1 Korintus 11

1Jadi pasialamo pokaingguku nasimbayu mpo yaku mboto nompasiala pokainggu i Kristus.

Pokainggu mombine riara kasiromu ntopomparasaya

2Sampesuvu-sampesuvu, yaku nantoiya komiu sabana komiu batena nantora yaku riara mpengaya-ngaya, bo komiu naroo nangoseaka pepatuduki nipatudukiku ka komiu. 3Tapi hitu paraluu rasanimiu: langgai pakeni nu bereina mombine, i Kristus pakeni nu langgai, bo Alatala pakeni i Kristus. 4Jadi ane riara kasiromumiu naria langgai nosambaya atau nompasimbayu tesa nitarimana lako nte Alatala bo nibonggona balenggana, ia ledo nombabila i Kristus, pakenina.#11:4 Tempo haitu, langgai nolelaka pobonggo balenggana tempo netupu, tandana ia nombabila bo natundu nte tupuna. 5Bo ane riara kasiromumiu naria mombine nosambaya atau nompasimbayu tesa nitarimana lako nte Alatala bo ledo nibonggona balenggana, ledo nabelo. Apa nangoseaka kabiasata, mombine ledo nombabonggo balenggana ledo nombabila bereina langgai pakenina. Ledo ria posisalana mombine haitu ante mombine nigau buluana tandana ledo ria eya nu matana.#11:5 Nantuntuni kabiasa ntona tempo haitu, mombine kana nombabonggo balengga ane nesuvu. Aga mombine nasavidu ledo nombabonggo balenggana. 6Ane mombine ledo madota mombabonggo balenggana, aginamo ragausi buluana. Tapi ane maeya matana buluana ragau, agina rabonggona balenggana.

7Ledo masipato langgai mombabonggo balenggana tempo nosambaya atau nompasimbayu tesa nu Alatala, sabana ia nipajadi mpo polenje nu Alatala mboto ala kaoge nu Alatala rakita. Tapi mombine nipajadi ala kaoge nu langgai rakita. 8Apa ri pamulana langgai ledo nipajadi lako ri mombine, tapi mombine nipajadi lako ri langgai. 9Bo ivesia muni mombine nipajadi nu Alatala ala maria roa nu langgai, ledo langgai nipajadi ala maria roa nu mombine. 10Haitu sampe mombine masipato mombabonggo balenggana tandana ia nekou nte bereina langgai,#11:10 tandana ia nekou ante bereina langgai Tafsiran ntanina: tandana naria nturona nosambaya bo nompakasimbayu tesa nitarimana lako nte Alatala, ATAU: tandana ia nombakuasai karona mboto. bo muni sabana pokaingguna haitu rakita nu malaeka-malaeka nTupu.

11Tapi toramo! Riara nggatuvuta topomparasaya i Pue Yesus, langgai bo mombine nosiparaluu. 12Naupa ri pamulana mombine nipajadi lako ri karo langgai, hitupa pura-pura langgai nipoanaka nu mombine. Bo pura-pura langgai bo mombine nopuna lako nte Alatala.

13Pekirimiu mbotomo. Masipato mombine mosambaya ka Alatala riara kasiromumiu ante balengga ledo nibonggo? Natantu ledo. 14Nangoseaka kabiasa naria nte kita mboto, nisanita ane langgai nandoe buluana, haitu nepakaeya. 15Tapi ane mombine nandoe buluana, haitu nompakagaya ia. Apa mombine nipopobulua rapotutui balenggana.

16Ane maria tona madota mosinjanaika pepatuduki hitu, aga sangaya kuuli ka ira: Ledo ria kabiasa ntanina nioseaka kami bo pura-pura todea topomparasaya Alatala.

