Khà Làng Bol 32
32
Ală jơi bơtiàn đah ne Jordan
1Ală cau Ruben mơ ală cau Gat gơs oă ngan mpồl phan poan jơng. Tòm tŭ bol khai neh sền gŏ ù tiah Jajer mơ Galaat dê la niam nàng ròng ală phan poan jơng. 2Behơ̆ bol khai lòt tus hơ Môise mơ Eleajar cau gơnoar ơn phan duh khoai mơ ală cau gơnoar at bồ mpồl jơnum, mơ đơs lah: 3“Atarôt, Dibôn, Jajer, Nimrah, Hesbôn, Elealeh, Sebam, Nebô mơ Beôn 4ù tiah mơ Yàng Jehôwa neh ơn di đap làng bol Israel, la di nàng ròng ală phan poan jơng.” 5Bol khai đơs tai lah: “Dilah bol hi geh bơta nđàc di đap mat ồng, dan ai ală cau duh broă ồng in ù tiah hơ̆ lơh gơs sre brê. Dan bañ sồr bol hi tiă hiòng Jordan.”
6Môise đơs mơ ală cau Gat mơ ală cau Ruben lah: “Ală cau dô lơgar bal mơ bol mê pal lòt tòmlơh ñchi bơh tài bol mê ơm tềng do taih?
7Ñchi bơh tài bol mê lơh ală cau Israel in gơplơ̆ nùs ò mut tòm tiah Yàng Jehôwa neh ai bol khai in taih? 8#Khà 13:17-33.Hơ̆ la bơta mơ ală ồng pàng bol mê neh lơh tòm tŭ añ sồr bol khai bơh di Kades Barnea lòt sền rwang lơgar. 9Tơnơ̆ mơ tŭ bol khai neh guh tus hơ Thòng Eskol mơ sền gŏ lơgar, bol khai lơh ală cau Israel in gơplơ̆ nùs ò mut tòm lơgar mơ Yàng Jehôwa neh ai bol khai in. 10#Khà 14:26-35.Bơta gơjrañ Yàng Jehôwa dê gơhào khuh tòm ngai hơ̆ mơ Kơnràñ neh srat să ho nền jơnau ho do: 11‘Tài bơh bol khai ò jơh nùs lòt jat Añ, gen ò gơs dô nă cau klau lơi bàr jơt nam hala dờng rlau neh lik bơh di Ejiptơ rơp gŏ ù tiah mơ Añ neh srat să ho nền ai Abraham, Isak mơ Jakôp in 12ò gơs dô nă cau klau lơi, mìng Kalep kòn klau Jephune cau Kenit mơ Jôsue kòn klau Nun, bơh bol khai neh lơh nùs lòt jat Yàng Jehôwa.’ 13Bơta gơjrañ Yàng Jehôwa dê neh gơhào khuh tòmdră mơ Israel mơ Kơnràñ neh lơh bol khai in lòt nrah nring tòm ƀlàng ngềt ngơt tòm poan jơt nam, jơl tus di tŭ jơh dô rài ală cau neh lơh iơh di đap Kơnràñ neh chơt jơh. 14Mơ tŭ do bol mê la ală kòn sau jơi bơtiàn cau tồi glài, ntào di tiah#32:14 hala đòm jat krơh. ală ồng pàng bol mê dê mơ lơh Yàng Jehôwa in sơlo gơjrañ rlau tai di Israel. 15Dilah bol mê wơlke ò lòt jat Kơnràñ tai, Kơnràñ kung rơp sang lòi jơh làng bol do, mơ bol mê la kai lơh bol khai in kong chơt roh.”
16Gen bol khai lòt tus hơ Môise mơ Arôn mơ đơs lah: “Tềng do bol hi kòñ bơt bơtào ală wàng Kơnrồ mơ belàt bol hi dê mơ ală ƀòn dờng ală cau mơ ală kòn sau bol hi in. 17Mơya bol hi neh rcang sir să tòm bol hi dê nàng at phan tòmlơh lòt di đap ală cau Israel jơl tus di tŭ bol hi neh cèng bol khai tus di tiah bol khai dê. Kung tòm tŭ hơ̆ ală cau ùr mơ ală kòn sau bol hi dê rơp ơm tòm ală ƀòn dờng kơ̆ cê nàng geh sền gàr klàs bơh di ală cau ơm tòm lơgar do. 18Bol hi rơp ò rê wơl hơ ală hìu tòm bol hi dê jơl tus di tŭ kòp nă cau Israel neh dòp geh sre brê khai dê. 19Bol hi rơp ò dòp sre brê lơi bal mơ bol khai đah ne Jordan, tài bơh sre brê bol hi dê neh geh dòp đah mattơngai lik Jordan dê.”
