Suro-Suro 20

Polipa i Paulus lako ri propinsi Makedonia hau ri ngata Troas

1Nalinopa kagado ri ngata Efesus, i Paulus nompasiromu topomparasaya ri sia bo notesa nompakaroso rarara. Naupu sia, ia nopalakanamo pade nipapolana polipana hau ri propinsi Makedonia. 2Riara mpolipana, ia nompesayo ngata-ngata ri Makedonia bo nompakaroso rara ntopomparasaya hamai ante mpengaya-ngaya pepangajari. Naupu haitu, napolamo ia hau ri propinsi Akhaya, tana ntoYunani. 3Talu-mbula kasaena ia nonturo ri sia. Naupu sia, ia nonia mesavi kapala ntasi hau ri propinsi Siria. Tapi dopame ia nalai, niepena kareba naria toYahudi ri sia nasintuvu mompatesi ia ri dala. Jadi nipakatantuna manjili mantuntuni dala kabatana moliu ri propinsi Makedonia. 4Naria bara sako-ndua tona nomporoa i Paulus, haitumo, i Sopater ana i Pirus lako ri ngata Berea, i Aristarkhus bo i Sekundus toTesalonika, bo i Gayus lako ri ngata Derbe. Naria muni i Timotius, i Tikhikus bo i Trofimus, lako ri propinsi Asia pura. 5Ira papitu nokolu ka kami bo i Paulus, bo nipopeara ri ngata Troas kami. 6Naupu haitu pade nituntuni kami dala kabatana sampe ri ngata Filipi. Naliutaka eo mbaso ntoYahudi niuli Posusa Roti Ledo Noragi, kami nesavi kapala lako ri ngata Filipi. Lima-mbongi kami ri dala pade nosintomu ante roa-roa kami ri ngata Troas. Jadi kami nonturo ri sia saminggu kasaena.

I Eutikhus nanavu lako ri jendela

7Bongi Aka, kami nasiromu nangande nosanggani-nggani ante topomparasaya ri ngata Troas. I Paulus notesa sampe tanga bongi, apa patujuna maile mpadondona mompapola polipana. 8Tombi nikasiromu kami haitu, ri tombi katatalu-unjuna. Nadea poindo nitunju ri sia. 9Naria saito kabilasa nosanga i Eutikhus nonturo ri pelaba. Naroyo mpuu matana apa i Paulus ledo naupu-upu notesa. Nasae-sae kabilasa haitu namonjomo sampe nanavu lako ri pelaba ntombi katatalu-unjuna haitu hau ri tana. Tona nanau nanganggataka ia, nikavara namatemo. 10Tapi i Paulus nanau hau ri tambena bo nekadungga ntuobo ri bavo kabilasa haitu, pade nikapuina. Nanguli i Paulus ka todea nombatagui tomate haitu, “Nee masusa raramiu, da matuvu ia!” 11Naliu haitu, nompene vai i Paulus hau ri tombi nikasiromura haitu, bo nitubi-tubina roti bo ira nangande nosanggani-nggani. Naupu nangande, notesa vaimo ia sampe naeo. Naupu haitu nalaimo ia. 12Kabilasa namate nanavu haitu, natuvumo bo nikeni nu roana manjili ri banuana, bo nadamba mpuumo rarara pura-pura.

Polipa i Paulus lako ri ngata Troas hau ri ngata Miletus

13Kami nesavi kapala mbaso bo nokolu hau ri ngata Asos mosinggavaka i Paulus sumai. Nipakatantu i Paulus ivesia, apa ia madota modala ri kabatana. 14Nosinggavapa kami ante i Paulus ri ngata Asos, nesavi kapala sangganimo kami pura-pura hau ri ngata Metilene. 15Lako ri sia nokapala vaimo kami, bo kamailena nakavamo ri tana nosinjambote nte levuto Khios. Bo kamailena vai nakavamo kami ri levuto Samos. Naliu sia, sambongipa nakavamo kami ri ngata Miletus, pesampo nu ngata Efesus. 16Lako ri pamula polipa kami, i Paulus nompakatantu domo ia mesai ri ngata Efesus, ala nee masae gaga ri propinsi Asia. Apa nasara rarana hau mantuntuni eo mbaso Pentakosta ri ngata Yerusalem.

