Levítico 16
16
Jucha pampachana p'unchay
1Aaronpata iskaynin churinkuna Tata Diospa ñawpaqenman anchata qayllaykusqankurayku wañorqanku. Chay qhepata, Tata Dios Moiseswan parlarqa. 2Chantá Tata Dios Moisesta nerqa: Wawqeyki Aaronta niy ama mayk'ajllapis veloj wasanpi kashan,#Heb 6.19. chay Diosllapaj T'aqasqa nisqa cheqaman yaykunanta. Nillataj Diospa arcanpata kirpananpa ñawpaqenman chimpananchu tiyan. Sichus yaykunman chayqa, wañonqa imaraykuchus arcaj kirpananpi noqa, phuyupi rikuchikusaj.
3Aaronqa Diosllapaj T'aqasqa nisqa cheqaman yaykunan tiyan, jucha pampachasqa kananpaj jaywananpaj, uj torillowan, chantá q'olachispa Diosman jaywananpaj uj carnerowan ima.#Heb 9.7. 4Ñawpajta Aaronqa tukuy ukhunta yakuwan mayllakuytawan, sacerdote p'achanta churakonqa: Linomanta ruwasqa p'achata, calzoncillota, chumpitawan. Umanmanpis linomanta ruwasqa chhoqo ch'uluta churakonqa. Chaykunaqa Diospaj t'aqasqa p'acha kanku.#16.4 Jucha pampachana p'unchaypi kuraj kaj sacerdoteqa mana raymipi p'achachakun jinatachu p'achallikunan karqa. Ex 28. Maychus chayllata p'achallikunan karqa, imaraykuchus jucha pampachana p'unchayqa juchasapa kasqankumanta llakikuna p'unchay karqa. 5Aaronqa israelitakunaj juchanku pampachasqa kananpaj Diosman jaywananpaj, paykunamanta iskay chivota jap'enqa. Q'olachispa Diosman jaywananpajtaj uj carnerota jap'illanqataj.
6Chantá Aaronqa chay torillota ñak'aspa, Tata Diosman jaywanqa paypa juchan, jinataj ayllunpa juchan pampachasqa kananpaj. 7Chaymantataj iskay chivota jap'ispa, Tata Diosman apamonqa Dioswan Tinkukuna Toldo punkuman. 8Jinaspataj, Aaronqa chivokunawan imatachus ruwananta yachananpaj, suerteta choqanqa. Ujnin kajqa Tata Diospaj kanqa, ujnin kajtaj Azazelpaj.#16.8 Azazel: Ima niytachus mana sut'ita yachakunchu. Wakin ninku uj supaypa sutin kasqanta. Ñawpa runakuna yuyaj kasqanku Azazelqa ch'innejpi kawsasqanta. Mana ninchu uywata ñak'aspa Azazelman jaywasqankuta, imaraykuchus chivota kawsashajta ch'innejpi kacharparej kanku. 9Chantá Aaronqa suertepi Tata Diospaj llojsej chivota ñak'aspa, jucha pampachasqa kananpaj Tata Diosman jaywanqa. 10Mayqen chivochus suertepi Azazelpaj llojserqa chaytarí, kawsashajta Tata Diospa ñawpaqenman apanqa, jucha pampachasqa kananta tarinanpaj. Chaymantataj chay chivota ch'innejman apaspa, Azazelpaj kachariponqa.
11Chantá Aaronqa paypa juchan, chantá ayllunpa juchan pampachasqa kananpaj torillota ñak'aspa, Tata Diosman jaywanqa. 12Chaymantaqa incienso q'oshñichinata jap'ispa, Tata Diospa ñawpaqenpi kashan, chay altarmanta nina k'ajata churanqa. Jinallataj sumaj incienso kutasqamanta iskay pojtuta churaspa, veloj wasanman apanqa.#16.12 Veloj wasanman: Kuraj kaj sacerdote Diosllapaj T'aqasqa Cheqaman yaykunan, jucha pampachana p'unchaypi imachus ruwanamanta aswan karqa. Kuraj kaj sacerdote Diosllapaj T'aqasqa Cheqaman yaykunanta maypaj qhawarqanku, imajtinchus jucha pampachana p'unchaylla chayman yaykoj. Ex 26.31-35. 13Chantá Tata Diospa ñawpaqenpi ninaman inciensota jich'aykonqa. Inciensoj q'oshñintaj Diospa trato ruwasqan arcaj kirpananta p'ampaykonqa. Ajinata ruwaspa Aarón mana wañonqachu. 14Chaymantaqa torilloj yawarninmanta uj chhikata jap'ispa, arcaj kirpananta inti llojsimuynej ladota ruk'ananwan ch'ajchonqa. Chantá kirpanaj ñawpaqenta ruk'ananwan qanchis kutita yawarwan ch'ajchullanqataj.
15Chaymantataj tukuy israelitakunaj juchanku pampachasqa kananpaj chivotañataj ñak'anqa. Chantá chivoj yawarninta veloj wasannejman apanqa. Chay ukhupitaj kirpanaj patanta, ñawpaqentawan ch'ajchonqa, imaynatachus torilloj yawarninwan ruwarqa, ajinata. 16Ajinata Diosta yupaychana cheqata llimphuchanqa israelitakunaj tukuy mana allinta ruwasqankumanta, mana uyarikoj kasqankumanta, juchankumantawan ima. Ajinallatataj Aaronqa Dioswan Tinkukuna Toldotapis llimphuchanqa, ch'ichichakoj israelitakunaj chawpinpi kasqanrayku.
