Levítico 7
7
Juchamanta jaywanapaj kamachisqakuna
1Tata Dios Moisesta nillarqataj: Jucharayku jaywanaqa Tata Diospaj t'aqasqamin. Chayrayku juchamanta jaywanata jaywaspaqa, ajinata ruwanqanku: 2Jucharayku jaywanapaj apamusqa uywataqa ñak'anqanku, q'olachispa jaywanapaj uywata maypichus ñak'anku, chaypi. Chantá ñak'asqa uywaj yawarninwan altarta, chantá tukuy muyuynintinta ima ch'ajchunanku tiyan. 3Chaymantaqa ñak'asqa uywaj tukuy wiranta wirachanqa: Chupanta, ch'unchulapi wiranta, tukuy wiranta ima q'olachispa Diosman jaywanqa. 4Jaywallanqataj iskaynin lurunninta, lurunninpi wiranta, ch'illanpi wiranta, k'iwicha qayllapi wiranta ima. K'iwichanpi wirataqa lurunnintawan khuskata orqhonqanku. 5Chaymantataj sacerdoteqa chaykunata altarpi q'olachenqa, Tata Diospaj jaywanata jina. Chayqa jucharayku q'olachisqa jaywanamin. 6Chantá jucharayku jaywasqa uywamantaqa Diospaj T'aqasqa Cheqapi tukuy sacerdotekuna mikhuyta atenqanku, imaraykuchus chayqa Diospaj t'aqasqamin.
7Jucha pampachasqa kananpaj jaywanaqa, jucharayku jaywana jinallataj kashan, chayrayku jaywanapaj kamachisqakunaqa iskayninpaj kikillan kanqa. Jucha pampachasqa kananpaj jaywasqa uywaj aychanqa jaywaj sacerdotepaj kanqa. 8Jinallataj q'olachispa jaywasqa uywaj qaranqa jaywaj sacerdotellapajtaj kanqa. 9Jinallataj ch'aki mikhuy jaywanamanta hornopi chayachisqa kaj, fierro mankapi chayachisqa kaj, chantá paylapi chayachisqa kajqa jaywaj sacerdotepaj kanqa. 10Ch'aki mikhuy tukuy jaywanamanta, kachun aceitewan puñasqa, chayrí mana, Aaronpata tukuy churinkunapaj kanqa. Chaytaqa kikichajkama rak'inakonqanku.
K'achata kawsakuy jaywana
11Tata Diosman k'achata kawsakuy jaywanata jaywanapaj kamachisqakunaqa kaymin: 12Sichus pipis Tata Diosta pachis nispa jaywanata Diosman apamonqa chayqa, ñak'aspa jaywanapaj uywatawan khuska aceitewan puñasqa mana levadurayoj tortillata apamonqa. Apamullanqataj aceitewan jawisqa mana levadurayoj tortillata, chantá sumaj jak'umanta aceitewan puñaspa ruwasqa t'antawan. 13Jinallataj pachis nispa allinyakuna jaywanatawan khuska jaywananpaj levadurayoj t'antata apamullanqataj. 14Tukuy jaywanamanta wakinta Tata Diosman jaywanqa. Chantá chay jaywasqaqa sacerdotepaj kanqa, pichus k'achata kawsakuy jaywanamanta uywaj yawarninta altarpi ch'ajchojpaj.
15Diosta pachis nispa, chantá allinyakuy jaywanapaj jaywasqa uywaj aychantaqa chay p'unchaypacha mikhunanku tiyan. Q'ayantinpajqa mana ni uj chhikallantapis puchuchinankuchu tiyan. 16Sichus pipis, imata nisqanta junt'aspa, uj uywata apamunman chayqa, chayrí sonqonmanta munaspa apamunman chayqa, Diosman jaywanqa. Chantá chay kikin p'unchaypacha jaywasqa uywaj aychanta mikhunanku tiyan. Chaymanta puchojtataj q'ayantinpis mikhuyta atillanqanku. 17Sichus kinsa p'unchayninman Diosman jaywasqa uywaj aychan kanmanraj chayqa, tukuynin ruphachisqa kanan tiyan. 18Sichus pipis kinsa p'unchayninman allinyakuy jaywanamanta uywaj aychanta mikhunman chayqa, chay jaywasqanta Tata Dios mana jap'ikonqachu, nitaj cuentaman churasqachu kanqa. Aychataj ch'ichipaj qhawasqa kanqa. Pichus chay aychata mikhojtaj juchachasqa kanqa.
