Efesus 4

Topomparasaya kana masintuvu

1Jadi sampesuvu-sampesuvu, sabana haitu pura-pura, siimo petevai lako nte yaku anu nitarunggu ri sii sabana pomparasayaku i Pue Yesus. Yaku mpuu-mpuu nerapi ala komiu matuvu ante pokainggu masipato ka todea nu Alatala, apa komiu nipokioNa majadi todeaNa. 2Komiu kana matuvu ante ede rara. Komiu kana malusu raramiu, bo kana mandoe posabaramiu. Nee makodi raramiu nte roa, tapi positulungimo sabana tovemiu. 3Pasimbukumo ante mpuu-mpuu raramiu matuvu mosinggabelo. Nosa Gasa nu Alatala nompopakasangu kita pura-pura, jadi kita kana mombajagai kasintuvuta haitu. 4Pura-pura kita topomparasaya i Kristus najadi sangu karo i Kristus. Bo sangu Nosa Gasa nu Alatala anu naria riara ntaita pura-pura. Ivesia muni panjarumakata aga sangu, haitumo kita pura-pura nipokio nu Alatala matuvu mosanggani-nggani nte Ia sampe ri kasae-saena. 5Aga i Yesus saitoNa Tuputa, bo aga sangu pomparasayata. Ivesia muni aga sangu patujuta nidiu, haitumo, rapopakitata kita topangoseaka i Kristus. 6Aga saito Alatala, Tuamata pura-pura. Iamo nomparenta pura-pura, bo Iamo nompake kita pura-pura, bo Iamo nonturo riara ntaita pura-pura.

7Tapi nau nadea kasimbayuta, pompakule nidekei nu Alatala ka kita ledo nasimbayu, sabana kita saito-saito nidekeika pompakule mokarajaa ka i Kristus nangoseaka anu nipakatantuNa ka kita. 8Naria nitulisi riara Buku Gasa anu nombaboto pompakule haitu ivei:

“Tempo Ia neore hau ri ponturo ri kalangana,

Nadea tona nitavani nikeniNa.#4:8 Nadea tona nitavani nikenina. Tempo nggaulu ane magau nanjili lako ri posieva, nipopakitana tona nitavani ala rasani ntodea ia mpuu-mpuu padagi.

Bo Ia nompalele pedekei-pedekei ka manusia.”

Mazmur 68:19

9Nuapa batuana tesa-tesa haitu? Ane Ia neore hau ri ponturo ri kalangana, natantu dopame Ia neore, Ia nanau ri ponturo ri tambena ntotomo, haitumo, ri dunia hitu.#4:9 nanau ri ponturo ri tambena ntotomo, haitumo, ri dunia hitu. Tafsiran ntanina: nanau ri ponturo ri tambena ntoto, haitumo, ri tambe ntana ri ponturo ntomate. 10Bo i Kristus anu nanau haitu, Ia muni neore hau ri ponturo anu nalangapa pade pura-pura anu ntanina ri langi, ala Ia mamala maria ri umba-umba. 11Iamo nompalele pedekei-pedekei ka kita. Sanu nidekeikaNa pompakule majadi suro, sanu nidekeikaNa pompakule majadi nabi anu mompasimbayu tesa nitarimana lako nte Alatala. Sanu muni nidekeikaNa pompakule majadi topompatolele Kareba Belo, bo ntanina nidekeikaNa pompakule manggeniaka bo mompatuduki todea topomparasaya. 12NipaleleNa pedekei haitu ala kita todea nu Alatala rapakagana ala rapakuleta mantui pokarajaa nu Alatala. PatujuNa muni ala kita anu najadi karo i Kristus mantambai karosota, 13sampe kaupuna kita pura-pura mpuu-mpuu mosangu rara sabana kita nomparasaya Ana nu Alatala bo mpuu-mpuu nosisani nte Ia. Bo kita pura-pura mantambai manoto, bo pomparasayata mantambai maroso sampe domo makura nuapa-nuapa. Bo kita majadi nasimbayu mpo i Kristus mboto, nanoto bo naroso. 14Ane ivesia kita, kita domo mpo ngana anu ledo nakaja rabagiu, atau sakaya kodi nitompesaka nu balumba bo nikeni nu poiri hau tumai. Kita domo aga rataja hau tumai mangoseaka mpengaya-ngaya pepatuduki anu ledo nakana, bo domo kaliu-liu momparasaya tesa-tesa ntopebagiu anu natau gaga nodava, dava nipoviara mboto. Patujura, mompakasalandala kita. 15Tapi kita kana mpuu-mpuu matuvu mangoseaka pepatuduki nakana bo kita kana mosimpotove. Ivesiamo mantambai karoso pomparasayata bo mantambai kanotota sampe kita majadi nasimbayu nte i Kristus.

