Levítico 19
19
Cheqanta ruwaspa purina
1Tata Dios Moiseswan parlaspa, nillarqataj: 2Tukuy israelitakunata niy: Tata Dios ajinata nisunkichej: Qankunaqa noqapaj t'aqasqa jina llimphu kaychej, imaraykuchus noqa Tata Diosniykichej may llimphumin kani.#19.2 Israelitakuna may llimphu kaj Diosnejta ajllasqa kasqankurayku (Is 6.3), Diospaj t'aqasqa jina purinanku karqa. Ex 19.6; Lv 11.44-45. Diospaj t'aqasqa kasqankoqa tukuy ima ruwasqankupi sut'i yachakunan karqa. Mt 5.48; 1 P 1.16.
3Sapa ujpis mamaykichejta, tataykichejtapis jatun respetowan qhawaychej. Jinallataj samarina p'unchayniyta maypaj qhawaspa, samariychej. Noqa Tata Diosmin Diosniykichej kani.#Ex 20.8-12; Dt 5.12-15.
4Ama lantikunata yupaychankichejchu, amallataj metalta unuyachispa, dioskunata ruwakunkichejchu.#Ex 20.23; 34.17; Lv 26.1; Sal 24.4. Noqa Tata Diosmin Diosniykichej kani.
5K'achata kawsakuy jaywanata Diosman jaywaspaqa, jaywasqaykichejta Tata Dios tukuy sonqo jap'ikunanpaj jina ruwaychej. 6Diosman jaywasqaykichej uywata ñak'aspaqa, chay p'unchaypacha mikhunaykichej tiyan, manachayrí q'ayantin. Minchhantinpaj puchojtarí ruphachinkichej. 7Sichus kinsa p'unchaymanraj mikhunkichej chayqa, chay jaywasqaqa millachikunapaj qhawasqa kanqa. Chayraykutaj Diosqa mana jap'ikonqachu. 8Pichus mikhojqa juchachasqa kanqa. Chayrayku llajtanmanta chinkachisqa kanqa, Tata Diosman jaywasqata manakajpaj qhawasqanrayku.
9Chajra oqharina tiempo chayamojtenqa, ama tukuynintachu ruthunkichej. Trigo uma t'akakojtaqa amaña chajmankichejchu. 10Uva huertaykichejmanta ama tukuynintachu pallankichej, nitaj pampaman t'akakojtapis oqharinkichejchu. Chayqa pisi tiyapuyniyojkuna, jinallataj waj llajtayojkuna pallakunankupaj kanqa. Noqa Tata Diosmin Diosniykichej kani.#Lv 23.22; Dt 24.19-22; Rt 2.
11Ama suwakunkichejchu.#Ex 20.15; Dt 5.19. Amallataj llullakuychejchu, nillataj ujkuna ujkunawan q'otiyanakuychejchu.#Ex 20.16; Dt 5.20. 12Amamin sutiypi tiluspa llullakunkichejchu,#Ex 20.7; Nm 30.2(3); Dt 5.11; 23.21(22); Mt 5.33. imaraykuchus Diosniykichejpa sutinta pisipaj qhawawajchej. Noqamin Tata Dios kani.
13Ama runa masiykichejta waqachinkichejchu, nitaj imantapis qhechunkichejchu. Amallataj peonniykichejpa pagonta q'ayantinkama jap'ikunkichejchu.
14Ama joq'aramanta alqorakunkichejchu.#Dt 27.18. Amallataj ni ima misk'anata ñawsa runaj ñawpaqenman churankichejchu. Manachayrí Diosniykichejta may jatun respetowan qhawawankichej. Noqamin Tata Dios kani.
15Qan juez kaspaqa, cheqanta ruwanki, ama wajchaman sayakuspa, nitaj qhapajman. Justiciataqa cheqantapuni ruwanki.#Ex 23.6-8; Dt 16.19.
16Llajtaykipi ama cuento q'epi kankichu. Amallataj runa masiykita wañuchiysikunkichu. Noqamin Tata Dios kani.
17Ama wawqeykita sonqoykipi chejnikunkichu. Runa masiykita k'amiy, k'amina kajtenqa, juchallejtin ama juchachasqa kanaykipaj.#Mt 18.15.
