Khà Làng Bol 29
29
Pơjum sa ală kơlwòk
1“Di di ngai sơnròp kơnhai poh, bol mê bơtào tĕ dô bơta pơjum ơn is sàng goh mơ bañ lơh broă òs lơh. Hơ̆ la dô ngai ơn is bol mê in nàng uh ală kơlwòk. 2Ơn tĕ Yàng Jehôwa in phan ơn duh khoai gơs ƀô bơlhu niam nùs Kơnràñ gen rcang tĕ dô nơm phan ơn duh khoai chu pơrguc mơ dô nơm kơnrồ gam dềt, dô nơm belàt dam mơ poh nơm belàt kòn gơs dô nam, jơh ală bol gơ pal ò gơs tềl sồt. 3Bal mơ kơnrồ dam gen rcang gơs tĕ dô nơm phan ơn duh khoai mơ kòi mbo la pe pơnah jơt epha kơmbuh phe rhền bơcă bal mơ mơñà; bal mơ belàt dam gen bàr pơnah jơt; 4bal mơ kòp nơm tòm poh nơm belàt kòn gen dô pơnah jơt. 5Ơn bal tĕ dô nơm be dam lơh gơs phan ơn duh khoai tơwài glài mê in. 6Ală phan do la phan ơn bơtơl mơ phan ơn duh khoai chu pơrguc kòp kơnhai mơ kòp ngai bal mơ ală phan ơn duh khoai mơ kòi mbo mơ ală phan ơn pơdơng duh khoai jat be neh lơh nền. Hơ̆ la ală phan ơn duh khoai chu pơrguc ơn Yàng Jehôwa in gơs ƀô bơlhu niam.
Ngai ơn phan duh khoai tơwài glài
7 #
Leb 16:29-34. Tòm ngai jơt kơnhai poh do hòi pơjum tĕ dô bơta pơjum ơn is sàng goh. Bol mê pal pơndang sang să he#29:7 hala pal ơt sa. mơ bañ lơh dô nơm broă òs lơh lơi. 8Ơn tĕ gơs ƀô bơlhu niam nùs Yàng Jehôwa in dô nơm phan ơn duh khoai chu pơrguc mơ dô nơm kơnrồ dam gam dềt, dô nơm belàt dam mơ poh nơm belàt dam gơs dô nam, jơh ală phan hơ̆ pal ò gơs sồt rmàñ. 9Bal mơ kơnrồ dam gen rcang gơs tĕ dô nơm phan ơn duh khoai mơ kòi mbo la pe pơnah jơt epha kơmbuh phe rhền bơcă bal mơ mơñà; bal mơ belàt dam gen ơn tĕ bàr pơnah jơt; 10bal mơ kòp nơm tòm poh nơm belàt kòn gen ơn tĕ dô pơnah jơt. 11Ơn tĕ dô nơm be dam lơh gơs phan ơn tơwài glài bơtơl hơđang phan ơn tơwài glài nàng tơwài glài mơ phan ơn chu pơrguc òs ơn bal mơ phan ơn mơ kòi mbo, mơ ală phan ơn ñô.
Ngai wèr Sàl Ing
12 #
Leb 23:34; Yalw 16:13-15. Tòm ngai jơt pram#29:12 hala ngai ndar me. kơnhai poh, pơjum tĕ dô bơta pơjum ơn is sàng goh mơ bañ lơh broă òs lơh. Pơjum sa tĕ dô ngai pơjum sa Yàng Jehôwa in tòm poh ngai. 13Ơn tĕ dô nơm phan ơn duh khoai chu tòm ồs lơh gơs ƀô bơlhô niam nùs Yàng Jehôwa in, dô nơm phan ơn duh khoai chu pơrguc mơ jơt pe nơm kơnrồ dam gam dềt bàr nơm belàt dam dờng mơ jơt poan nơm belàt dam dô nam mơ ò gơs tềl sồt. 14Bal mơ kòp nơm tòm jơt poan nơm kơnrồ dam gen rcang gơs tĕ dô nơm phan ơn mơ kòi mbo gơs pe pơnah jơt epha kơmbuh phe rhền bơcă bal mơ mơñà; bal mơ kòp nơm tòm bàr nơm belàt dam gen ơn bàr pơnah jơt; 15bal mơ kòp nơm tòm jơt poan nơm belàt kòn gen ơn dô pơnah jơt. 16Kung ơn tĕ bal mơ dô nơm be dam lơh gơs phan ơn tơwài glài, bơtơl hơđang phan ơn chu pơrguc òs ơn bal mơ phan ơn mơ kòi mbo mơ phan ơn pơdơng hùc.
17Tòm ngai bàr gen rcang gơs tĕ jơt bàr nơm kơnrồ dam gam dềt, bàr nơm belàt dam mơ jơt poan nơm belàt kòn gơs dô nam, jơh bol gơ pal ò gơs tềl sồt. 18Bal mơ ală kơnrồ dam, ală be dam mơ ală belàt kòn gen rcang gơs tĕ ală phan ơn mơ kòi mbo, mơ ală phan ơn pơdơng jat be ntum khà neh lơh nền gơ dê. 19Kung ơn tĕ dô nơm be dam lơh gơs phan ơn tơwài glài, bơtơl hơđang phan ơn chu pơrguc òs ơn bal mơ phan ơn kòi mbo, mơ phan ơn pơdơng hùc.
