejadpata ususinkunamanpis jallp'ata qonaykita kamachillasorqataj. 3Chaywanpis sichus paykuna waj jatun ayllumanta qharikunawan casarankuman chayqa, jap'erqanku, chay jallp'a manaña aylluykojtachu kanqa. Manachayqa ima ayllumanta qhariwanchus casaranqanku, chay jatun aylluman pasanqa. Sichus ajina kanman chayqa, suertepi jap'isqayku jallp'a pisiyanqa. 4Chantá Israelpi kacharipuna wata chayamojtenqa, chay warmikunaj jallp'ankoqa qosankoj jallp'anman yapaykusqa kanqa. Jina kajtin, paykunajta karqa, chay jallp'aqa manaña tataykoj ayllunpatachu kanqa, nispa.
5Chantá Moisés, Tata Diospa kamachisqanman jina, israelitakunata kamacherqa: Joséj ayllunmanta kajkunaqa cheqanta parlanku. 6Chayrayku Tata Dios kayta kamachin: Selofejadpa ususinkunaqa munasqankuman jina casarakuyta atinku. Chaywanpis tatankoj jatun ayllunmanta kaj qharillawan casarakonqanku. 7Jinamanta israelitakuna jap'isqanku jallp'aqa mana uj jatun ayllumanta uj jatun aylluman pasanqachu. Sapa israelita jatun ayllunpi jallp'anta jap'inallanpuni tiyan. 8Sichus mayqen jatun ayllullamantapis uj warmi jallp'ayoj kanman chayqa, jatun ayllunmanta kaj qhariwanpuni casaranan tiyan. Ajinamanta israelitakunaqa tatankoj jallp'anta jap'illanqankupuni. 9Ni mayqen jallp'a waj jatun aylloj makinman chayananchu tiyan. Israelmanta sapa jatun ayllu jap'isqan jallp'ata mana waj jatun aylluman kacharinanchu tiyan, nispa.
10Chantá Selofejadpa ususinkunaqa Tata Dios Moisesman kamachisqanman jina ruwarqanku. 11Ajinata Malá, Tirsa, Joglá, Milca, Nogá ima ruwarqanku. Paykunaqa tatankumanta tionkunaj churinkunawan casarakorqanku. 12Chay qharikunaqa Joséj churin Manasespata mirayninmanta karqanku. Ajinata chay sipaskuna ruwasqankurayku, jap'isqanku jallp'aqa tatankoj ayllun ukhullapipuni karqa.
13Kaykunata Tata Diosqa Moisesnejta israelitakunaman kamacherqa Moab pampapi, Jordán mayu kantupi, Jericó llajtaj chimpanpi.
Currently Selected:
Números 36: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