18Ama vengakunkichu, nillataj llajta masiykita phiñapayankichu. Astawanqa payta qan kikiykita jina munakunki. Noqamin Tata Dios kani.
19Kamachisqayta kasukunkichej. Uywaykichejta ama waj jina uywatawan tinkuchinkichejchu. Amallataj jallp'aykichejpi chajrusqa mujuta tarpunkichejchu. Tukuy imaymana q'aytumanta ruwasqa p'achata ama churakunkichejchu.#Dt 22.9,11.
20Sichus pipis uj qhariwan casarananpaj parlasqa kamachi warmiwan puñuykunman, chay warmi manaraj rantisqa, nitaj kacharipusqarajchu kashajtin chayqa, iskayninku jasut'isqa kanqanku. Chaywanpis mana wañuchisqachu kanqanku, imaraykuchus warmi manaraj kacharipusqachu karqa. 21Chay runaqa Dioswan Tinkukuna Toldo punkuman uj corderota apamunan tiyan, juchallisqanrayku Tata Diosman jaywananpaj. 22Sacerdotetaj chay corderota Tata Diosman jaywanqa, chay runaj juchallisqan pampachasqa kananpaj. Ajinamanta juchallisqan pampachasqa kanqa.
23Qankuna Canaanman yaykuspa, tukuy imaymana poqoj sach'ata churankichej. Jinaspataj, kinsa watata chay sach'aj poqoyninta ama mikhunkichejchu. Ch'ichipaj qhawasqa kanqa. 24Tawa watamantaj uj raymita ruwaspa, chay sach'akunaj tukuy poqosqanta Tata Diospaj t'aqankichej. 25Phishqa watamantataj poqosqanta mikhuyta atinkichej. Ajinamanta sach'aykichejqa astawan poqopusonqachej. Noqa Tata Diosmin Diosniykichej kani.
26Ama imatapis yawarniyojta mikhunkichejchu. Ama adivinaj kankichejchu, nillataj layqapis.
27Chujchaykichejtaqa ama muyullata k'utukunkichejchu, nillataj sunkhaykichejpata puntantapis k'uturakunkichejchu.
28Wañojkunamanta yuyarikunaykichejpaj ama ukhuykichejta q'allurakunkichejchu. Nillataj ukhuykichejpi ima marcatapis ruwakunkichejchu.#Lv 21.5; Dt 14.1. Noqamin Tata Dios kani.
29Ama ususiykichejta qolqerayku khuchichakunaman tanqaykunkichejchu,#Dt 23.17. ama llajtaykichejman millay kawsay junt'aykunanpaj.
30Samarina p'unchayniykunapi samariychejpuni. Tiyakunay cheqatapis respetowan qhawaychej. Noqamin Tata Dios kani.#Lv 26.2.
31Ama aysirikunata, nitaj layqakunatapis tapukunkichejchu. Sichus tapukoj rinkichej chayqa, ch'ichichakunkichej. Noqa Tata Diosmin Diosniykichej kani.#Dt 18.11; Is 8.19; 1 S 28.3.
32Machu runataqa sayarikuspa napaykunki, jinallataj manchay respetowan qhawanki. Diosniykitapis manchachikunki. Noqamin Tata Dios kani.
33Qankunawan tiyakoj waj llajtayojtaqa ama ñak'arichinkichejchu. 34Paykunataqa llajta masiykichejta jina qhawaychej, qankunata jinataj munakuychej, imaraykuchus qankunapis Egiptopi waj llajtayoj jinallataj tiyakorqankichej.#Ex 22.21; Dt 24.17-18; 27.19. Noqa Tata Diosmin Diosniykichej kani.
35Justiciataqa maychus kajta ruwankichej. Chimpuspa, tupuspa, chayrí imatapis vendespa, ama q'otiyankichejchu. 36Balanzaykichej, pesanaykichej romana, chantá chimpuykichejpis cabal kanan tiyan.#Dt 25.13-15; Pr 20.10; Ez 45.10; Am 8.5; Miq 6.11. Noqa Tata Diosmin Diosniykichej kani, pichus qankunata Egiptomanta orqhomusorqachej, chay.
37Ajinaqa tukuy kamachisqayta, imatachus nisqaytapis kasuspa, ruwaychej. Noqamin Tata Dios kani, nispa.
Currently Selected:
Levítico 19: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