20Tòm ngai pe, rcang gơs tĕ jơt dùl nơm kơnrồ dam, bàr nơm belàt dam mơ jơt poan nơm belàt kòn dam dô nam, jơh bol gơ ò gơs tềl sồt rmàñ. 21Bal mơ ală kơnrồ dam, ală belàt dam mơ ală belàt kòn, rcang gơs tĕ ală phan ơn mơ kòi mbo mơ ală phan ơn pơdơng jat ntum khà neh lơh nền. 22Ơn bal tĕ dô nơm be dam lơh gơs phan ơn tơwài glài, bơtơl hơđang phan ơn chu pơrguc òs ơn bal mơ phan ơn kòi mbo mơ phan ơn pơdơng hùc.
23Tòm ngai dơ̆ poan, rcang tĕ gơs jơt poan nơm kơnrồ dam, bàr nơm belàt dam mơ jơt poan nơm belàt dam dô nam, jơh ală bol gơ ò gơs tềl sồt, 24bal mơ ală kơnrồ dam, ală belàt dam mơ ală belàt kòn gen rcang gơs tĕ ală phan ơn mơ kòi mbo mơ phan ơn pơdơng hùc bol gơ dê jat be ntum khà neh lơh nền. 25Ơn bal tĕ dô nơm be dam lơh gơs phan ơn tơwài glài, bơtơl hơđang phan ơn chu pơrguc òs ơn bal mơ phan ơn mơ kòi mbo mơ phan ơn pơdơng hùc.
26Tòm ngai pram, gen rcang tĕ sin nơm kơnrồ dam, bàr nơm belàt dam mơ jơt poan nơm belàt kòn dô nam, jơh ală bol gơ ò gơs tềl sồt. 27Bal mơ ală kơnrồ dam, ală belàt dam mơ ală belàt kòn gen rcang tĕ ală phan ơn kòi mbo mơ phan ơn pơdơng hùc bol gơ dê jat be ntum khà neh lơh nền. 28Ơn bal tĕ dô nơm be dam lơh gơs phan ơn tơwài glài, bơtơl hơđang phan ơn chu pơrguc òs ơn bal mơ phan ơn mơ kòi mbo mơ phan ơn pơdơng hùc.
29Tòm ngai prau gen rcang gơs tĕ phàm nơm kơnrồ dam, bàr nơm belàt dam mơ jơt poan nơm belàt kòn gơs dô nam, jơh ală bol gơ pal ò gơs sồt. 30Bal mơ ală kơnrồ dam, ală belàt dam mơ ală belàt kòn gen rcang tĕ ală phan ơn kòi mbo mơ phan ơn pơdơng hùc bol gơ dê jat be ntum khà neh lơh nền. 31Ơn bal tĕ dô nơm be dam lơh gơs phan ơn tơwài glài, bơtơl hơđang phan ơn chu pơrguc òs ơn bal mơ phan ơn kòi mbo mơ phan ơn pơdơng hùc.
32Tòm ngai poh gen rcang tĕ gơs poh nơm kơnrồ dam, bàr nơm belàt dam mơ jơt poan nơm belàt kòn dô nam, jơh ală bol gơ ò gơs tềl sồt rmàñ. 33Bal mơ ală kơnrồ dam, ală belàt dam mơ ală belàt kòn gen rcang gơs tĕ ală phan ơn kòi mbo mơ phan ơn pơdơng hùc bol gơ dê jat be ntum khà neh lơh nền. 34Ơn bal tĕ dô nơm be dam lơh gơs phan ơn tơwài glài, bơtơl hơđang phan ơn chu pơrguc òs ơn bal mơ phan ơn kòi mbo mơ phan ơn pơdơng hùc.
35Tòm ngai dơ̆ phàm, gen ơn is dô bơta pơjum mơ bañ lơh broă òs lơh. 36Ơn tĕ dô nơm phan ơn duh khoai chu tòm ồs lơh gơs ƀô bơlhu niam nùs Yàng Jehôwa in, mơ jơt pe nơm kơnrồ dam gam dềt, bàr nơm belàt dam mơ jơt poan nơm belàt dam dô nam mơ ò gơs tềl sồt rmàñ lơh gơs dô nơm phan ơn duh khoai chu pơrguc. 37Bal mơ kơnrồ dam, belàt dam mơ ală belàt kòn gen rcang gơs tĕ ală phan ơn mơ kòi mbo mơ phan ơn pơdơng hùc bol gơ dê jat be ntum khà neh lơh nền. 38Ơn bal tĕ dô nơm be dam lơh gơs phan ơn tơwài glài, bơtơl hơđang phan ơn chu pơrguc òs ơn bal mơ phan ơn kòi mbo mơ phan ơn pơdơng hùc. 39Bơtơl tĕ hơđang jơnau bol mê neh srat să ho nền, mơ ală phan ơn jat nùs kòñ bol mê dê gen rcang tĕ ală bơta do Yàng Jehôwa in tòm ală bơta pơjum sa neh bơtào gơs: ală phan ơn chu pơrguc, ală phan ơn mơ kòi mbo, ală phan ơn pơdơng hùc mơ ală phan ơn ring lơngai.”#29:39 hala phan ơn gơtòmklac. 40Môise yal wơl ală cau Israel in jơh ală jơnau Yàng Jehôwa neh sồr khai.
Currently Selected:
Khà Làng Bol 29: KPM2018
Highlight
Copy
Compare
Share
Want to have your highlights saved across all your devices? Sign up or sign in
© 2018 United Bible Societies. All rights reserved.
