Suro-Suro 8

1I Saulus nadamba apa i Stefanus nipatesira.

I Saulus nompandasa topangoseaka i Yesus

Nompamula eo haitu todea topangoseaka i Yesus ri ngata Yerusalem mpuu-mpuu nipandasa ntoYahudi sampe ira nasimpotare hau ri njumangu ngata ri bagia Yudea bo Samaria. Aga suro-suro i Yesus ledo nalai. 2Tona natundu nte Alatala nombatana i Stefanus ri dayo, bo nombatangisi ia ante nasusa mpuu rarara.

3I Saulus nompasimbuku njuu mompandasa topangoseaka i Yesus ala domo raparasayara i Yesus. Nipebutuna banuara nipesuana bo isema-sema nomparasaya i Yesus, langgai bo mombine, niumbunjaina ri savalikuna bo nisuarakana riara ntarunggu.

Kareba Belo lako nte Alatala nipatolele ri bagia Samaria

4Topomparasaya nasimpotare haitu, nompatolele kareba lako nte Alatala ri umba-umba. 5Saito ira nosanga i Filipus. Ia hau ri ngata Samaria bo nipatolelena ka tona hamai i Yesusmo Magau Topepakasalama anu nijanji nu Alatala. 6Tempo todea nangepe i Filipus notesa bo nikitara kabaraka-kabaraka nipoviana, nipariarara mpuumo anu nitesana haitu. 7Apa nadea seta nipopalaina lako nte tona. Seta-seta haitu nesuvu bo nongare-ngare. Nadea muni tona nakoyo, tona nakejo, bo tona napunggu nipakabelona. 8Jadi nadamba mpuumo rara ntona ri ngata Samaria.

9Ri ngata haitu naria saito toposibalimata nosanga i Simon. Bara sakuya kasaena ia nompopokumaa todea ri ngata Samaria sabana poviana. Bo niulina iamo tona nabaraka. 10Pura-pura tona ri ngata haitu, tomaoge bo tona biasa, nompariara tesana. Niulira, “I Simon mai naria baraka ntupu anu niuli ‘Baraka Oge’!” 11Nasae mpuumo ia nompopokumaa ira ante posibalimatana sampe ira pura-pura nompariara ia. 12Tapi i Filipus nompatolele Kareba Belo ka ira. Kareba Belo haitu nanguli Poparenta nu Alatala bo i Yesus Kristus, Magau Topepakasalama. Niparasayaramo kareba haitu bo ira nidiumo, langgai bo mombine, tandana ira nomparasaya i Yesus. 13I Simon mboto nomparasaya, bo naupu ia nidiu, nituntunina njuumo i Filipus. Nokumaa mpuu ia nanggita kabaraka-kabaraka bo tanda-tanda nipokumaaka nipovia i Filipus.

14Suro-suro ri ngata Yerusalem nangepe kareba tona ri ngata Samaria nantarima tesa nu Alatalamo. Jadi nitudura i Petrus bo i Yohanes hau ri Samaria. 15Tempo i Petrus bo Yohanes nakava hamai, niposambayakara toSamaria anu nomparasaya i Yesus ala Nosa Gasa nu Alatala manau nte ira. 16Apa Nosa Gasa nu Alatala dopa nanau mombakuasai ira. Ira aga nidiu, tandana ira nomparasaya i Pue Yesus. 17Jadi, i Petrus bo i Yohanes nombadika palera ri balengga ntoSamaria haitu bo Nosa Gasa nanau nte ira mpuu.

18Nikita i Simon suro-suro nombadika palera ri balengga ntona haitu bo Nosa Gasa nombakuasai ira. Jadi nikeninamo doi ka i Petrus bo Yohanes apa ia madota mangali kabaraka haitu. 19Niulina, “Dekei ka yaku muni kuasa tutu ala yaku muni mamala mombadika paleku ri balengga ntona sampe ira rakuasai Nosa Gasa nu Alatala.”

