1 Korintus 15
15
I Yesus Kristus mpuu-mpuu namate bo natuvu mpanjili
1Kapolana sampesuvu-sampesuvu. Yaku madota mompopatora ka komiu Kareba Belo anu nipatoleleku ka komiu. Nitarimamiumo Kareba haitu bo naroso pomparasayamiu i Kristus sampe sii-sii. 2Kareba Belo haitu namala manggeni komiu rapakasalama ane komiu bate-batena momparasaya tesa nipatoleleku ka komiu. Ane ledo, pomparasayamiu tutu ledo nakana.
3Nitarimaku kareba nelabi nopoko bo haitumo nipasimbayuku ka komiu. Haitumo, i Kristus namate sabana dosata bo haitu najadi nangoseaka anu nitulisi riara Buku Gasa. 4Ia nitana ri dayo, bo ri eo katataluna nipakatuvu mpanjili bo haitu muni najadi nangoseaka anu nitulisi riara Buku Gasa. 5Naupu haitu nipopakitaNa karoNa ka i Petrus bo ka ana-anaguruNa sapulu randua. 6Bo naupu haitu nipopakitaNa karoNa ka salunu topangoseaka Ia nelabi lima-atu tona kadeana. Nau bara sako-ndua ira namatemo, deanapa ira da natuvu sampe sii-sii. 7Naupu haitu nipopakitaNa karoNa ka i Yakobus, bo ka pura-pura tona najadi suroNa. 8Bo kaupuna nipopakitaNa munimo karoNa ka yaku, nau yaku nasimbayu mpo ngana nesuvu dopa nagana mbulana. 9Yaku hii suro i Yesus natueipa pade suro-suro ntanina. Kakanana yaku hii ledo masipato rauli suro i Yesus sabana yaku nompandasa todea topomparasaya Ia bara ipia. 10Tapi lako ri pepotove nu Alatala, yaku najadi suro i Pue Yesus. Bo pepotoveNa haitu naria aselena riara nggatuvuku. Yaku nokarajaa nelabipa kantamona pade suro-suro i Yesus ntanina. Tapi kakanana ledo yaku anu nokarajaa ntamo ivesia. Alatala anu nompotove yaku, Iamo nokarajaa nosanggani-nggani ante yaku. 11Jadi nau yaku nau suro-suro ntanina nompatolele Kareba Belo ka komiu, ledo nakuya. Anu nopoko, kami nompatolele Kareba Belo bo komiu nomparasayana.
Ane rapana i Kristus ledo nipakatuvu mpanjili, pomparasayata ledo ria gunana
12Kami nompatolele ka komiu tesa nanguli i Kristus nipakatuvu mpanjili. Jadi nakuya naria sanu komiu nanguli tona namatemo ledo rapakatuvu mpanjili? 13Ane rapana makana tona namatemo ledo rapakatuvu mpanjili, batuana i Kristus muni ledo nipakatuvu mpanjili. 14Bo ane i Kristus ledo nipakatuvu mpanjili, ledo ntoto ria gunana kami nompatolele Kareba Belo, bo ledo muni naria gunana pomparasayamiu. 15Bo ledo aga haitu. Ane rapana tesara makana, batuana kami nodava, sabana kami nanguli Alatala nompakatuvu i Kristus mpanjili lako ri kamateNa. Tapi ane rapana makana tona namate ledo rapakatuvu mpanjili, batuana Alatala ledo nompakatuvu mpanjili i Kristus. 16Apa ane tona namate ledo rapakatuvu mpanjili, natantumo i Kristus muni ledo nipakatuvu mpanjili. 17Bo ane i Kristus ledo nipakatuvu mpanjili, pomparasayamiu ledo ntoto ria gunana, komiu bate-batena nadosa. 18Bo topomparasaya Ia anu namatemo domo ria panjarumakara, naropumo ira! 19Ane panjarumakata i Kristus aga noguna tempo kita natuvu ri dunia hitu, kitamo tona nelabi napakasi ri dunia.
