Suro-Suro 17

I Paulus bo i Silas ri ngata Tesalonika

1I Paulus bo i Silas nompapola polipara noliu ri ngata Amfipolis bo ngata Apolonia sampe nakava ri ngata Tesalonika. Ri sia naria banua petupu ntoYahudi. 2Jadi i Paulus hau ri banua petupu haitu nangoseaka kabiasana bo nosinjula pekiri ante tona nasiromu ri sia. Talu-minggu nosunju-sunju ri eo penonto, ia notesa isi Buku Gasa ka ira. 3Lako ri Buku Gasa, nipopakitana ka ira bo nitenteina ka ira Magau Topepakasalama anu nijanji nu Alatala kana rapandasa bo rapatesi, bo matuvu mpanjili lako ri kamateNa. Niulina, “I Yesus nipatoleleku ka komiu, Iamo Magau Topepakasalama nijanji nu Alatala.” 4Nangepe tesa i Paulus, bara sako-ndua toYahudi nomparasaya tesa haitu bo nantuntuni i Paulus bo i Silas. Ivesia muni toYunani, nadea natundu nte Alatala, bo mombine-mombine naria nturona ri ngata haitu, nadea muni nomparasaya.

5Tapi toYahudi anu ledo nomparasaya i Yesus, nasiriati nanggita i Paulus bo i Silas, sabana nadea mpuu tona nomparasaya tesa i Paulus. Jadi nipasiromura tona aga notondodo-ndodo ri potomu, anu ledo naria pokarajaana. Nadeapa ira nasiromu, hau nipakagadoramo ngata haitu. Nakava ri banua i Yason anu niponturo i Paulus bo i Silas, nisuakira banua haitu rapangala i Paulus bo i Silas. Patujura ala gi Paulus mesuvu mantingayo todea. 6Tapi ledo nikavara i Paulus bo i Silas ri sia. Jadi niumbunjairamo i Yason bo bara sako-ndua topomparasaya ntanina ri sia hau ri ngayo ntopoparenta-topoparenta ngata bo nongare, “I Paulus bo i Silas haitu nompakagado tona ri umba-umba dunia! Sii-sii ira nakava nompakagado ngatata hitu muni! 7I Yason hitu nantarima ira ri banuana. Pura-pura ira topomparasaya nombaliunaka atura-atura nipakatantu Magau Mbaso Roma, apa niulira da nariapa magau ntanina nosanga i Yesus.” 8Nangepe tesara haitu, todea bo topoparenta ngata, nagado. 9Kaupuna i Yason nte roa-roana topomparasaya haitu nipopovaya pade nikabasakaramo.

I Paulus bo i Silas ri ngata Berea

10Bongina haitu topomparasaya ri ngata Tesalonika nantudu i Paulus bo i Silas hau ri ngata Berea. Nakava sumai, hau ira nesua ri banua petupu ntoYahudi. 11Tona ri ngata Berea nabelo rarara, ledo mpo tona ri ngata Tesalonika. Nadamba rarara nangepe kareba i Yesus bo eo-eo niparesara Buku Gasa ala rasanira bara makana tesa i Paulus bara ledo. 12Nadea ira toYahudi nomparasaya i Yesus, bo nadea muni toYunani anu naria nturona, nomparasaya muni, mombine bo langgai.

13ToYahudi ri ngata Tesalonika nangepe i Paulus naria ri ngata Berea nompatolele Tesa nu Alatala. Jadi hau muni ira ri ngata Berea bo nipoviara kagado bo nipakapanera rara ntodea. 14Jadi topomparasaya ri ngata Berea nasalisa nanggeni i Paulus nesuvu lako ri ngata Berea hau ri bivi ntalinti. Tapi i Silas bo i Timotius da naboli ri ngata Berea. 15Tona nanggeni i Paulus, nomporoa ia sampe nakava ri ngata Atena. Naupu sia nanjilimo ira hau ri ngata Berea, nanggeni petevai i Paulus ka i Silas bo i Timotius ala ira masalisa mombatuntuni ia hau ri ngata Atena.

I Paulus ri ngata Atena

16I Paulus da nompopea i Silas bo i Timotius ri ngata Atena, nasusa mpuu rarana nanggita kadea nu pinoito-pinoito nisomba ntoAtena. 17Jadi, ri banua petupu, ia nosinjula tesa ante toYahudi bo tona ntanina anu nombasomba Alatala. Ivesia muni ri potomu, eo-eo ia nosinjula tesa ante isema-sema naria ri sia. 18Nosinjula tesa muni ia nte guru-guru anu nangoseaka pepatuduki i Epikuros bo guru-guru nangoseaka pepatuduki anu niuli Stoa. Bara sako-ndua guru-guru haitu nosisanai ante i Paulus. Naupu sia, naria sanu nanguli, “Nuapa nisani ntona moitu? Pangisanina aga sakide, tapi tesana nadea!” Bo naria tona ntanina nanguli, “Ia bara madota mompopaisani viata-viata nisomba ntosangatana ka kita!” Niulikara ivesia apa i Paulus notesa i Yesus, bo nitesana muni tona natuvu mpanjili lako ri kamatena.

