Suro-Suro 13

I Barnabas bo i Saulus nipelisi bo nianggataka mompatolele Kareba Belo

1Ri tatanga ntodea topomparasaya ri ngata Antiokhia naria bara sako-ndua guru bo nabi anu nompasimbayu Tesa nu Alatala, haitumo, i Barnabas, i Simeon anu nidae i Vuri, bo i Lukius toKirene, i Menahem anu nipakambaso nosanggani-nggani ante Magau Herodes Antipas, bo i Saulus. 2Naria saeo, todea topomparasaya pura-pura nosambaya bo nombatoiya Alatala bo nopuasa. Nosa Gasa nu Alatala nanguli ka ira, “Pelisi bo patani ka Yakumo i Barnabas bo i Saulus mantui pokarajaa nipakatantuKu ka ira.” 3Jadi naliu ira nopuasa bo nosambaya, nidikara palera ri balengga i Barnabas bo i Saulus, bo nianggatakara majadi suro mompatolele Kareba Belo.

I Barnabas bo i Saulus nanggeni Kareba Belo ri levuto Siprus

4Jadi naupu i Barnabas bo i Saulus nitudu nu Nosa Gasa, hau ira ri pesampo Seleukia bo nesavi kapala hau ri levuto Siprus. 5Nakava ri ngata Salamis ri levuto Siprus, nipatoleleramo tesa nu Alatala ri banua petupu ntoYahudi. I Yohanes-Markus muni nantuntuni nantulungi ira ri polipara.

6-8Naupu ira noliu njumangu levuto Siprus, nakavamo ira ri ngata Pafos. Ri sia ira nosinggava nte toYahudi nosanga Bar-Yesus. I Bar-Yesus nosanga muni i Elimas riara basa Yunani. I Elimas haitu toposibalimata bo niulina ia nabi nu Alatala, tano ledo nakana. Gubernur ri levuto haitu nosanga i Sergius-Paulus bo ia novega nte toposibalimata haitu. Gubernur haitu tona natau bo nanoto pekirina. Ia nompokio i Barnabas bo i Saulus, apa ia madota mangepe tesa nu Alatala. Tapi i Elimas, toposibalimata haitu, nangeva i Barnabas bo i Saulus sabana ledo nipokonona gubernur momparasaya i Yesus. 9Tapi i Saulus, anu nidae muni i Paulus, nikeniaka Nosa Gasa nu Alatala. Nikanotosina toposibalimata haitu, 10bo niulikana, “He, topebagiu nggaraka, ana nu Magau Seta! Ikomo nangeva pura-pura anu nabelo! Nakuya iko ledo nenonto nombatenggosi tesa nu Alatala nanoa? 11Hitupa Tupu mombahuku iko! Iko majadi maburo bo ledo mukita mata nu eo bara sako-eo kasaena!”

Nangepe haitu kaliu-liu naburomo mata i Elimas, nirasaina eva kulimu vuri nombabungu matana, damo nigayo-gayona luona nangelo tona mombanini ia. 12Nanggita kajadia haitu, niparasaya nu gubernurmo i Yesus. Nokumaa mpuu ia nangepe tesa i Pue Yesus, anu nipepatudukika i Paulus bo Barnabas.

I Paulus bo i Barnabas hau ri ngata Antiokhia ri propinsi Pisidia

13Lako ri ngata Pafos ri levuto Siprus, i Paulus nte roana nesavi kapala ntasi hau ri ngata Perga ri propinsi Pamfilia. Nakava sumai i Yohanes-Markus nompalaisi ira bo nanjili hau ri ngata Yerusalem. 14Lako ri ngata Perga, i Paulus bo i Barnabas nompapola polipara hau ri ngata Antiokhia ri propinsi Pisidia. Ri eo penonto, hau ira nesua nonturo riara banua petupu ntoYahudi. 15Naupu nibaca sanggoto lako ri Buku Atura Agama bo Buku Nabi-nabi, pakeni-pakeni ri banua petupu haitu nantudu tona hau mompekutana i Paulus nte roana, “Sampesuvu-sampesuvu, ane maria tesamiu mompakaroso pomparasaya ntodea gahitu, radekei kami loga ka komiu motesa ka kami.”