I Kristus haitu, nirapaka Balenggata 16bo kita todea topomparasaya nirapaka sipa nu karoNa. Ri karo manusia sipa nu karo nikuasai nu balengga. Sipa-sipa haitu niposidumpa pakabelo-belo bo niposiumpu ante uva ala majadi sangu karo. Bo ane pura-pura sipa haitu mokarajaa mangoseaka pompakule nidekei ka ia, njumangu karo haitu matuvu mabelo bo mantambai maroso. Ivesia muni kita topomparasaya. Kita pura-pura nosangu rara nte i Kristus bo Ia nompopakasangu kita. Jadi ane kita mosimpotove bo mositulungi, mantambai kabelona kasintuvuta bo karoso pangoseakata i Pue.

Topomparasaya i Kristus kana mombakabasaka katuvu njae bo mangoseaka katuvu nabaru

17Jadi sampesuvu-sampesuvu, ante kuasa nidekei nTupu ka yaku, kuuli ka komiu, tumo matuvu mpo tona ledo nosisani ante Alatala! Ira aga nompekirika anu ledo ria gunana, 18bo ledo nipahara nuapa-nuapa. Katuvu nabaru lako nte Alatala ledo naria nte ira sabana ledo ntoto nisanira pepatuduki nakana anu notesaki Alatala. Ledo nisanira sabana nakaa bagara. 19Domo nisanira naeya sampe ira aga natuvu nangoseaka mpengaya-ngaya dota rarara nadaa. Nipodambara novia anu ledo masipato rapovia bo ledo ria rekera.

20Tapi ledo pokainggu ivehaitu nipatuduki i Kristus ka komiu. 21Niepemiumo karebaNa, bo komiu nosangu rara nte Ia, jadi natantu komiu nipatudukika pepatuduki nakana anu notesaki i Yesus. 22Haitumo, komiu nipatuduki mombakabasaka katuvu njaemiu ante pokainggu nituntunimiu tempo komiu dopa nomparasaya i Yesus. Dota rara nadaa nituntunimiu tempo haitu nombabagiu komiu bo nompakagero katuvumiu. 23Kana rakabasakamiu pokainggu njae haitu ala pekirimiu bo rara ntaimiu rapakabaru. 24Komiu kana matuvu mpo manusia nabaru anu nipajadi nu Alatala nangoseaka ingguNa mboto anu nanoa bo mpuu-mpuu nagasa.

25Sampesuvu pura-pura, kita nipatuduki mokainggu manoa bo magasa, jadi tumo modava! Kita kana motesa makana ka sampesuvuta sampomparasaya apa kita pura-pura sipa nu karo i Kristus. 26Ane marau komiu, nee sampe rau raramiu mompakanavu komiu riara dosa. Nee mombaboli rau rara sampe masolo eo, 27ala ledo maria loga nu Magau Seta mesua riara nggatuvumiu. 28Topangangga kana menonto mangangga. Ira kana mokarajaa ante palera mboto mompaelo katuvura ala mamala ira mantulungi tona ntanina napepa.

29Sampesuvu-sampesuvu, ane komiu motesa, nee rasovadakamiu tesa nadaa tapi sovadakamo tesa-tesa masipato, anu mombatulungi bo mompakaroso rara ntona ntanina. Tesa-tesa ivehaitu manggeni belo ka topangepena. 30Jadi, nee rapoviamiu anu mompakabuku rara Nosa Gasa nu Alatala. Toramo! Alatala nombadekei Nosa Gasa ka kita, tandana kita najadi todeaNa. Bo Nosa GasaNa haitu muni najadi panggingisita ala rasanita kita mpuu-mpuu rakabasaka lako ri dunia nadaa hitu ngena. 31Pakalipomo pura-pura dua rara. Nee magigi rara bo nee momboli rau rara. Nee mosipongare-ngare mosipakadaaka tesa bo nee mositunturaka. Nee mavuu matamiu nte roa. 32Tapi kana mabelo raramiu nte roa bo mosipoasi mata. Komiu kana mosiampungi, nasimbayu mpo Alatala nombaampungi komiu sabana komiu nosangu rara nte i Kristus.

Currently Selected:

Efesus 4: TLEDOV

Highlight

Copy

Compare