19Ch'ichipaj qhawasqa imaman chayaj aychataqa mana mikhonqankuchu, manachayqa ruphachisqallaña kanan tiyan. Aychataqa llimphupaj qhawasqa kajkunalla mikhonqanku.
20Sichus pipis mana llimphupaj qhawasqa kashaspa, Tata Diosman allinyakuy jaywasqamanta aychata mikhunman chayqa, chinkachisqa kanqa.
21Ichapis pipis runaj ch'ichinta llankhanman, chayrí ch'ichipaj qhawasqa animalta, chayrí ima ch'ichillatapis llankhanman, jinapis Tata Diosman k'achata kawsakuy jaywanamanta mikhunman chayqa, llajtamanta wijch'usqa kanqa, nispa.
Yawarta, wiratawan mana mikhunamanta kamachisqa
22Tata Dios Moisesta nillarqataj: 23Israelitakunata ajinata niy: Waka wirata, oveja wirata, nitaj cabra wirata ama mikhunkichejchu. 24Wañusqa uywakunaj wiranta, chayrí k'ita animalpa mithasqan uywaj wiranwanqa imatapis ruwayta atinkichej. Chaywanpis amapuni chayta mikhunkichejchu.
25Sichus pipis Tata Diosman q'olachispa jaywana uywaj wiranta mikhonqa chayqa, chinkachisqa kanqa.
26Maypichá tiyakunkichej, chaypi phuruyoj uywaj yawarninta, nitaj animalpa yawarnintapis mikhunkichejchu. 27Pichus ima animalpallatapis yawarninta mikhojqa llajtamanta wijch'usqa kanqa, nispa.
Sacerdotekuna jap'inanku mikhuna
28Tata Dios Moisesta nillarqataj: 29Israelitakunata niy: Pichus k'achata kawsakuy jaywanata apamojqa, Tata Diospa ñawpaqenman apamunan tiyan. 30Chay k'achata kawsakuy jaywanatataj q'olachispa Tata Diosman jaywananpaj, paypuni apamonqa. Qhasqonpi wirata, chantá qhasqontawan ima apamuspa, Tata Diospa ñawpaqenpi uywaj qhasqonta ikhaspa jaywanqa. 31Chantá sacerdoteqa chay wirata altarpi q'olachenqa. Uywaj qhasqonrí Aaronpaj, churinkunapajwan ima kanqa. 32Allinyakuy jaywanamanta ñak'asqa uywaj paña piernantaqa sacerdotemanpuni qonqanku. 33Paña pierna kanqa, Aaronpa churinkunamanta mayqen sacerdotechá allinyakuy jaywanata uywaj wiranta, yawarnintawan Tata Diosman jaywanqa, chaypaj. 34K'achata kawsakuy jaywanata israelitakuna noqaman qowasqankumantaqa qhasqonta, piernantawan noqa t'aqani, sacerdote Aaronpaj, mirayninpajwan. Chaykunaqa wiñaypaj paykunapajpuni kanqa, nispa.
35Chaykunata noqa Tata Dios sacerdoteykuna kanankupaj t'aqarqani, chaymantapacha noqaman q'olachispa jaywanamanta Aaronman, mirayninmanwan ima qorqani. 36Tata Diosqa sacerdote kanankupaj t'aqasqa kasqankumantapacha, chaykunata qonankupaj israelitakunata kamacherqa. Chay kamachisqaqa wiñay wiñaypaj kanqa.
37Chaykunamin kamachisqakuna kashan: Q'olachispa jaywanamanta, ch'aki mikhuyta jaywanamanta, jucha pampachasqa kananpaj jaywanamanta, jucharayku jaywanamanta, t'aqasqa kaspa jaywanamanta, chantá allinyakuy jaywanamanta. 38Chaykunata Tata Dios Moisesman Sinaí orqopi kamacherqa, maypachachus israelitakuna Tata Diosman jaywanankupaj apamunankuta kamacherqa, chaypacha.
Currently Selected:
Levítico 7: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
