Mateo 14
14
Bautizaj Juanta wañuchinku
(Mc 6.14-29; Lc 9.7-9)
1Chaypacha kuraj kamachej Herodes Antipas sutiyoj Galileapi kamachisharqa, paytaj Jesuspa ruwasqanmanta uyarerqa. 2Chantá kamachinkunata nerqa: Chayqa Bautizaj Juanchá. Wañusqamanta kawsarimpusqanrayku payqa kay jina atiyniyojpuni, t'ukuna imakunatataj ruwan, nispa.
3Herodesqa chayta nerqa, imaraykuchus Juanta ñawpajta jap'ichispa, watasqata carcelman wisq'aykuchisqa Filipo wawqenpa warmin Herodiasrayku. 4Herodestaj chayta ruwasqa, imaraykuchus Juan payta nisqa: Mana cuñadaykita warmiykipaj jap'ikapuyta atinkichu,#Lc 3.19-20.#Lv 18.16; 20.21. nispa.
5Chayrayku Herodesqa Juanta wañuchichiyta munasqa. Chaywanpis runakunata manchachikuspa, mana imanayta atisqachu, imaraykuchus Juanta tukuy runakuna Diosmanta sut'inchajpaj qhawasqanku. 6Chantá Herodespa diachakunpi Herodiaspa ususin diachakuman wajyasqakunaj ñawpaqenkupi tususqa, Herodestaj maytapuni kusikusqa. 7Chayrayku payqa tiluspa, chay sipasta nisqa: Imatachus mañakuwasqaykita qosqayki, nispa. 8Sipastajrí mamanpa yuyaychasqan kaspa, Herodesta nisqa: Bautizaj Juanpa umanta qoway uj phampa chuwapi, nispa.
9Chayta sipas nejtinkamaqa, kuraj kamachej Herodes llakikusqa. Chaywanpis chaypi kajkunaj ñawpaqenkupi tilusqanrayku, Juanpa umanta qonankuta kamachisqa. 10Jinataj uj soldado carcelman rispa, Juanpa umanta qholumusqa. 11Chay umatataj phampa chuwapi apamuspa, sipasman jaywasqa, paytaj mamanman apasqa. 12Chay qhepata, Juanpa yachachisqankuna jamusqanku, ayanta apakapuspataj, p'ampasqanku. Chantá, Jesusman willaj risqanku.
Jesús 5.000 runakunaman mikhuchin
(Mc 6.30-44; Lc 9.10-17; Jn 6.1-14)
13Jesusqa Bautizaj Juan wañusqanta yachaspa, chaymanta uj botepi riporqa aswan karu cheqanejman, sapallan kananpaj. Runakunatajrí maymanchus risqanta yachaytawan, paypa qhepanta tukuy llajtamanta chakipi rerqanku. 14Jinapi Jesús botemanta llojsishaspa, ashkha runata rikorqa. Paykunamanta khuyakuspataj, tukuy onqosqakunata qhaliyacherqa. 15Ch'isiyaykuytataj, yachachisqankuna Jesusman qayllaykuspa, nerqanku: Ch'in cheqanejpi kanchej, ch'isiyaykushanñataj. Chayrayku kay runakunata kachapullayña, ranchokunaman rispa, imallatapis rantikamunankupaj, nispa.
16Jesustajrí paykunata nerqa: Mana ripunankuchu tiyan. Qankuna paykunata mikhuchiychej, nispa.
17Yachachisqankunataj kuticherqanku: Kaypeqa phishqa t'antalla, iskay challwakunallawan tiyapuwayku, nispa.
18Jesustaj nerqa: Chayta apamuwaychej, nispa.
19Chantá Jesús runakunata ch'iki pataman tiyarakunankuta kamacherqa. Jinaspataj, chay phishqa t'antakunata, iskay challwakunatawan makinpi jap'erqa, janajta qhawarispataj, Diosman pachis nerqa. Chantá, t'antakunata partispa, yachachisqankunaman jaywarqa, paykunataj runakunamanñataj rak'irarqanku. 20Jinapi tukuyninku sajsakunankukama mikhorqanku. Jesuspa yachachisqankunataj puchoj t'antata chunka iskayniyoj canasta junt'ata tantarqanku. 21Chay mikhojkunaqa 5.000 jina qharikuna karqanku, mana warmikunata yupaspa, nitaj wawakunata.
Jesús yaku patata purin
(Mc 6.45-52; Jn 6.16-21)
22Chaypacha Jesusqa yachachisqankunata boteman wicharinankuta kamacherqa, qocha chimpaman ñawpashanankupaj. Chaykamataj Jesusqa runakunata kachapusharqa. 23Runakunata kachapuytawantaj, sapallan orqoman wicharerqa, Dioswan parlarikoj. Tutayaykuytataj pay sapallan kasharqa. 24Chaykama yachachisqankuna botepi qocha chawpitaña rishajtinku, yakoqa qhollchoqeyaspa, kayman jaqayman boteta apaykachasharqa, ñawpaqenkumantataj wayra manchayta phukumusharqa. 25Manaraj sut'iyashajtintaj, Jesús yaku patata purispa, paykunanejman rerqa. 26Jinapi yachachisqankunaqa runaman rijch'akojta yaku patata purejta rikuytawan, mayta manchachikuspa, qhaparerqanku: Alma, alma, nispa.
27Jesustajrí usqhayllata paykunata nimorqa: Sonqochakuychej, noqa kani. Ama manchachikuychejchu, nispa.
28Chantá Pedro kuticherqa: Wiraqochi, qanchus kanki chayqa, yaku patata qanman jamunayta niway, nispa.
29Jesustaj nerqa: Jamuy, nispa. Jinapi Pedroqa botemanta llojsiytawan, Jesusman rinanpaj yaku patata puriyta qallarerqa. 30Pedrotajrí sinch'i wayrata reparaspa, mancharikorqa, yakuman chinkaykoj jina kashaspataj, qhaparerqa: Wiraqochi, yanapariway, nispa.
31Jesusqa Pedrota usqhayta makinmanta aysariytawan, nerqa: Qan pisillata noqapi atinikunki. Imaraykutaj iskaychakunkiri? nispa.
32Jesuswan, Pedrowan ima boteman wicharejtinkukamataj, wayra thañikorqa. 33Chaymantataj botepi kajkuna Jesusman qayllaykuspa, k'umuykukorqanku, nerqankutaj: Qanpuni Diospa Churin kanki, nispa.
Jesús Genesaretpi onqosqakunata qhaliyachin
(Mc 6.53-56)
34Chantá Jesuswan, yachachisqankunawan qocha chimpaman rispa, Genesaret chaynejman chayarqanku. 35Chay llajtayojkunataj Jesusta rejsiytawan, tukuynejman willaracherqanku pay chayamusqanmanta. Chantá tukuy onqosqakunata payman apamorqanku. 36Jinataj Jesusta mayta nerqanku onqosqakuna p'achanpa kantullantapis llankharinankuta saqenanta. Chantá tukuy llankhaykojkunaqa onqoyninkumanta qhaliyachisqa karqanku.
Currently Selected:
Mateo 14: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
