Mak 5

Yàng Jesu bơtrơh cà bơh di dô nă cau Jerase

(Mathiơ 8:28-34; Luka 8:26-39)

1Yàng Jesu bal mơ ală cau bơtê tus đah bơtĭ ne dàlềng Galile, tòm kơnhwàl làng bol Jerase. 2Yàng Jesu lik bơh ơhò, gen tŭ hơ̆ mo gơs dô nă cau kòl cà lơh lik bơh tiah bơtô ƀồc nàng tìp Kơnràñ. 3Khai òs ơm di tiah bơtô ƀồc, ò gơs cau lơi rgơi cap khai bulah ai sreng lòs; 4bơh neh oă dơ̆ khai kòl cau tơndò gơsàng hala cap mơ che sreng sơl, gen khai gơltac sreng mơ dơrkă#5:4 Cil: tơmpă. gơsàng hơ̆, ò gơs cau lơi gơs tơl pràn nàng geh at bồ khai. 5Khai òs ơm sùm di tiah bơtô ƀồc mơ hơđang mơnơm, ngai mơ mang hòi driau mơ ai lŭ còr să tòm. 6Khai gŏ Yàng Jesu bơh ngài, gen ntoat tus cùn khoai Kơnràñ, 7mơ hòi driau dờng lah: “Ơ Yàng Jesu, Kòn Yàng Tom Trồ Hơđang Rlau Jơh, gơs ñchi jơnau digùl añ mơ Kơnràñ taih? Añ ai sơnđan Yàng Tom Trồ nàng rac dan mơ Kơnràñ dan bañ lơh bòl glar di añ.” 8Bơh Yàng Jesu pa đơs mơ khai lah: “Ơ cà, lik tĕ bơh di cau do.” 9Kơnràñ lùp lah: “Ñchi sơnđan mê taih?” Khai ho lah: “Sơnđan añ la mpồl ling,#5:9 Dô mpồl ling Rôma pơgap 5.000-6.000 nă. bơh bol hi gal ngan.” 10Gơ rac dan tai mơ Kơnràñ bañ bơtrơh bol gơlik bơh kơnhwàl hơ̆.

11Tŭ hơ̆ gơs dô mpồl sur oă ngan ơm sa rềp hơđang dòr. 12Ală cà rac dan mơ Kơnràñ lah: “Dan ai bol hi in mut tòm ală sur hơ̆.” 13Yàng Jesu ai gơnoar bol gơ in. Ală cà lik bơh di cau hơ̆, gen mut tòm mpồl sur; mpồl sur hơ̆ pơgap di bàr rbô nơm, bơh kơh ntruñ tòm dàlềng, dà bŭ chơt jơh. 14Ală cau ê sur ntoat dô, yal wơl jơnau do tòm ƀòn dờng mơ tòm ƀòn dềt. Ƀòn lơgar lik lòt nàng sền bơta neh gơlik gơs hơ̆.

15Tòm tŭ bol khai tus hơ Yàng Jesu, gŏ cau neh gơkòl mpồl cà lơh hơ̆ ơm nggui, soh ồi ào, dơngoh jak niam be òs, gen bol khai rngòt rngơt ngan. 16Ală cau neh gŏ broă hơ̆ yal wơl bol khai in git jơnau neh gơlik gơs di cau neh gơkòl ală cà lơh mơ di mpồl sur hơ̆. 17Chòp bol khai rac dan mơ Kơnràñ lik bơh nhàr kơnhwàl lơgar bol khai dê. 18Tòm tŭ Kơnràñ rơp mut tòm ơhò, gen cau neh gơkòl ală cà lơh hơ̆ dan lòt jat Kơnràñ. 19Mơya Yàng Jesu ò ai, mơ đơs lah: “Rê tĕ hơ hìu mê, tòm tiah gơp bơtiàn mê, mơ yal wơl bol khai in bơta dờng màng ò git nđò mơ Yàng neh lơh mê in, mơ mbe lơi Kơnràñ neh kòñ nđàc di mê.” 20Behơ̆ khai lòt yal tơlik tòm kơnhwàl Dekapôl#5:20 Hơ̆ la: Jơt Ƀòn Dờng. ală bơta dờng màng ò git nđò mơ Yàng Jesu neh lơh khai in. Jơh ală cau ai lơh krơi ngan.