20Tapi nesana i Petrus, “Masurukavu mpuu iko bo doimu! Nisarumakamu kabaraka nidekei nu Alatala mamala raali ante doi? 21Iko ledo ntoto masipato metuntuni riara pokarajaa kami hitu, sabana raramu ledo nanoa ri panggita nu Alatala. 22-23Nisaniku iko tu nasiriati bo iko nipobatua dosa! Jadi, kajeamo lako ri patujumu nadaa, bo perapimo nte i Pue ala raampungiNa pekirimu nadaa tutu!”

24Nanguli i Simon, “Ai! Tulungi posambayakamiu yaku, perapi nte i Pue ala anu niulimiu tutu ledo mambela yaku.”

25Naupu i Petrus bo Yohanes nosabi bo nompatolele tesa i Pue ka todea, nanjilimo ira hau ri ngata Yerusalem. Bo riara polipara haitu nipatolelera Kareba Belo ri ngata dea ri bagia Samaria.

I Filipus ante toEtiopia

26Naria malaeka nu Alatala nakava nangulika i Filipus, “Koimo hau ri puluna sampe mukava dala motua lako ri ngata Yerusalem hau ri ngata Gaza.” (Dala haitu domo nasaro niose.) 27-28Jadi haumo i Filipus.

Tempo haitu naria saito toEtiopia ri dala haitu notua lako ri ngata Yerusalem hau manjili ri ngatana mboto. Ia tona nalanga panggana bo ia nipakakuasa nombaurusi kakalumana i Kandake, Magau Mombine ri tana Etiopia. Tona haitu dako nombasomba Alatala ri ngata Yerusalem bo ia nodoka nanjili hau ri ngatana mboto. Tempo ia nonturo riara dokana, ia nombabaca buku nitulisi Nabi Yesaya nggaulu. 29Jadi Nosa Gasa nanguli ka i Filipus, “Koi ragamo doka ntona hautu.”

30Jadi nangovamo i Filipus hau mantotoaka doka haitu. Niepena tona riara nu doka nombaca buku nitulisi Nabi Yesaya. Jadi nekutanamo i Filipus, “Nisanimiu batuana anu nibacamiu tutu, tua?”

31Nesana toEtiopia, “Berimba kusani ane ledo ria tona mombabatuasina ka yaku?” Pade niunakana i Filipus mesavi ri doka, bo monturo ri sinjorina. 32Hitumo tesa-tesa lako ri buku Nabi Yesaya nibacana haitu:

Ia mpo bimba niumbu rakeni rasambale,

mpo ana bimba ledo nombee nigau buluna.

Ivesia muni ia ledo ntoto ria sambelaa notesa.

33Ia nisalai bo ledo nitangara nanoa.

Ia nasalisa nipatesi

sampe ledo ria mulina mamala ratutura ntona.

Yesaya 53:7-8

34Nanguli toEtiopia haitu ka i Filipus, “Uli kaku isema kakanana niuli Nabi Yesaya tempo nitesana tona nirapaka bimba, karona mboto atau tona ntanina?” 35Jadi, i Filipus nompasimbayu Kareba Belo i Yesus ka tona haitu nompamula lako ri tesa-tesa nibacana pangane.

36Riara polipara haitu, nikitara uve napara dala. Nanguli toEtiopia, “Peintamo! Moitu uve. Mamala yaku radiu sii-sii?”

37[Nesanamo i Filipus, “Ane niparasayamiu mpuu, mamala komiu radiu.”

Nanguli toEtiopia haitu, “Niparasayaku i Yesus Kristus Iamo Ana nu Alatala!”]

38Naliu sia, nipopetaanamo dokana, bo nanaumo ira randua lako ri doka bo hau riara nu uve. ToEtiopia haitu nidiu i Filipusmo, tandana niparasayana i Yesus. 39Nesore ira lako riara nu uve, Nosa Gasa nu Alatala nangala i Filipus lako ri sia bo domo nikita ntoEtiopia. ToEtiopia haitu nompapola polipana bo nadamba mpuu rarana. 40Ledo nisani-sani, nariamo i Filipus ri ngata Asdod. Nipapolana polipana bo nipatolelena Kareba Belo i Yesus ka todea ri pura-pura ngata sampe nakava ri ngata Kaisarea.

Currently Selected:

Suro-Suro 8: TLEDOV

Highlight

Copy