Khà Làng Bol 10
10
Ală kơlwòk priă
1Yàng Jehôwa đơs mơ Môise lah: 2“Lơh tĕ bàr nơm kơlwòk mơ priă klơn lơho, mơ ngui gơ nàng hòi pơjum mpồl jơnum mơ sồr bol khai lik lòt. 3Tòm tŭ cau uh jơh bàr nơm gen jơh dô mpồl jơnum pal pơjum bal di đap mê di tiah mut Sàl Tòm Mat dê. 4Dilah cau uh mìng dô nơm lơm gen ală cau kwang lam bồ la ală cau at bồ mpồl hìu nhă Israel dê pal pơjum bal di đap mê. 5Tòm tŭ kơno cau uh kơlwòk ntas dờng gen ală jơi bơtiàn neh lơh sàl đah mattơngai lik rơp lik lòt. 6Tòm tŭ cau uh dơ̆ bàr kơlwòk ntas dờng gen ală sàl đah đơm rơp lik lòt. Kơlwòk ntas dờng rơp la tềl sơnio nàng lik lòt. 7Kòñ pơjum bal mpồl jơnum gen uh tĕ ală kơlwòk, mơya ò di uh dô sap ndròm bal. 8Ală kòn klau Arôn dê la ală cau gơnoar ơn phan duh khoai rơp uh ală kơlwòk. Bơta hơ̆ rơp la dô jơnau sồr gam sùm sùm mê in mơ ală rài tơnơ̆ in.
9Tòm tŭ bol mê lik lòt tòmlơh tòm lơgar tòm bol mê dê tòmdră mơ cau sò tơm rồn bơklơn bol mê gen uh tĕ ală kơlwòk ntas dờng. Gen Jehôwa Yàng Tom Trồ bol mê dê rơp kah wơl bol mê mơ dong tă bol mê bơh di ală cau sò tơm bol mê dê. 10Kung behơ̆ sơl, di di ală tŭ hòn chò bol mê dê la ală bơta pơjum sa neh lơh nền mơ ală bơta pơjum sa Ngai Kơnhai Dùl Lik, gen bol mê uh tĕ ală kơlwòk tòm tŭ ơn phan duh khoai chu pơrguc mơ phan duh khoai bơta Ring Lơngai, mơ rơp la dô bơta kah kirsơnre bol mê in di đap Yàng Tom Trồ bol mê dê. Añ la Jehôwa Yàng Tom Trồ bol mê dê.”
Pah tơngai ơm ing tòm ƀlàng ngềt ngơt
(10:11 – 21:35)
Ală cau Israel lik lòt bơh di Sinai
11Tòm ngai bàr jơt kơnhai bàr nam bàr, mhwal guh bơh hơđang Hìu Ing Duh Khoai Bơta Cơng Tàng dê. 12Gen ală cau Israel lik lòt bơh di ƀlàng ngềt ngơt Sinai mơ lòt bơh tiah do tus hơ tiah ne, jơl tus di tŭ mhwal ơm wơl tòm ƀlàng ngềt ngơt Pharan. 13Bol khai neh lik lòt dơ̆ sơnròp jat jơnau sồr Yàng Jehôwa dê bơh ồng Môise.
14Ală sàl ơm mpồl Juda dê lòt lài hơđap, hơđơm bồng bi bol khai dê. Nahasôn kòn klau Amminadap la cau lam bồ. 15Nethanel kòn klau Juar lam bồ mpồl jơi bơtiàn Isakar, 16mơ Eliap kòn klau Helôn lam bồ mpồl jơi bơtiàn Jebulun.
17Gen cau tă tơmù Hìu Ing Duh Khoai, ală cau Gersôn mơ ală cau Merari la cau àñ tùng gơlik lòt.
18Ală sàl mpồl Ruben dê lik lòt pơnjat tơnơ̆ bol hơ̆, hơđơm bồng bi bol khai dê. Elijur kòn klau Sedeur lam bồ bol khai. 19Selumiel kòn klau Jurisadai at bồ mpồl jơi bơtiàn Simeôn, 20mơ Eliasap kòn klau Deuel lam bồ mpồl jơi bơtiàn Gat.
21Gen ală cau Kôhat lik lòt, àñ tùng ală phan sàng goh. Hìu Ing Duh Khoai pal geh bơtào wơl lài mơ tŭ bol khai tus.
22Ală sàl mpồl Epraim dê lòt pơnjat tơnơ̆ mơ bol hơ̆, hơđơm bồng bi bol khai dê. Elisama kòn klau Ammihut la cau lam bồ. 23Gamaliel kòn klau Phedajur lam bồ mpồl jơi bơtiàn Manase, 24Abidan kòn klau Gideôni lam bồ mpồl jơi bơtiàn Benjamin. 25Lồi dut, ală sàl mpồl Dan dê lik lòt hơđơm bồng bi bol khai dê, lơh gơs cau kơp gàr đah ngkòi jơh ală mpồl in. Ahiejer kòn klau Ammisadai la cau lam bồ. 26Phagiel kòn klau Ôkran lam bồ mpồl jơi bơtiàn Aser dê, 27mơ Ahira kòn klau Enan lam bồ mpồl jơi bơtiàn Neptali.
28Hơ̆ la rơndap tap sèng lòt gùng ală mpồl Israel dê tòm tŭ bol khai lik lòt.
29Mơ tai, Môise neh đơs mơ Hôbap kòn klau Reuel cau Midian la po bèp Môise dê lah: “Bol hi lik lòt tus hơ tiah mơ Yàng Jehôwa neh đơs lah: ‘Añ rơp ai gơ bol mê in.’ Lòt tus tĕ bal mơ bol hi mơ bol hi rơp gơwèt niam mơ bol mê, bơh Yàng Jehôwa neh ho pơgon ală bơta niam Israel in.” 30Khai ho wơl lah: “Ò, añ rơp ò lòt; añ rơp rê wơl hơ lơgar tòm mơ làng bol tòm añ jê.” 31Mơya Môise đơs lah: “Dan bañ sang lòi bol hi. Bi git lah tiah lơi bol hi pal bơtào sàl ơm gen bi kung be gar mat bol hi dê. 32Dilah bi lòt bal mơ bol hi gen bol hi rơp tòmpà bi in ală bơta niam lơi mơ Yàng Jehôwa rơp ai bol hi in.”
33Behơ̆ bol khai lik lòt bơh di mơnơm Yàng Jehôwa dê mơ lòt gùng tòm pe ngai. Đài Bơta Ho Bal Yàng Jehôwa dê lòt di đap bol khai tòm pe ngai hơ̆ nàng jòi bol khai in dô bă tiah ơm rlô bòl. 34Mhwal Yàng Jehôwa dê ơm hơđang bol khai tòm trồ ngai tòm tŭ bol khai lik lòt bơh di sàl ơm.
35 #
Đơs Crih 68:1. Tŭ lơi Đài Bơta Ho Bal lik lòt, Môise đơs lah:
“Ơ Yàng Jehôwa, dan guh tĕ! Dan ală cau sò tơm di Kơnràñ rơp gơkòl dô gơprah gơpring;
dan ală cau sò tơm Kơnràñ dê ntoat dô di đap Kơnràñ.”
36Tŭ lơi gơ ơm rlô gen khai đơs lah:
“Ơ Jehôwa, dan rê wơl tĕ
hơ rbô rhiang cau Israel.”
Currently Selected:
Khà Làng Bol 10: KPM2018
Highlight
Copy
Compare
Share
Want to have your highlights saved across all your devices? Sign up or sign in
© 2018 United Bible Societies. All rights reserved.