I Kristus mpuu-mpuu nipakatuvu mpanjili, jadi kita muni rapakatuvu mpanjili
20Tapi i Kristus mpuu-mpuu nipakatuvu mpanjili. Bo katuvuNa mpanjili haitu najadi panggingisi nompakatantu pura-pura topangoseaka Ia anu namatemo, rapakatuvu mpanjili muni. 21Lako ri pokainggu ntona saito, pura-pura manusia kana mamate. Ivesia muni lako ri povia ntosaitoNa, manusia mamala rapakatuvu mpanjili. 22Pura-pura manusia nireke nosangu ante i Adam apa kita pura-pura mulina. I Adam namatemo, jadi pura-pura manusia kana mamate munimo. Tapi i Kristus nipakatuvu mpanjili. Jadi isema-sema nosangu rara nte i Kristus, ia muni rapakatuvu mpanjili. 23Tona namatemo kana rapakatuvu mpanjili nangoseaka sunjuna nipakatantu. I Kristus tona pamulana nipakatuvu mpanjili. Bo maliu haitu tona nosangu rara nte Ia rapakatuvuNa mpanjili tempo Ia makava mpanjili ri dunia. 24Maliu haitu pade makava kaupu nu dunia. Tempo haitu i Kristus mombadagi pura-pura tupu ntanina bo anu nakuasa, bo Ia moparenta mpo Magau. Maliu haitu, radekeiNa PoparentaNa ka TuamaNa Alatala. 25Apa i Kristus kana moparenta mpo Magau sampe pura-pura baliNa rapopekou nu Alatala nte Ia. 26Pade Ia mompakaupu baliNa kaupuna, haitumo kamatea. 27Nitulisi riara Buku Gasa ivei:
“Alatala mompopekou pura-pura anu naria ri ngayoNa.”
Mazmur 8:7
Jadi nisanita pura-pura mekou nte i Kristus. Aga Alatala mboto ledo mekou nte i Yesus, sabana Iamo anu nompopekou pura-pura anu naria nte i Kristus. 28Tempo pura-pura anu naria mekou nte i Kristus, Ia mboto mekou nte TuamaNa, apa evamo niuliku pangane Alatalamo anu nompopekou pura-pura nte Ia. Kaupuna Alatala moparenta mpengaya-ngaya anu naria.
Ane rapana tona namate ledo rapakatuvu mpanjili, tantu pokarajaa nipoviata ka i Pue ledo ria gunana
29Ane tona namate ledo rapakatuvu mpanjili, rapokuya naria tona nidiu manjambei tona namatemo? Nuapa gunana movia ada haitu ane tona namate ledo ntoto rapakatuvu mpanjili? 30Bo ane tona namate ledo rapakatuvu mpanjili, rapokuya kami mantingayo kasusa bo kapari eo-eo? 31Sampesuvu-sampesuvu, eo-eo nisarumakaku yaku rapatesi sabana pokarajaaku nompatolele Kareba Belo. Nisani nu Alatala nadamba mpuu raraku sabana komiu nosangu rara nte Tuputa i Yesus Kristus. Ivesia muni nisaniNa tesaku hitu nakana mpuu, yaku ledo nodava! 32Yaku nosieva ante tona nadaa ri ngata Efesus anu nasimbayu mpo binata-binata nasoa. Nuapa gunana yaku matuvu mantingayo kasusa ivehaitu ane ledo ria panjarumakaku yaku rapakatuvu mpanjili? Ane tona namate ledo rapakatuvu mpanjili, agina kita matuvu mpo panguli ntona ivei: “Kamaimo kita mangande bo manginu bo madamba-damba eo hitu, sabana maile bara mamatemo kita, bo katuvuta maupumo.”
33Tapi nee sampe komiu rabagiu ntona anu nanguli tomate ledo rapakatuvu mpanjili. Toramo! Ane kita movega ante tona nadaa, tantu rapasialata pokainggura. 34Jadi pakanoto mpanjili pekirimiu bo tumo rapovia dosa! Da nariapa sanu komiu dopa nosisani belo nte Alatala. Niuliku ivesia ala maeya matamiu.
Karo ntona nipakatuvu mpanjili
35Tantu maria tona ntanina mompekutana, “Berimbamo tomate rapakatuvu mpanjili? Berimba karora ane rapakatuvu mpanjili?” 36Nadoyo mpuu komiu mompekutana ivesia! Nau bara nuapa ratuda ri talua, ledo matuvu ane anguna ledo ralovu ri tana ntani! 37Bo anu nitudamiu haitu aga batuna nggoo, nau angu gando bara angu tuda-tuda ntanina. Ledo nituda njumanggayu, aga anguna nituda. 38Tapi Alatala nompakatuvu angu-angu nituda haitu nangoseaka dotaNa sampe pura-pura ngaya anguna najadi tuda-tuda nangoseaka ngayana mboto.