16Jadi neanggamo i Paulus, bo nilaerakana palena, bo nanguli, “Sampesuvu-sampesuvuku toIsrael, bo pura-pura sampesuvuku ntanina ri sii, anu natundu nte Alatala. Epemo tesaku! 17Alatala anu nisombata ntoIsrael nompelisi totua-totuata nggaulu majadi todeaNa. Tempo ira da nonturo ri tana Mesir, nipakadeaNa mulira. Naupu sia, nikeniNa ira mesuvu lako ri tana Mesir, ante kabarakaNa nambaso. 18Patapulu-mpae kasaena Alatala nosabara nte pokainggura ri karava bai. 19NiropusiNa papitu magau ante todea-todeara ri tana Kanaan, tana haitu nibagi-bagiNa ka toIsrael majadi tanara. 20Lako ri tempo ira hau ri tana Mesir sampe nesua ri tana Kanaan pataatu limapulu mpae kasaena.

Naupu tana Kanaan nibagi-bagiNa ka toIsrael, Alatala nompelisi ka ira topotangara-topotangara manggeniaka ira. Topotangara kaupuna haitumo Nabi Samuel. 21Naupu sia, ira nerapi rapelisi ka ira magau anu manggeniaka ira. Jadi Alatala nompelisi ka ira i Saul, ana i Kish lako ri muli i Benyamin. Bo i Saul nanggeniaka ira patapulu mpae kasaena. 22Tapi kaupuna i Saul nileso nu Alatala, bo Alatala nompelisi i Daud majadi magaura. Hitumo anu niuli nu Alatala nombatesa Magau Daud: ‘NikitaKu i Daud ana Isai. Ia nompakadamba raraKu bo nipoviana pura-pura dotaKu.’#13:22 Mazmur 89:21

23Lako ri muli i Daud, Alatala nompelisi ka toIsrael saito Magau Topepakasalama nangoseaka pojanjiNa nggaulu, haitumo i Yesus. 24Dopame i Yesus nompamula pokarajaaNa, i Yohanes Topediu nangulika toIsrael ira kana majea lako ri dosara bo radiu nte uve, tandana ira mpuu-mpuu najea. 25Napara pokarajaana maupu, i Yohanes nanguli ka todea, ‘Nantuntuni panggavamiu, isema yaku? Yaku hii ledo Magau nipopeamiu! Tapi pariaramo! Magau haitu makava maupu pokarajaaku hitu. Ia nelabi kaogeNa pade yaku, sampe nau aga mombavole lui sapatuNa, ledo masipato yaku!’ ”

26I Paulus nompapola tesana ivei: “Sampesuvu-sampesuvu muli i Abraham bo sampesuvu-sampesuvu ntanina anu natundu nte Alatala. Alatala nompakatu ka kita kareba anu mompakalanto berimba Alatala mompakasalama kita. 27Tona nonturo ri ngata Yerusalem bo pakeni-pakenira ledo nisanira i Yesus Magau Topepakasalama. Ledo muni nisanira batuana pepatuduki nu nabi-nabi anu nibaca ka ira ri eo-eo penonto. Haitumo sampe nihukura mate i Yesus. Bo poviara haitu nompakadupa anu niboto nu nabi-nabi pangane! 28Naupa ledo nikavara nau sangayaa salaNa anu masipato rahuku mate ka Ia, niperapira nte Gubernur Pilatus ala i Yesus rapatesi. 29Naupu nipandasara i Yesus, evamo nitulisi ri Buku Gasa, karobataNa nitoraka lako ri kayu salib bo niboli riara nu dayo. 30Tapi Alatala nompakatuvu Ia mpanjili lako ri kamateNa. 31Bara sakuya eo kasaena, nadea ngganina i Yesus nompopakita karoNa ka tona anu nantuntuni Ia lako ri bagia Galilea hau ri ngata Yerusalem. Ira haitumo anu sii-sii najadi sabi-sabiNa ka todea toIsrael.

32Jadi sampesuvu-sampesuvu, sii-sii kami nakava mompatolele Kareba Belo hitu ka komiu. Anu nijanji nu Alatala ka totua-totuata nggaulu, 33haitu nipakadupaNamo ka kita tempo i Yesus nipakatuvuNa mpanjili. Naria nitulisi riara Mazmur karanduana ivei:

‘Ikomo AnaKu, eo hitu Yaku najadi TuamaMu.’

Mazmur 2:7

34Alatala nompakatuvu i Yesus mpanjili lako ri kamateNa. Bo domo Ia mamate atau mapopo riara nu dayo, sabana Alatala nanguli:

‘Anu nijanjiKu ka i Daud nggaulu nagasa bo natantu kadupana,

Anu nijanjiKu haitu Kupakadupa ka Iko!’

Yesaya 55:3

35Ivesia muni batuana posambaya i Daud ri Buku Mazmur nanguli,

‘Ledo rapalambaMiu Batua nipelisiMiu mapopo riara nu dayo.’