Tesa i Paulus ka pakeni ntopomparasaya lako ri ngata Efesus

17Nakavapa ri ngata Miletus, i Paulus nompakatu kareba hau ri ngata Efesus nompokio pakeni ntopomparasaya sumai, makava mosinggava ante ia ri ngata Miletus. 18Nakavapa ira, nangulimo i Paulus, “Sampesuvu-sampesuvuku! Nisanimiu berimba katuvuku nte komiu, lako ri kakavaku pamulana ri propinsi Asia hitu sampe sii-sii. 19Yaku nokarajaa ri sii ka i Pue Yesus ante ede raraku bo nadea uve mataku. Nadea susa bo pari nirasaiku, sabana toYahudi nonia mompatesi yaku. 20Nisanimiu ledo nakaja raraku nompasimbayu anu noguna ka komiu. Yaku batena nompatuduki komiu ri kasiromu ntodea, bo ri banua-banuamiu. 21Yaku nasaro nompainga komiu pura-pura, toYahudi bo tona ledo toYahudi, ala komiu majea lako ri dosamiu bo matundu nte Alatala bo momparasaya Tuputa Yesus.

22Hitupa yaku hau ri ngata Yerusalem nangoseaka parenta Nosa Gasa nu Alatala ka yaku. Dopa nisaniku nuapa pura majadi nte yaku hamai. 23Aga nisaniku ri umba-umba ngata nikalauku, Nosa Gasa nompopaisani ka yaku, yaku rasuaraka riara ntarunggu bo mombarasai kasusa bo kapari ri ngata Yerusalem. 24Tapi ledo kupotove katuvuku hitu. Nau yaku mpuu-mpuu rapatesi, ledo makuya, asaa kupakaupu pokarajaa nidekei i Pue Yesus ka yaku mompatolele Kareba Belo anu nombatesa kabelo nu Alatala nte kita.

25Sampesuvu-sampesuvuku. Nitunggaikumo komiu bo nipatudukikumo Poparenta nu Alatala ka komiu pura-pura. Bo sii-sii nisaniku domo rakitamiu hanupa lenjeku. 26Jadi eo hitu kuuli ka komiu ante raraku mpuu-mpuu, ane rapana maria komiu rapopogaa lako nte Alatala sampe ri kasae-saena, salamiu mboto. 27Apa, ledo nasau raraku nompatuduki ka komiu, pura-pura nia nu Alatala ka kita. 28Komiu kana mombajagai karomiu mboto. Jagai muni todea topomparasaya, anu niparasayaka Nosa Gasa ka komiu. Komiu kana mompiara todea nu Alatala, nasimbayu mpo topoevu nompiara bimbana. Apa Tuputa Yesus namate bo raaNa natiti mombasompo dosata ala kita majadi todeaNa. 29Nisaniku malai yaku lako ri sii, kana makava tona nadaa anu mompakasusa todea anu nipiaramiu, nasimbayu mpo asulaku makava mombabaga bimba. 30Lako nte komiu mboto meumba tona mompatuduki anu ledo nakana. Rapoviara ivesia ala topangoseaka i Yesus domo mangoseaka dala nakana, tapi mangoseaka iramo. 31Jadi komiu kana mainga! Toramo, sampesuvu-sampesuvuku. Talu-mpae kasaena, eo bongi yaku ledo nenonto nompatuduki bo nompainga komiu saito-saito, bo nadea uve mataku natiti.

32Jadi sampesuvu-sampesuvuku, hitupa yaku nekakai nte Alatala nerapi Iamo mombajagai komiu. Bo kuuli ka komiu, oseakamo tesa nu Alatala anu nompopaisani kabelo nu Alatala ka kita. Aga Iamo nakuasa mompakaroso pomparasayamiu bo mombadekei belo ka komiu, haitumo belo nipakasadiaNa ka tona nipelisiNa majadi todeaNa.

33Ledo ria sanggania nario mataku ka doi bara ka pakea ntona. 34Nisanimiu mboto yaku nokarajaa ante paleku mboto ala kuali mboto anu niparaluuku bo anu niparaluu roa-roaku. 35Riara mpengaya-ngaya, katuvuaku najadi jonjo ka komiu, haitumo, kita kana mokarajaa ala rapakuleta mombatulungi tona ledo nompakule nokarajaa. Kita kana mompariara tesa i Pue Yesus anu nanguli: ‘Nadambapa tona nombadekei pade tona nantarima.’ ”

36Naupupa i Paulus notesa, nantaputumo ia nosanggani-nggani ante pura-pura ira lako ri ngata Efesus bo nosambaya. 37Notumangi puramo ira. Nikapuira i Paulus bo niekira, mpo tona nosampesuvu mogaa. 38Nabuku mpuu rarara, sabana i Paulus nanguli ka ira, “Domo rakitamiu hanupa lenjeku!” Naliutaka sia, nikenira kami sampe ri kapala.

Currently Selected:

Suro-Suro 20: TLEDOV

Highlight

Copy