Roma 16

Petabe

1Ante suraku hitu, kupopaisani ka komiu i Febe, sampesuvuta sampomparasaya. Ia sampesuvuta mombine anu nantulungi pakeni ntodea topomparasaya ri ngata Kengkrea. 2Kuperapi komiu mantarima ia sabana pomparasayana i Pue Yesus, apa ivesia mamimo kita todea nu Alatala masipato mantarima roata sampomparasaya. Ane maria anu niparaluuna, tulungimo ia, sabana ia mboto nadea tona nitulungina, yakumo hii saito.

3Pakavote tabeku ka i Priskila bo i Akwila. Ira njamboko roaku sampokarajaa nanggeni Kareba Belo i Yesus Kristus. 4Ira sakidepa namate nantulungi yaku. Yaku nosukuru nte ira, bo ledo aga yaku, tapi pura-pura todea topomparasaya anu ledo toYahudi. 5Pakavote muni tabeku ka todea topomparasaya anu nodade ri banuara.

Pakavote tabeku ka i Epenetus nipotoveku. Iamo tona paratama nomparasaya i Yesus Kristus ri propinsi Asia. 6Bo pakavote muni tabeku ka i Maria. Ia nokarajaa ntamo ka komiu. 7Pakavote tabeku ka i Andronikus bo i Yunias, sampesuvuku toYahudi. Ira muni nitarunggu nosanggani-nggani ante yaku bara ipia. Pura-pura suro i Yesus nombabila ira. Dopame yaku nomparasaya i Yesus, lave nomparasayamo ira.

8Pakavote tabeku ka i Ampliatus anu nipotoveku, apa kami randua nosangu rara nte Tupu. 9Pakavote tabeku ka i Urbanus, roata sampokarajaa nompatolele Kareba i Kristus. Bo pakavote tabeku ka i Stakhis nipotoveku. 10Pakavote tabeku ka i Apeles. Nadea kasusa nirasaina, tapi ia bate-batena nangoseaka i Kristus. Bo pakavote tabeku ka gi Aristobulus sambanua. 11Pakavote tabeku ka i Herodion, roaku toYahudi, bo muni ka sampesuvuku sampomparasaya ri banua i Narkisus.

12Pakavote muni tabeku ka i Trifena bo i Trifosa. Randua mombine haitu nokarajaa ntamo ka Tupu. Bo pakavote tabeku ka i Persis anu nipotoveta. Ia muni mombine anu nokarajaa ntamo ka Tupu. 13Pakavote tabeku ka i Rufus anu nipelisi nTupu, bo nitoiya ntona. Bo pakavote muni tabeku ka tinana anu nirekeku tinaku muni. 14Pakavote tabeku ka i Asinkritus, i Flegon, i Hermes, i Patrobas, i Hermas bo pura-pura sampesuvu sampomparasaya anu nosanggani-nggani nte ira. 15Pakavote tabeku ka i Filologus bo i Yulia, i Nereus bo sampesuvuna mombine, bo ka i Olimpas bo ka pura-pura topomparasaya nosanggani-nggani nte ira.

16Posipakavotemo tabe ante mpuu-mpuu rara, mpo sampesuvu sampomparasaya i Kristus. Pura-pura topomparasaya i Kristus ri sii nompakavote tabera ka komiu muni.

Pepatuduki kaupuna

17Sampesuvu-sampesuvuku, kuperapi ante mpuu-mpuu ala komiu mainga nte tona anu nompoposibali todea topomparasaya bo madota mompakanavu komiu ante pepatuduki anu nangeva pepatuduki nakana nipatuduki ka komiu. Tumo mosimporoa ante tona ivehaitu! 18Sabana, tona nokainggu ivehaitu ledo nokarajaa ka Tuputa i Kristus, tapi aga nangoseaka dotara mboto. Tona dopa nisanina belo pepatuduki nakana, nibagiura ante tesa-tesara napande bo namomi.

19Komiu, nisani ntona ri umba-umba komiu naroo nangoseaka pepatuduki lako nte Alatala. Haitumo sampe yaku nadamba nompekirika komiu. Tapi yaku madota ala komiu mapande mangisani anu nabelo, tapi nee mpuu mapande mangisani anu nadaa. 20Kuperapi Alatala, anu nombadekei katuvua nabelo, masalisa mompakaropu kuasa Magau nu Seta bo radekeiNa ka komiu kuasa mombadagina. Kuperapi kabelo rara nTuputa Yesus Kristus bate-batena maria nte komiu.

21I Timotius, roaku sampokarajaa nompakavote tabe ka komiu. Ivesia muni i Lukius, i Yason bo i Sosipater, roa-roaku toYahudi.

22Yaku, i Tertius, nipopale i Paulus notulisi sura hitu. Yaku sampesuvumiu sampomparasaya bo yaku muni nompakavote tabeku ka komiu pura-pura.

23Tarima muni tabe lako nte i Gayus. Yaku i Paulus, nipalogana nonturo ri banuana, bo topomparasaya ri sii muni biasa nasiromu nodade ri banuana. Tarimamo tabe lako nte i Erastus, topompasiayu doi ri ngata hitu. Bo tarima muni tabe lako nte sampesuvuta i Kwartus. 24[Kuperapi Tuputa Yesus Kristus bate-batena mabelo nte komiu pura-pura. Amin.]

Dade pombatoiya Alatala

25Ratoiyata Alatala! Ia nakuasa mompakaroso pomparasayamiu mpo niuli ri Kareba Belo nipatoleleku, haitumo kareba i Yesus Kristus. Kareba i Kristus haitumo nia nu Alatala anu nitabuniakaNa lako ri lamba pamulana. 26Tapi ri tempo sii-sii, nia haitu nipopaisani ka kita riara buku nitulisi nu nabi-nabi nggaulu. Bo Alatala anu natuvu sampe ri kasae-saena, nantudu ala niaNa haitu rapopaisani ka tona ri umba-umba ala pura-pura manusia mamala momparasaya bo matundu nte i Kristus. 27Iamo Alatala anu nangisani pura-pura! Ledo ria simbayuNa! Ia masipato ratoiyata sampe ri kasae-saena ante petulungi i Yesus Kristus. Amin.

Currently Selected:

Roma 16: TLEDOV

Highlight

Copy