Mazmur 16:10

36Tesa hitu ledo nambela i Daud, sabana naupu ia novia anu nitudu nu Alatala ka ia, namatemo ia. Bo ia nitana ri sinjori dayo ntotuana nggaulu, bo karobatana napopomo. 37Tapi i Yesus nipakatuvu nu Alatala mpanjili lako ri kamateNa, i Yesus ledo napopo. 38Jadi sampesuvu-sampesuvu, kami nompopaisani ka komiu dosamiu namala raampungi nu Alatala sabana anu najadi nte i Yesus. 39Kita ledo namala rakabasaka lako ri dosata ane aga nangoseaka Atura-atura nipapola Nabi Musa. Tapi isema-sema nomparasaya i Yesus, rakabasaka lako ri pura-pura dosana bo majadi nanoa ri panggita nu Alatala. 40Haitu sabana komiu kana mainga ala nee majadi nte komiu anu nitulisi nu nabi-nabi ivei:

41Alatala nanguli, ‘Heh komiu anu ledo nomparasaya bo aga nongei-ngei, pariaramo tesaKu!

Komiu mahera manggita anu Kupovia tapi komiu aga maropu sanggani,

sabana tempo komiu da natuvu, Yaku movia anu ledo ntoto raparasayamiu, nau damo maria tona motesa pakalanto ka komiu.’ ”

Habakuk 1:5

42Naupu sia, nesuvumo i Paulus bo i Barnabas lako ri banua petupu bo niperapi ntodea ala manjili vai ira ri eo penonto meonga mompapola anu nitesara pangane. 43Naupu puramo tona nesuvu lako ri banua petupu pangane, nadea toYahudi bo tona ntanina anu nesua agama Yahudi, nomporoa i Paulus bo i Barnabas. Suro-suro haitu nompakaroso rarara ala ira bate-batena manjarumaka kabelo nu Alatala.

44Eo penonto sunjuna haitu, pura-pura tona riara ngata haitu nasiromu mangepe tesa nu Alatala. 45Nanggita todea haitu, nasiriati mpuumo rara nu pakeni ntoYahudi. Nisalaira i Paulus, bo nievara pura-pura anu niulina. 46Tapi i Paulus bo i Barnabas aga nantambai kabiara notesa ka ira ivei: “Masipato Tesa nu Alatala rapasimbayu ntani ruru ka komiu toYahudi. Tapi nipoaramiu tesa haitu. Nipakalantomiu mboto komiu ledo masipato manggava katuvu nabelo sampe ri kasae-saena. Sabana haitu, kami domo mompatolele tesa haitu ka komiu toYahudi! Hitupa kami hau nte tona ledo toYahudi, 47apa Tupu nomparenta ka kami ivei:

‘NipelisiKu iko majadi reme anu mombavanta tona ledo toYahudi,

ala rasani ntona ri umba-umba ri dunia, Alatala mompakasalama manusia.’ ”

Yesaya 49:6; 42:6

48Tempo tona ledo toYahudi ri sia nangepe tesa haitu, nadamba mpuu rarara bo niulira, “Nabelo mpuu Tesa nu Alatala!” Isema-sema nipelisi nu Alatala manggava katuvua mabelo sampe ri kasae-saena, iramo nomparasaya i Yesus. 49Bo Tesa nu Alatala natolele ri umba-umba ri bagia haitu.

50Tapi tomaoge-tomaoge bo mombine-mombine anu naria nturona bo natundu nte Alatala, nipakapane ntoYahudi sampe i Paulus bo i Barnabas nipandasa bo nipopalai lako ri ngata haitu. 51Jadi i Paulus bo i Barnabas nombasapulai sovu lako ri kadara, tandana tona haitu nipoara nu Alatala.#13:51 nombasapulai sovu lako ri kadara: Ane toYahudi manjili lako ri ngata ntona ledo toYahudi, biasana nisapulaira sovu lako ri sapatura bo bajura apa nirekera tona ledo toYahudi naruto. I Paulus bo Barnabas novia ivesia muni ka toYahudi anu nompoara Kareba Belo, tandana ira muni nireke naruto ri panggita nu Alatala. Bo nalaimo ira hau ri ngata Ikonium. 52Topangoseaka i Yesus ri ngata Antiokhia nadamba mpuu rarara, bo ira nikeniaka nu Nosa Gasa nu Alatala.

Currently Selected:

Suro-Suro 13: TLEDOV

Highlight

Copy