Rôma 9

Bơta dong tơwài gơwèt mơ cau Juda mơ ală làng bol bơdìh

(9:1 – 11:36)

Yàng Tom Trồ mơ làng bol Kơnràñ dê

1Añ đơs song tòm Bơtau Krist, añ ò đơs blac, nùs tồr añ lơh cơng añ in bơh Yàng Hwềng Goh lah: 2Añ moat jrùng ngan, nùs añ jê sồt sùm ò dơh. 3Bơh añ kơp kòñ lah dilah să tòm añ rgơi kong srat sơntơm, sang tơlik bơh Bơtau Krist, gen añ kung kong sơl, tài bơh oh mi gơp bơtiàn añ đah poac să, 4#Lik 4:22.hơ̆ la làng bol Israel; bơta geh kòp la kòn, bơta gơklŏ, ală jơnau ho bal, bơta boh lam, bơta duh khoai song ngan, mơ ală jơnau ho pơgon Yàng Tom Trồ gơrê hơ bol khai; 5bol khai la kòn sau neh gơs ală ồng pàng cau Hebrơ màng ryŭ, mơ jat đah poac să bơh làng bol hơ̆ tơnggơs Bơtau Krist, dan Yàng Tom Trồ la Bơtau at bồ hơđang jơh ală bơta, pal geh jòng ro gam sùm sùm. Amen.

6Añ ò đơs lah jơnau ho Yàng Tom Trồ dê gơlik ò kwơ ò. Bơh ò di jơh ală cau Israel la làng bol Yàng Tom Trồ dê. 7#Sơnròp 21:12.Mơ kung ò di jơh jơi bơtiàn Abraham dê la kòn Yàng Tom Trồ dê lơm ò; Yàng Tom Trồ neh đơs mơ Abraham lah: “Mìng ală cau gơlik bơh Isak sồng geh sơnđan la jơi bơtiàn añ neh ho pơgon mơ mê.” 8Hơ̆ ò di ală kòn đah poac să#9:8 La sơnio bơh jơi bơtiàn Abraham bơh Ismael, kòn deh bơh Agar. (Sền Gal 4:22-23). la ală kòn Yàng Tom Trồ dê, mơya kòn sau đah jơnau ho pơgon gen sồng geh kòp la jơi bơtiàn Abraham dê. 9#Sơnròp 18:10,14.Bơh ală jơnau do la jơnau ho pơgon Yàng Tom Trồ dê: “Kung di di tơngai do Añ rơp tus wơl, gen Sara rơp gơs dô nă kòn klau.” 10Ò di mìng behơ̆ lơm ò, mơya tòm tŭ Rebeka bơh ồng pàng bol he dê la Isak mơ gơs bun kòn bàr. 11Bulah bàr nă kòn òhềt deh, kung òhềt lơh broă lơi niam hala iơh, tồ bơta lơh nền Yàng Tom Trồ dê jat bơta sac rwah gam sùm, ò di jat broă lơh mơya jat Yàng Tom Trồ hòi sac, 12#Sơnròp 25:23.gen gơs jơnau Yàng Tom Trồ đơs mơ Rebeka lah: “Cau bi rơp duh broă cau oh;” 13#Mal 1:2,3.be neh cih lah: “Añ kòñ gơboh Jakôp mơya gơjrañ Esau.”

14Behơ̆ gen mbe bol he kòñ đơs taih? Gơs bơta ò song ring tòm Yàng Tom Trồ ơ? Ò di behơ̆ ò! 15#Lik 33:19.Bơh Kơnràñ neh đơs mơ Môise lah:

“Añ rơp kòñ nđàc di cau Añ kòñ nđàc,

Añ rơp nđàc sơngit di cau Añ nđàc sơngit.”

16Gen bơta hơ̆ ò di bơh cau lơi kòñ hala cau lơi jòi jat mơ geh ò, mơya hơ̆ la bơh Yàng Tom Trồ nđàc sơngit. 17#Lik 9:16.Tòm Sră Goh neh đơs mơ Pharaôn lah: “Añ neh pồ bơtào mê nàng yal tơlik loh gơnap gơnoar Añ jê tòm mê, tồ sơnđan Añ geh bơto yal làm ù.” 18Behơ̆ Kơnràñ gơs nùs nđàc sơngit di cau lơi gen nđàc sơngit, mơ kòñ lơh kơldang nùs cau lơi gen lơh.

