Números 23
23
1Chantá Balaamqa Balacta nerqa: Kaypi qanchis altarta ruwapuway, chantá qanchis torillota, qanchis carnerotawan ñak'ay, nispa.
2Balactaj Balaam imatachus nisqanta ruwarqa. Chantá iskayninku sapa uj altarpi uj torillota, uj carnerotawan ima jaywarqanku.#23.1-2 Mesopotamia suyupi yachajkuna, diosninku imatachus munasqanta yachanankupaj uywa ñak'asqata q'olachispa, jaywayta yachasqanku (vv. 29-30).
3Chaymantataj Balaamqa Balacta nerqa: Qanqa jaywanaykipaj ñak'asqaykej qayllanpi kashay. Noqataj Tata Dioswan tinkumoj risaj. Ichapis rikhuriwaspa, imata niwanman. Kutimuspataj, imatachus niwasqanta willasqayki, nispa. Chantá Balaamqa uj ch'in orqoman wicharerqa. 4Chantá Tata Dios Balaamman rikhurerqa, Balaamtaj nerqa: Qanchis altarta ruwachini, sapa altarmantaj uj torillota, uj carnerotawan ñak'aspa, qanman jaywanaypaj churachini, nispa.
5Chantá Tata Dios Balaam imatachus parlananta yachacherqa. Nerqataj: Kutispa, Balacta nimuy imatachus qanman nisqayki, chayta, nispa.
6Balaamtaj kutispa, Balacta, Moabmanta tukuy kurajkunatawan khuska tariparqa, uywa ñak'asqaj qayllanpi sayashajta. 7Chaymantataj Balaamqa ajinata sut'inchayta qallarerqa:
Arammanta Balac pusachimuwan,
Moabpata kamachejnin inti llojsimuy orqomanta wajyachiwan:
Jamuy, Israelta maldiciy.
Jacobpata ayllunta mana allin rinanta niy, nispa.
8Ima nispataj maldicisaj, pitachus Tata Dios mana maldicinchu, chaytari?
Imaynatataj kay runakunata mana allin rinanta niymanri, sichus Dios mana munanchu chayri?
9Kay chhanka patamanta paykunata rikuni,
kay orqo patamantataj paykunata qhawashani.
Kay runakunaqa mana imatapis manchachikuspa, tiyakushanku.
Tukuymanta nisqa waj jina runakuna kanku.
10Jacobpa miraynenqa t'iyu jina may chhika kanku.
Pitaj paykunata yupayta atinmanri?
Pitaj yachanman mashkhachus kasqankutari?
Allin kanman noqapis kay cheqan runakuna jina wañunay.
Noqaj tukukuyneyqa paykunajta jina kachun, nispa.
11Chantá Balacqa Balaamta nerqa: Imatataj ruwashankiri? Noqaqa awqayta maldicinaykipaj qanta pusachimorqayki, mana paykunata saminchanaykipajchu, nispa.
12Balaamtajrí kuticherqa: Noqa nerqayki: Imatachus Tata Dios parlanayta kamachiwanqa, chayllata parlasaj, nispa.#Nm 22.20.
13Chaymanta Balac nerqa: Jaku, wajnejmanñataj rina. Chaymanta israelitakunaj jarankoj kantullanta rikunki, mana tukuynintachu. Chaynejmantapacha chay runakunata maldicinki, nispa.
14Chantá Balacqa Balaamta Sofinman pusarqa. Chayqa Pisga orqo patapi kashan. Chaypipis Balac qanchis altarta ruwachillarqataj. Chantá sapa altarpi uj torillotawan, uj carnerotawan ñak'aspa, jaywarqa.
15Balaamtajrí Balacta nerqa: Jaywanaykiwan khuska kayllapi qhepakuy, noqataj Tata Dioswan parlaj risaj, nispa.
16Chantá Tata Diosqa Balaamman rikhurispa, imatachus parlananta yachacherqa. Chantá nerqa: Balacman kutispa, willamuy imatachus nisusqayta, nispa.
17Balaamtaj kutispa, Balacta, tukuy Moabmanta kurajkunatawan khuska uywa ñak'asqa q'olachinapaj qayllapi sayashajta tariparqa. Balactaj payta taporqa: Tata Dios, ima nisunkitajri? nispa.
18Chantá Balaam sut'inchayta qallarispa, nerqa:
Siporpa churin Balac, sumajta uyariway.
19Diosqa mana wañoj runa jinachu llullakunanpaj,
nitaj nisqanmanta kutirinanpaj.
Nin chayqa, manachu ruwanqa?
Parlan chayrí, imatachus nisqanta manachu junt'anqa?
20Dios kamachiwan israelitakunata saminchanayta.
Sichus Dios saminchan chayqa, noqa mana jark'ayta atiymanchu.
21Payqa Jacobpa mirayninpi mana ni ima millay ch'ichita tarinchu,
nillataj Israelpi ch'ichi kajta ruwanata rikunchu.
Tata Diosninkoqa paykunawan kashan,
paykunataj Diosta kuraj kamachejninkuta jina jatunchanku.
22Diosqa paykunata Egiptomanta orqhomorqa
kallparara k'ita toro jina kallpawan.
23Jacobpa contranpi ima layqeriyopis mana kanchu,
nillataj layqapis Israelpa contranta atinchu.
Kunanqa Israelmanta nenqanku:
Qhawaychej, Diosqa paykunapaj tukuy imaymana t'ukunata ruwasqanta, nispa.
24Kay runakunaqa león jina sayaykonqanku,
phiña león jinataj sayarenqanku.
Jap'isqanta mikhunankama mana samarenqachu,
jap'isqanpa yawarninwan sajsakunankama, nispa.
25Chaymantá Balacqa Balaamta nerqa: Sichus kay runakunata mana maldicinkichu chayqa, amaña niychu allin rinanta, nispa.
26Balaamtajrí kuticherqa: Manachu nerqayki: Noqaqa imatachus Tata Dios kamachillawasqanta ruwasaj, nispa?#Nm 22.20.
27Chantá Balac nerqa: Jina kajtenqa, jaku, wajnejmanñataj risunchej. Ichapis Diosqa chaymanta israelitakunata maldicinaykita munanman, nispa.
28Chantá Balacqa Balaamta pusarqa Peor orqo pataman. Chaynejmantataj tukuynin ch'innej rikukorqa. 29Chaypitaj Balaamqa Balacta nerqa: Kaypi qanchis altarta ruwapuway, chantá qanchis torillota, qanchis carnerotawan ima ñak'ay, nispa.
30Balactaj, Balaampa nisqanman jina, kikinta ruwarqa. Sapa altarpi uj torillota, uj carnerotawan ñak'aspa, jaywarqa.
Currently Selected:
Números 23: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