17Aarón jucha pampachasqa kananta mañaspa, Dioswan Tinkukuna Toldo ukhupi kanankama, chantá chaymanta llojsimunankamaqa mana pipis Dioswan Tinkukuna Toldo ukhupi kanqachu. Chaypi paypa juchan, ayllunpa juchan, chantá tukuy israelitakunaj juchanku pampachasqa kananpaj imachus ruwanata junt'anqa. 18Chaymantataj llojsimonqa Tata Diospa ñawpaqenpi kashan, chay altarta llimphuchananpaj. Chantá torillojta, jinallataj chivojtapis uj chhika yawarninta apaspa, chaywan altarpa wajrankunata, chantá altarpa muyuyninta ima jawenqa. 19Jinaspataj, altarta yawarwan qanchis kutita ch'ajchonqa. Ajinamanta altarta israelitakunaj juchallispa ch'ichichasqankumanta llimphuchaspa, Diospaj t'aqanqa.
20Chantá Aarón Diosllapaj T'aqasqa nisqa cheqata, Dioswan Tinkukuna Toldota, altarta ima llimphuchayta tukuspa, kawsashajllaraj chivota apachimonqa. 21Chaymantataj chivoj umanman makinta churaspa, israelitakunaj tukuy juchallisqankuta, Diospa contranpi oqharikusqankuta, tukuy ima millay ruwasqankutawan Diosman rimarenqa. Ajinata ruwaspa, israelitakunaj juchankuta chivoman chajnaykonqa. Chaymantataj chay chivota ch'innejpi kacharparinanpaj uj runawan qhatichenqa. 22Ajinata chivoqa israelitakunaj tukuy juchankuta ch'inman apanqa.
23Chantá Aaronqa Dioswan Tinkukuna Toldoman yaykuspa, Diosllapaj T'aqasqa nisqa cheqaman yaykunanpaj, linomanta ruwasqa p'acha churakusqanta lluch'ukonqa. Chaytataj Dioswan Tinkukuna Toldopi saqenqa. 24Jinaspataj, Diospaj T'aqasqa Cheqapi yakuwan mayllakuspa, waj p'achata churaykukuytawan llojsimonqa. Chantá payrayku, jinataj tukuy israelitakunarayku jaywanata q'olachispa Tata Diosman jaywanqa. Ajinata ruwaspa, paypa juchan, chantá israelitakunaj juchankupis pampachasqa kananta tarenqa. 25Chay jawa jucharayku jaywanapaj ñak'asqa uywaj wiranta altarpi q'olachenqa. 26Pichus Azazelpaj ch'in pampaman kacharparinanpaj chivota aparqa, chay runaqa p'achanta t'ajsakonqa, chantá ukhunta yakuwan mayllakonqa. Chaymantaraj jaraman yaykupuyta atenqa.
27Chaymantataj jucha pampachasqa kananpaj ñak'asqa torillota, chivota ima jaramanta jawaman orqhonqanku,#Heb 13.11. chantá qaranta, aychanta, wanunta ima ruphachenqanku. Chay ñak'asqa uywakunaj yawarninkutataj Diosllapaj T'aqasqa Cheqaman apanqanku, jucha pampachasqa kananpaj. 28Pichus chaykunata ruphachimojqa p'achanta t'ajsakunan tiyan, ukhuntapis mayllakunallantaj tiyan. Chaymantaraj jaraman kutipuyta atenqa.
29Kay kamachisqaqa qankunapaj wiñaypaj kanqa: Qanchis kaj killapi,#16.29 Qanchis kaj killaj sutin Tisrí karqa. Tisrí killapi, chunka p'unchayta israelitakuna ayunananku karqa. Is 58.1-12. chunka kaj p'unchaypi ayunankichej.Chay p'unchayqa ama ni ima ruwanaykichejta ruwankichejchu, ni kikin llajtayoj, nitaj qankunawan tiyakoj waj llajtayojkunapis. 30Chay p'unchayqa noqa Tata Dios tukuy juchaykichejta pampachasaj.#Lv 23.26-32; Nm 29.7-11. Jinamanta qankunaqa Tata Diospa ñawpaqenpi juchaykichejmanta llimphuchasqa kankichej. 31Kay kamachisqaqa wiñaypaj kanqa. Chay p'unchay qankunapaj samarina p'unchay kanqa. Chay p'unchaytaj ayunankichej. 32Sacerdote kananpaj aceitewan jawisqa kaj, pichus tatanpa cuentanmanta kuraj kaj sacerdote kananpaj churasqa kanqa chaylla, jucha pampachasqa kananpaj kay imakunata ruwanqa. Payqa Diospaj t'aqasqa linomanta ruwasqa p'achata churakonqa. 33Chantá Diosllapaj T'aqasqa nisqa cheqata llimphuchanqa, jinallataj Dioswan Tinkukuna Toldota, altartapis. Jinallataj sacerdotekunaj juchanku, chantá tukuy israelitakunaj juchanku pampachasqa kananpaj, Diosman jaywanqa.
34Kay kamachisqaqa qankunapaj wiñaypaj kanqa: Watapi uj kutita, tukuy israelitakunaj juchallisqanku pampachasqa kananpaj, Tata Diosman uywata ñak'aspa jaywankichej.
Ajinaqa Moisés tukuy imata ruwarqa Tata Dios kamachisqanman jina.
Currently Selected:
Levítico 16: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