Bơta gơjrañ dờng mơ nùs kòñ nđàc Yàng Tom Trồ dê

19Behơ̆ gen mê rơp lùp añ lah: “Dilah behơ̆ ñchi bơh tài Yàng Tom Trồ gam kup glài cau taih? Ñcau rgơi tòmdră mơ nùs kòñ Yàng Tom Trồ dê taih?” 20#Esai 29:16; 45:9.Mơya, ơ cau ne, mê la ñcau mơ khin pơndang wơl mơ Yàng Tom Trồ taih? Dô nơm gri mơ ù rgơi đơs tơrwơl mơ cau mòn gơ lah: “Ñchi bơh tài mê neh mòn añ be do sơl ơ?” 21Cau tòm mòn gri ò di gơs gơnoar hơđang ù kơnàng, bơh tòm dô gơnru ù mơ lơh gơs gri ngui tòm bơta niam ryŭ, mơ gri ndai ngui tòm bơta ò diă ò diơng ò ơ?#9:21 Rct: gri ngui tòm broă dờng màng krơi is mơ gri ngui tòm broă òs. 22Yàng Tom Trồ kòñ sơnio bơta gơjrañ dờng mơ yal tơlik gơnap gơnoar Kơnràñ dê, gen neh ai oă bơta kong ơt mơ kong di ală cau pal gơjrañ neh prap lòi bơta roh rui in. 23Kơnràñ kung kòñ yal tơlik bơta pas gơs bơta gơklŏ Kơnràñ dê gơwèt hơ bol he la ală cau pal kòñ nđàc mơ Kơnràñ neh rcang lài nàng dòp bơta gơklŏ Kơnràñ dê; 24ală gri hơ̆ la bol he, la cau Kơnràñ neh hòi sac, ò di mìng bơh tòm ală cau Juda lơm, mơya kung bơh tòm ală cau làng bol bơdìh sơl. 25#Ôse 2:23.Ngan be Kơnràñ neh đơs tòm sră Ôse lah:

“Añ rơp sơnđan cau ò di làng bol Añ la làng bol Añ jê,

Cau ò di kòñ gơboh la kòñ gơboh.”

26 # Ôse 1:10. “Mơ tai, tòm tiah neh đơs mơ bol khai lah: ‘Ală bol mê ò di la làng bol Añ jê,’

Kung tềng hơ̆ mơ bol khai rơp geh sơnđan la ‘kòn Yàng Tom Trồ gam kis sùm dê.’”

27Ai Esai đơs bơh làng bol Israel mơ hòi driau lah: “Bulah ntum khà kòn sau Israel be bràs tòm dàlềng, mơya mìng dô pơnah gam wơl rơp geh dong klàs; 28#Esai 10:22,23.bơh Yàng rơp lơh gơlik gơs mhar tòm toh be jơnau Kơnràñ dê dô bă wil tơl hơđang ù.” 29#Esai 1:9.Mơ tai, kung be Esai neh đơs lài lah:

“Dilah Yàng Gơnap Gơnoar Làm Jơh dê ò lòi cau tơrbŏ jơi bơtiàn bol he in,

Gen bol he neh gơlik gơs be Sôdôm mơ tòm toh be Gômôrơ sơl.”

Jơnau Pol hòi dan làng bol Israel

30Behơ̆ mbe bol he kòñ đơs taih? Ală làng bol bơdìh ò jòi jat bơta song ring, mơya neh geh bơta song ring, hơ̆ la bơta song ring tus bơh bơta dòn; 31mơya làng bol Israel jòi jat bơta boh lam bơta song ring dê, mơya ò lơh wil tơl bơta boh lam. 32Ñchi bơh tài? Tài bơh bol khai ò di bơh bơta dòn mơ jòi jat, mơya bơh broă lơh. Bol khai neh gơtup jơng di pơnai lŭ “gơtup jơng,” 33#Esai 8:14; 28:16.be neh cih lah:

“Do Añ lòi di Siôn dô nơm pơnai lŭ gơtup jơng, dô nơm pơnai lŭ gơtup pừ;

Cau lơi dòn di lŭ hơ̆ gen rơp ò gơs ƀàssìl.”

Currently Selected:

Rôma 9: KPM2018

Highlight

Copy

Compare