Rôma 4

Krơh bơta dòn Abraham dê

1Behơ̆, bol he rơp đơs bơh Abraham, ồng pàng bol he jat poac să, ñchi khai neh git làm taih? 2Bơh dilah Abraham neh geh kòp la song ring bơh broă lơh, gen khai gơs bơta nàng jòng să; mơya di đap Yàng Tom Trồ ò di behơ̆ ò. 3#Sơnròp 15:6.Mbe Sră Goh đơs taih? “Abraham neh dòn Yàng Tom Trồ, gen tàng bơta hơ̆ geh kòp la song ring khai in.” 4Gơwèt hơ cau lơh broă, gen jền tơngai ò kòp la phan ai gòi, mơya kòp la dồs, 5ai cau ò lơh broă dô êt lơi mơya dòn Yàng Tom Trồ la Bơtau kòp cau glài#4:5 Js: Cau ò duh rngòt, ò dòn duh. la song ring, gen bơta dòn cau hơ̆ dê geh Yàng Tom Trồ kòp la song ring. 6Tài bơh hơ̆ Dabit neh đơs bơh bơta lơngai cau mơ Yàng Tom Trồ neh kòp la song ring khai in ò di bơh broă lơh lah:

7“Lơngai cau lơi in geh toh bơta tìs glài,

Mơ tồi glài geh jơm ndơp.

8 # Đơs Crih 32:1,2. Lơngai cau lơi in Yàng ò kòp tồi glài tai.”

9Behơ̆, bơta lơngai hơ̆ mìng ai cau kong siat gơltau in hala kung ai cau ò kong siat gơltau in sơl ơ? Bơh bol he đơs lah bơta dòn Abraham dê geh Yàng Tom Trồ kòp la song ring khai in. 10Behơ̆, Abraham geh kòp la song ring mbe lơi taih? Lài hala tơnơ̆ mơ tŭ kong siat gơltau taih? Ò di tơnơ̆ mơ tŭ ồng kong siat gơltau ò, mơya lài mơ tŭ hơ̆ gơ dê. 11#Sơnròp 17:10.Abraham neh dòp geh tềl siat gơltau, be tềl tap ƀang kì bơta song ring dê mơ ồng neh dòp geh bơh bơta dòn tòm tŭ òhềt kong siat gơltau; tồ lơh gơs bèp jơh ală cau dòn ò kong siat gơltau in, nàng bol khai in kung geh kòp la song ring, 12mơ kung lơh gơs bèp ală cau kong siat gơltau dê, hơ̆ la ală cau ò di mìng kong siat gơltau lơm ò, mơya kung kis jat krơh bơta dòn Abraham la ồng pàng bol he dê neh gơs lài mơ tŭ òhềt kong siat gơltau.

Jơnau ho Yàng Tom Trồ dê geh dòp kơnòm di bơta dòn

13 # Sơnròp 17:4-6; 22:17-18; Gal 3:29. Tòm tŭ Yàng Tom Trồ ho pơgon mơ Abraham mơ jơi bơtiàn khai in geh pơrdòn lơgar dunnia lơh gơs sre brê ò di bơh bơta boh lam, mơya hơ̆ la tài bơh bơta dòn khai geh kòp la song ring bơh Yàng Tom Trồ. 14#Gal 3:18.Mơ dilah bơta ho pơgon Yàng Tom Trồ dê ai ală cau kơnòm di bơta boh lam in, gen bơta dòn gơlik ò kwơ, mơ jơnau ho pơgon Yàng Tom Trồ dê gơlik sang gòi, 15bơh bơta boh lam tơnggơs bơta gơjrañ dờng, mơya tiah lơi ò gơs bơta boh lam, gen kung ò gơs tìs mơ bơta boh lam sơl.

16 # Gal 3:7. Behơ̆ tàng, bơh bơta dòn mơ jơnau ho pơgon bơh bơta nđàc, geh kơ̆ nền jơh jơi bơtiàn Abraham in, ò di ai mìng jơi bơtiàn ơm hơđơm gơnoar bơta boh lam lơm, mơ kung ai jơi bơtiàn gơs bơta dòn Abraham in sơl, la ồng pàng đah hwềng jơh ală bol he dê, 17#Sơnròp 17:5.be Sră Goh neh cih lah: “Añ neh bơtào mê lơh gơs bèp oă làng bol dê,” di đap Yàng Tom Trồ la Bơtau khai neh dòn, hơ̆ la Bơtau ai bơta kis cau chơt in, mơ hòi ală bơta ò gơs be neh gơs rau. 18#Sơnròp 15:5.Bulah khai ò gơs tiah gơn kơnòm tai, mơya kư̆ ai nùs gơn kơnòm mơ dòn, behơ̆ tàng khai gơlik gơs bèp oă làng bol dê, jat be jơnau neh đơs lah: “Jơi bơtiàn mê dê kung rơp oă be sơmañ hơ̆ sơl.” 19#Sơnròp 17:17.Abraham gŏ să jan he mòr chơt, (bơh neh mòr dô rhiang nam) mơ gŏ Sara kung ò rgơi deh tai, mơya bơta dòn ồng dê ò gơhuc. 20Abraham ò roh bơta dòn, ò gơs nùs pin wil wơl tòm jơnau ho Yàng Tom Trồ dê, mơya sơlo pràn kơldang tòm bơta dòn, mơ kư̆ jòng ro Yàng Tom Trồ, 21bơh ồng dòn nền ngan lah bơta lơi Yàng Tom Trồ neh ho pơgon, gen Kơnràñ kung gơs gơnoar lơh gơs bơta hơ̆. 22Behơ̆ tàng, bơta dòn ồng dê neh geh kòp la song ring.

23Mơ tai, “bơta dòn ồng dê neh geh kòp la song ring,” jơnau do ò di geh cih mìng bơh dô nă khai in, 24mơya kung bơh bol he la cau rơp geh kòp behơ̆ sơl, la cau dòn di Bơtau neh lơh Yàng Jesu in, la Yàng bol he dê, kis wơl bơh bơta chơt. 25#Esai 53:4-5.Kơnràñ neh kòl bơtào nàng kong chơt bơh tồi glài bol he dê, mơ kis wơl nàng bol he in geh kòp la song ring mơ Yàng Tom Trồ.

Currently Selected:

Rôma 4: KPM2018

Highlight

Copy

Compare