19Jadi nikenira i Paulus hau ri polibu ri Bulu Areopagus. Nakava sumai niulikara ia, “Kami hii madota mangepe pepatuduki nabaru anu nipatolelemiu 20apa komiu nompatolele pepatuduki ntanina lako ri ntanina anu niepe kami. Jadi kami madota mangisani batuana.” 21(Niulira ivesia apa pura-pura toAtena bo tosangatana anu nonturo ri Atena, nadamba mpuu nonturo-nturo nangepe bo nombajaritai tesa nabaru sampe nabiasa ledo ria tempona nombatui anu santanina.)

22Jadi i Paulus neangga ri ngayo ntopolibu ri Bulu Areopagus haitu bo nanguli, “Heh komiu toAtena! Nikitaku riara mpengaya-ngaya pokainggumiu, komiu mpuu-mpuu noagama. 23Apa tempo yaku nanjayo-njayo riara ngatamiu nikitaku nadea pompakande viata. Bo nikavaku sangu pompakande anu naria nitulisi, ‘Pompakande ka Tupu Ledo Nisani SangaNa.’ Tupu haitu nisombamiu, nau ledo nisanimiu sangaNa. Tupu haitumo kupopaisani ka komiu ri sii.

24Alatala nompajadi dunia bo pura-pura isina. Iamo Tupu nu langi bo tana. Bo Ia ledo nonturo ri banua pesomba nipovia nu manusia. 25Ia ledo muni paraluu petulungi nu manusia, sabana Iamo nombadekei katuvuta bo nosata bo pura-pura niparaluuta. 26Lako ri saito manusia nipopomuliNa pura-pura todea ri dunia bo nituduNa ira hau monturo ri njumangu dunia. Lako ri pantepuuna nipakatantuNa ngata mbana raponturora, bo nipakatantuNa kasaena ira matuvu ri ngata haitu. 27Alatala novia ivesia ala kita manusia madota mosisani nte Ia. Bo ane raelo-elota Ia, raposinggavakata Ia. Apa kakanana, Ia napara nte kita pura-pura. 28Evamo niuli ntona, ‘Kita natuvu, nolipa, bo nonturo ri dunia hitu sabana kuasaNa.’ Haitu nasimbayu muni ante anu niuli ntopovia dade ri ngatamiu ivei: ‘Kita pura-pura hii, ana-anaNa.’

29Jadi sampesuvu-sampesuvu, kita hii ana-ana nu Alatala. Sabana haitu, ledo mamala kita mompakasimbayu Alatala ante lenje nipovia lako ri bulava bara salaka bara vatu, nantuntuni kapande nu manusia. 30Tempo nggaulu ane manusia nombasomba tupu-tupu ntanina, Alatala ledo nombahuku ira. NibotusiNa ledo rarekeNa kadoyora haitu. Tapi sii-sii, nituduNa pura-pura manusia ri umba-umba ri dunia majea lako ri dosara. 31Apa nipakatantuNamo tempona bara maipia pura-pura manusia ri dunia ratangara ri kanoana. Pokarajaa motangara haitu nidekeiNa ka saito tona nipelisiNa lako ri nggauluname. Alatala nompakatuvu mpanjili tona haitu lako ri kamateNa ala malanto ka pura-pura tona Ia mpuu-mpuu nipelisi nu Alatala majadi Topotangara pura-pura manusia.”

32Tempo todea nangepe tesa tomate natuvu mpanjili lako ri kamatena, naria sanu ira nompongirika i Paulus, sabana ledo niparasayara tomate mamala matuvu mpanjili. Tapi naria muni sanu nanguli, “Kami da madota mangepe hanupa tesamu tutu!” 33Naupu sia, i Paulus nompalaisi polibu haitu. 34Tapi naria tona lako ri sia nosabingga ka i Paulus bo nomparasaya i Yesus. Saito anu nomparasaya pangane nosanga i Dionisius, ia topolibu ri Bulu Areopagus. Naria muni saito mombine nosanga i Damaris, bo naria muni bara sako-ndua tona ntanina.

Currently Selected:

Suro-Suro 17: TLEDOV

Highlight

Copy