Khà Làng Bol 23
23
Jơnau đơs hwơr sơnròp ngan Balaam dê
1Balaam đơs lah: “Bơt tĕ añ in poh nơm cơnòng duh khoai tềng do, mơ rcang añ in poh nơm kơnrồ dam mơ poh nơm belàt dam.” 2Balak lơh jat be jơnau Balaam đơs, mơ bàr nă bol khai ơn dô nơm kơnrồ dam mơ dô nơm belàt dam hơđang kòp nơm cơnòng duh khoai. 3Lồc behơ̆ Balaam đơs mơ Balak lah: “Ơm tĕ tềng do, di gah phan ơn duh khoai bơtau dê tòm tŭ añ lòt đah ne. Digơlan Yàng Jehôwa rơp tus mơ tìp mat mơ añ. Jơnau lơi Kơnràñ yal tơlik añ in gen añ rơp yal wơl bơtau in.” Gen khai lik lòt tus hơ dô bă tiah hơđang. 4Yàng Tom Trồ tơlik mat mơ Balaam mơ khai đơs lah: “Añ neh rcang sir poh nơm cơnòng duh khoai, mơ hơđang kòp nơm cơnòng duh khoai añ neh ơn dô nơm kơnrồ dam mơ dô nơm belàt dam.” 5Yàng Jehôwa ơn dô jơnau sồr tòm bơr Balaam dê mơ đơs lah: “Rê wơl tĕ mơ Balak mơ yal khai in git jơnau sồr do.” 6Behơ̆ Balaam rê wơl hơ Balak, mơ gŏ Balak ntào di gah phan ơn duh khoai khai dê, bal mơ jơh ală cau kwang dờng Môap dê. 7Gen Balaam đơs ală jơnau đơs hwơr do:
“Balak neh cèng añ tus bơh di Aram,
bơtau Môap neh tus bơh di ală mơnơm đah Mattơngai lik. Khai đơs lah:
‘Tus tĕ srat sơntơm Jakôp añ in;
tus tĕ yă wơn Israel.’
8Mbe añ rgơi srat sơntơm ală cau mơ Yàng Tom Trồ ò srat sơntơm taih?
Mbe añ rgơi yă wơn ală cau mơ Yàng Tom Trồ ò yă wơn taih?
9Bơh hơđang bồ mơnơm lŭ, añ sền gŏ bol khai;
bơh di hơđang ală dòr añ neh gŏ bol khai.
Añ gŏ dô nơm làng bol ơm kis cah is,
mơ ò kòp să tòm bol khai la dô nơm làng bol tòm ală làng bol.
10Ñcau rgơi kòp thul ơmul Jakôp dê,
mơ kòp khà dô pơnah poan Israel dê taih?
Lòi tĕ añ in chơt kung be cau song ring chơt,
mơ dan bơta lồi dut añ jê gơlơh ndròm bal kung be bol khai dê!”
11Balak đơs mơ Balaam lah: “Ñchi mê lơh di añ taih? Añ neh cèng mê tus nàng srat sơntơm ală cau sò tơm di añ, mơya mê ò lơh bơta lơi rlau mơ ai lơngai bol khai in!” 12Balaam ho wơl lah: “Añ ò di pal đơs ală jơnau mơ Yàng Jehôwa neh ơn tòm bơr añ jê ò ơ?”
Jơnau đơs hwơr dơ̆ bàr Balaam dê
13Gen Balak đơs mơ Balaam lah: “lòt tĕ mơ añ tus hơ dô bă tiah ndai mơ mê rgơi sền gŏ bol khai; mê rơp gŏ dô pơnah lơm mơya ò di jơh tơl nă bol khai ò. Mơ bơh tềng hơ̆, mê srat sơntơm tĕ bol khai añ in.” 14Behơ̆, Balak cèng Balaam tus hơ ƀlàng sre Sôphim dê, hơđang bồ mơnơm Pisga, mơ tềng hơ̆ khai bơt bơtào poh nơm cơnòng duh khoai mơ ơn dô nơm kơnrồ dam mơ dô nơm belàt dam hơđang kòp nơm cơnòng duh khoai. 15Balaam đơs mơ Balak lah: “Dan bơtau ơm wơl tềng do, di gah phan ơn duh khoai bơtau dê tòm tŭ añ tìp mat mơ Yàng Jehôwa đah ne.” 16Yàng Jehôwa tìp mơ Balaam mơ ơn dô jơnau đơs hwơr tòm bơr khai dê mơ đơs lah: “Rê wơl tĕ hơ Balak mơ yal khai in jơnau đơs hwơr do.”