Pokainggu masipato tempo manginu uve anggur bo mangande roti mantora kamate i Yesus

17Kapolana, naria bara sako-ngaya kuuli ka komiu. Tapi ledo mpuu kutoiya pokainggumiu. Sabana, ane komiu nasiromu nosanggani-nggani mombasomba Alatala, kasiromumiu haitu ledo nanggeni belo ka komiu, tapi aga nanggeni daa. 18Paratama, niepeku ane komiu nasiromu, komiu natebagi-bagi bo nosinjanai. Bo tantu nakana sanu kareba haitu. 19Komiu kana matebagi-bagi mami ala rasani isema komiu mpuu-mpuu nangoseaka i Yesus! 20Tempo komiu nasiromu mosanggani-nggani, pokainggumiu ledo masipato ka tona masiromu mangande roti bo manginu uve anggur mantora kamate i Pue Yesus. 21Apa ane komiu nangande, komiu aga nompago mangala kandeamiu bo panginumiu mboto bo ledo nompopea roa sampe naria tona ledo nanggava kandea nuapa-nuapa, bo naria ntanina aga nanginu sampe nalangu. 22Nakuya ivesia? Ledo ria banuamiu mboto rapangandemiu bo rapanginumiu? Nakuya komiu nompandaente kasiromu ntodea topomparasaya Alatala? Nakuya komiu nompakaeya tona ledo nompakule manggeni kandea ri kasiromu haitu? Nuapa masipato kuuli ka komiu? Masipato kutoiya pokainggumiu haitu? Natantu ledo! Ledo ntoto masipato kutoiya pokainggumiu tutu!

23Nipatudukikumo ka komiu bara ipia batuana nangande bo nanginu nosanggani-nggani mantora kamate i Yesus. Pepatuduki haitu nitarimaku lako nte i Pue Yesus mboto. Bongi i Pue Yesus nipobalu ka baliNa, nialaNa roti, 24bo niuliNa tarima kasi ka Alatala. Naupu haitu nitubi-tubiNa roti haitu bo niuliNa, “Roti hitu karoKu Kudekei mombatolosi komiu. Kandemo roti hitu mantora Yaku.” 25Bo ivesia muni naupu ira nangande, nialaNa saboda uve anggur bo niuliNa, “Panginu hitu tandana Pojanji nu Alatala nabaru rapakaasa ante raaKu. Nggani-nggani komiu manginu panginu ada hitu, inumo rapombatora Yaku.” 26Apa nggani-nggani komiu mangande roti bo manginu uve anggur hitu, komiu mompatolele kareba kamate i Pue Yesus sampe Ia makava mpanjili ri dunia hitu.

27Jadi, isema-sema nangande roti atau nanginu uve anggur i Pue Yesus ante pekiri ledo masipato, ia nadosamo ri ngayo i Pue Yesus sabana nipandaentena karoNa bo raaNa. 28Jadi pura-pura tona kana raparesana ntani ruru rara ntaina mboto. Bo maupu haitu pade mamala ia mangande roti bo manginu uve anggur haitu. 29Apa tona anu mangande roti bo manginu uve anggur haitu bo ledo nipekirina posidaina ada haitu ante karo i Kristus, natantumo rahuku nu Alatala, sabana ia aga nompongeika kamate i Pue Yesus.#11:29 ia aga nompongeika kamate i Pue Yesus. Basa Yunani: ia aga nompongeika karo i Pue Yesus. 30Haitu sampe nadeamo komiu ri situ nalente bo nadua, bo bara sako-nduamo komiu namate. 31Tapi ane raparesata ntani ruru rara ntaita dopame mangande roti bo manginu uve anggur haitu, kita ledo rapambela pehuku. 32Tapi ane rapana kita rapambela pehuku nu Alatala sii-sii, patujuNa kita rapatuduki ala nee sampe kita rapakaropu mosanggani-nggani ante tona ri dunia anu ledo natundu nte Alatala.

33Jadi sampesuvu-sampesuvuku, ane komiu masiromu mangande roti bo manginu uve anggur mantora kamate i Pue Yesus, komiu kana mosipopea pura bo mangande mosanggani-nggani. 34Ane maria tona naara taina, agina ia mangande ntani ruru lako ri banuana mboto. Nee sampe masiromu mosanggani-nggani bo aga rapambela pehuku nu Alatala. Bo ane yaku tou nte komiu ngena, damo kupakasiayu parakara-parakara ntanina.

Currently Selected:

1 Korintus 11: TLEDOV

Highlight

Copy

Compare