20Gen Môise đơs mơ bol khai lah: “Dilah bol mê rơp lơh behơ̆, dilah bol mê rơp at phan tòmlơh bol mê dê di đap Yàng Jehôwa nàng tòmlơh, 21mơ dilah jơh tơl nă bol mê at phan tòmlơh mơ tiă đah ne Jordan di đap Yàng Jehôwa jơl tus di tŭ Kơnràñ neh bơtrơh jơh ală cau sò tơm Kơnràñ dê bơh di đap Kơnràñ. 22Mơ tòm tŭ neh geh lơgar di đap Yàng Jehôwa, gen bol mê rgơi rê wơl mơ geh khat gơboh bơh di broă pal lơh bol mê dê gơwèt hơ Yàng Jehôwa mơ gơwèt hơ Israel. Mơ lơgar hơ̆ rơp la sre brê bol mê dê di đap Yàng Jehôwa. 23Mơya dilah bol mê ò lơh jat behơ̆ gen bol mê tìs glài mơ Yàng Jehôwa; mơ bol mê git nền ngan lah tồi glài bol mê rơp gơtuh wơl hơđang bồ bol mê dê. 24Bơt bơtào tĕ ală ƀòn dờng ală cau ùr mơ ală kòn sau bol mê in, mơ ală wàng phan poan jơng bol mê in, mơya lơh tĕ jat ală jơnau bol mê neh ho.”
25Ală cau Gat mơ ală cau Ruben đơs mơ Môise lah: “Bol hi la ală cau duh broă ồng dê rơp lơh jat ală jơnau sồr cau tòm at bồ bol hi dê. 26Ală kòn sau mơ ală bau ùr bol hi dê, ală mpồl kơnrồ mơ belàt bol hi dê rơp ơm wơl tềng do tòm ală ƀòn dờng Galaat dê. 27Mơya ală cau duh broă ồng dê, kòp nă cau klau neh àñ ală phan tòmlơh rơp tiă hơ đah ne nàng tòmlơh di đap Yàng Jehôwa tòm toh jat be jơnau cau tòm at bồ bol hi dê neh đơs.”
28 #
Jôs 1:12-15. Gen Môise ai ală jơnau sồr bơh broă bol khai, Eleajar cau gơnoar ơn phan duh khoai, mơ Jôsue kòn klau Nun in mơ ală cau at bồ hìu nhă ală jơi bơtiàn Israel in. 29Khai đơs mơ bol khai lah: “Dilah ală cau Gat mơ ală cau Ruben, kòp nă cau klau neh àñ ală phan tòmlơh mơ tiă hiòng Jordan bal mơ bol mê di đap Yàng Jehôwa, gen tòm tŭ neh tòmpìt ai lơgar di đap bol mê rau gen ai tĕ bol khai ù tiah Galaat lơh gơs sre brê bol khai dê. 30Mơya dilah bol khai ò àñ phan tòmlơh mơ tiă hiòng bal mơ bol mê gen bol khai pal dòp sre brê bal mơ bol mê tòm Kanaan.”
31Ală cau Gat mơ cau Ruben ho wơl lah: “Ală cau duh broă ồng dê rơp lơh jat jơnau mơ Yàng Jehôwa neh đơs. 32Bol hi rơp mă àñ phan tòmlơh mơ tiă hiòng mut tòm Kanaan di đap Yàng Jehôwa, mơya sre brê mơ bol hi dòp geh rơp ơm đah do hiòng Jordan.”
33Gen Môise ai ală cau Gat, ală cau Ruben, mơ nggùl jơi bơtiàn Manase kòn klau Jôsep in lơgar bơtau Sihôn dê at bồ cau Amôr, mơ lơgar bơtau Ok dê la cau at bồ cau Basan, jơh dô nơm lơgar bal mơ ală ƀòn dờng mơ ù tiah gùt dar.
34Ală cau Gat bơt bơtào Dibôn, Atarôt, Arôer, 35Atrôt Sôphan, Jajer, Jokbeha, 36Bet Nimrah mơ Bet Haran lơh gơs ală ƀòn dờng kơ̆ cê, mơ bơt ală wàng ală mpồl belàt bol khai in. 37Mơ ală cau Ruben bơt bơtào wơl Hesbôn, Eleale mơ Kiriathaim, 38Kung bơt Nebô mơ Baal Meôn (ală sơnđan do neh tòmgơl) mơ Sipmah. Bol khai tơmoh sơnđan ală ƀòn dờng mơ bol khai bơt bơtào wơl. 39Ală kòn sau Makir kòn klau Manase dê lòt tus hơ Galaat, tòmpìt ai gơ mơ ting bơtrơh ală cau Amôr neh ơm tềng hơ̆. 40Behơ̆ Môise ai Galaat ală cau Makir in la ală kòn sau Manase dê, mơ bol khai ơm tơn tềng hơ̆. 41Jair dô nă kòn sau Manase dê, tòmpìt ai ală tiah jơnum làng bol bol khai dê mơ sơnđan bol gơ la Habôt Jair.#32:41 Habôt Jair: la ƀòn Jair. 42Mơ Nôba tòmpìt ai Kenat mơ ală ƀòn gùt dar gơ mơ sơnđan gơ la Nôba jat sơnđan să tòm khai dê.
Currently Selected:
Khà Làng Bol 32: KPM2018
Highlight
Copy
Compare
Share
Want to have your highlights saved across all your devices? Sign up or sign in
© 2018 United Bible Societies. All rights reserved.