17Behơ̆ Balaam rê wơl hơ Balak mơ gŏ khai ntào di gah phan ơn duh khoai khai dê bal mơ ală cau kwang dờng Môap dê. Balak lùp Balaam lah: “Ñchi jơnau Yàng Jehôwa neh đơs taih?” 18Gen Balaam đơs ală jơnau đơs hwơr do:
“Ơ Balak, guh tĕ mơ ơm iat;
ơ kòn klau Sippôr dê, iat tĕ añ.
19Yàng Tom Trồ ò di la cau mơ rgơi đơs blac,
kung ò di la kòn mơnus tòmgơl nùs kơlôi Kơnràñ dê.
Kơnràñ đơs mơ ò lơh sơl ơ?
Kơnràñ neh hơ pơgon mơ ò lơh jat sơl ơ?
20Añ neh dòp dô jơnau gơnoar sồr nàng ai lơngai;
Kơnràñ neh ai lơngai, mơ añ ò rgơi tòmgơl bơta hơ̆.
21Ò jòi gŏ bơta tồi glài tòm Jakôp,
ò jòi bàn bơta dồn sa rƀah tòm Israel.
Jehôwa Yàng Tom Trồ bol khai dê ơm bal mơ bol khai;
jơnau driau dờng jòng ro Bơtau ơm digùl bol khai.
22Yàng Tom Trồ neh cèng bol khai lik klàs bơh di Ejiptơ;
bol khai gơs bơta pràn kơldang kơnrồ brê dê.
23Ò gơs bơta juh proh tòmdră mơ Jakôp,
ò gơs bơta sền dà tòmdră mơ Israel.
Tŭ do rơp đơs bơh Jakôp mơ bơh Israel lah:
‘Sền tĕ ñchi bơta Yàng Tom Trồ neh lơh!’
24Làng bol ñă ntào kung be dô nơm klìu triă me;
bol khai tơngguh is bol khai dê kung be dô nơm klìu triă
gơ ò bài bic rlô jơl tus di tŭ gơ neh sa loan phan gơ neh kup
mơ hùc mhàm ală phan gơ neh kup geh.”
25Gen Balak đơs mơ Balaam lah: “Bañ srat sơntơm bol khai dô jơnau lơi mơ kung bañ ai lơngai bol khai in dô êt lơi!” 26Balaam ho lah: “Añ ò di neh đơs mơ bơtau lah añ pal lơh jat bơta lơi Yàng Jehôwa đơs ò ơ?”
Jơnau đơs hwơr dơ̆ pe Balaam dê
27Gen Balak đơs mơ Balaam lah: “Tus tĕ, lòi añ lam mê tus hơ dô bă tiah ndai. Digơlan Yàng Tom Trồ rơp niam nùs lòi mê srat sơntơm bol khai tềng hơ̆.” 28Mơ Balak lam Balaam guh hơ bồ Pheor, sền gŏ làm ƀlàng ngềt ngơt. 29Balaam đơs lah: “Bơtào tĕ añ in poh nơm cơnòng duh khoai tềng do, mơ rcang gơs poh nơm kơnrồ dam mơ poh nơm belàt dam añ in.” 30Balak lơh jat be jơnau Balaam neh đơs, mơ ơn dô nơm kơnrồ dam mơ dô nơm belàt dam hơđang kòp cơnòng duh khoai.
Currently Selected:
Khà Làng Bol 23: KPM2018
Highlight
Copy
Compare
Share
Want to have your highlights saved across all your devices? Sign up or sign in
© 2018 United Bible Societies. All rights reserved.