39Ane rapekirita pura-pura anu natuvu ri dunia hitu, ledo nasimbayu lenjena. Manusia sangaya lenjena. Tonji ntanina lenjena. Bau ntasi ntanina muni lenjena. Mpengaya-ngaya binata simbo ntanina lenjena. 40Bo ivesia muni anu ri langi evamo mata nu eo, bula, bo betue-betue, ledo nasimbayu ante anu ri tana. Anu ri langi sangayana kagayana bo anu ri tana sangayana kagayana. 41Kagaya nu mata eo sangayana, bo kagaya nu bula sangayana muni. Bo kagaya nu betue sangayana muni, bo betue mboto simbo nosisala kagayana.
42Ivesia muni ante karobata ntomate anu rapakatuvu mpanjili. Karobata anu nitana mapopo. Tapi ane karobata rapakatuvu mpanjili domo mamate domo mapopo. 43Karobata anu nitana ledo namala novia nuapa-nuapa bo nadaa nikita. Tapi ane rapakatuvu mpanjili, maroso bo magaya rakita. 44Karobata anu nitana, karo manusia biasa lako ri dunia hitu. Tapi ane rapakatuvu mpanjili, karo haitu majadi karo masipato matuvu ri suruga.
Naria karo manusia biasa, bo naria muni karo masipato matuvu ri suruga. 45Riara Buku Gasa naria nitulisi ivei:
“Manusia paratama, i Adam, nipakatuvu nu Alatala.”
Kajadia 2:7
Tapi i Adam kaupuna, haitumo i Kristus, nombadekei katuvu nabelo sampe ri kasae-saena. 46Anu najadi nokolu ledo karo anu masipato monturo ri suruga, tapi karo manusia biasa. Karo anu masipato monturo ri suruga najadi ri puri. 47Manusia paratama haitu nipajadi lako ri tana bo nonturo ri dunia hitu. Tapi i Kristus, anu nireke i Adam karanduana, nopuna lako ri suruga. 48Manusia ri dunia hitu natuvu nasimbayu mpo i Adam anu nipajadi lako ri tana. Tapi tona anu nosangu rara ante i Kristus manggava katuvua lako ri suruga, nasimbayu mpo katuvua i Kristus. 49Sii-sii karota nanjava karo i Adam anu nipajadi lako ri tana. Tapi bara maipia kita anu nosangu rara nte i Kristus, karota manjava karo i Kristus anu nopuna lako ri suruga.
50Sampesuvu-sampesuvu, iveimo patujuku: karota ri dunia hitu nipovia lako ri isi bo raa. Kita ledo mamala monturo ri Poparenta nu Alatala ri suruga ante karota anu mamate bo mapopo, sabana ri suruga ledo ria kamatea. 51Pariaramo! Kupopaisani ka komiu anu nitabuniaka nu Alatala lako ri lamba pamulana! Ledo pura-pura kita mamate, tapi kita pura-pura kana rabaliki nau kita da natuvu atau namatemo. 52Riara sampida mata tempo tabue i Pue rapopomoni ri kaupu nu dunia, tona anu namatemo rapakatuvu mpanjili ante karo anu domo mapopo, bo kita pura-pura anu da natuvu rabaliki muni. 53-54Apa karota anu mamate bo mapopo kana rabaliki majadi karo anu domo mamate domo mapopo. Bo tempo karota mpuu-mpuu nibaliki, madupamo tesa nitulisi riara Buku Gasa ivei:
“Alatala nompakaupu kamatea, manusia domo mamate!”
Yesaya 25:8
55“Heh, kamatea! Nidagimo iko!
Domo ria kuasamu mompandasa manusia!”#15:55 Basa Yunani: Heh kamatea, umba pedagimu? Heh kamatea, umbamo bisamu?
Hosea 13:14
56Manusia naeka ka kamatea sabana nisanira ane mamate ira kana rahuku sabana dosara. Bo manusia nadosa sabana niliunakara Atura agama.#15:56 Basa Yunani: Bisa nu kamatea iamo dosa, bo kuasa nu dosa iamo Atura agama.
57Tapi kita nosukuru nte Alatala! Iamo nombakabasaka kita lako ri kuasa nu dosa bo Atura agama sampe kita majadi padagi sabana anu nipovia nTuputa Yesus Kristus!
58Jadi sampesuvu-sampesuvu nipotoveku, pakaroso pomparasayamiu bo nee molengga-lengga. Pasimbuku ante mpuu-mpuu raramiu mantui pokarajaa nidekei i Pue Yesus ka komiu, apa nisanimiu ledo ria nuapa-nuapa anu ledo ria gunana rapoviamiu ka Ia. Natantu kana maria aselena.
Currently Selected:
1 Korintus 15: TLEDOV
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