Kòn ùr Jeru dê mơ cau ùr kòp pìng mhàm

(Mathiơ 9:18-26; Luka 8:40-56)

21Tòm tŭ Yàng Jesu mut tòm ơhò mơ neh tiă wơl tus đah bơtĭ ne dà, gơs mpồl làng bol oă pơjum gùt dar Kơnràñ; Kơnràñ ntào di gah dàlềng. 22Jeru la dô nă cau at bồ hìu jum Juda lòt tus, gŏ Yàng Jesu, gen tơmbic să di jơng Kơnràñ, 23rac dan lah: “Kòn ùr dềt añ neh mòr chơt rau; dan Kơnràñ tus ơn tê hơđang khai nàng khai in gơs bòi mơ kis.” 24Yàng Jesu lòt bal mơ khai. Mpồl làng bol oă lòt jat bal mơ ntềt#5:24 Cil: kơnjêt. Kơnràñ.

25Mơ tai, gơs dô nă cau ùr kòp pìng mhàm neh jơt bàr nam rau, 26kong bòl glar ngan tòm tê oă cau gơnoar sơnơm, roh jơh jền priă phan mơna, mơya ò bòi dô êt lơi, ai kòp sơlo kơnjơ̆ rlau tai. 27Khai neh kơno yal bơh Yàng Jesu, gen khai ntềt mut bơh tơnơ̆ tòm gùl mpồl làng bol mơ ƀư di ào Kơnràñ. 28Bơh khai đơs is lah: “Dilah añ mìng ƀư di ào Kơnràñ gen añ rơp geh bòi.” 29Tŭ hơ̆ mo mhàm ò pìng tai. Khai git tòm să khai neh geh bòi rau.

30Tŭ hơ̆ mo Yàng Jesu git gơs gơnap gơnoar neh lik bơh Kơnràñ, gen wơlke hơ mpồl làng bol mơ lùp lah: “Ñcau neh ƀư di ào Añ taih?” 31Ală cau bơtê ho lah: “Kơnràñ gŏ mpồl làng bol ntềt Kơnràñ mơ Kơnràñ gam lùp wơl lah: ‘Ñcau neh ƀư di Añ taih?’”

32Mơya Yàng Jesu sền gùt dar nàng jòi ñcau neh lơh bơta hơ̆. 33Cau ùr git bơta neh gơlik gơs di khai gen rngòt rơm să, lòt tus tơmbic să di jơng Kơnràñ mơ yal song jơh ală bơta. 34Yàng Jesu đơs mơ khai lah: “Ơ kòn ùr, bơta dòn ai neh sơmbòi ai. Rê tĕ lơngap lơngai, mơ geh bòi tĕ kòp ai dê.”

35Tòm tŭ Yàng Jesu gam đơs jơnau do, gơs cau bơh hìu jum Jeru tus đơs mơ khai lah: “Kòn ùr ồng neh chơt rau, ñchi kòñ lơh tơmbòl tai Cau Bơto taih?”

36Mơya Yàng Jesu ò gơjal bơh jơnau hơ̆ gen đơs mơ khai lah: “Bañ rngòt, mìng dòn lơm.” 37Gen Kơnràñ ò ai cau lơi in jat Kơnràñ, mìng Pier, Jakơ mơ Jang la oh Jakơ dê lơm.

38Dơ̆ neh tus hơ hìu cau at bồ hìu jum Jeru, Kơnràñ gŏ dô mpồl cau lơh nggồr nggàc, cau ƀà ñìm, cau ƀà hòi driau pơt wòl. 39Neh mut tòm hìu rau, Kơnràñ đơs mơ bol khai lah: “Ñchi bơh tài bol mê lơh nggồr nggàc mơ ñìm rac behơ̆ taih? Oh dềt do ò chơt ò, mơya khai bic lơhă gơ dê.” 40Bol hơ̆ dơñŏ tơnhial di Kơnràñ. Behơ̆, Kơnràñ bơtrơh tơlik jơh ală bol khai, mơ cèng mè bèp oh dềt hơ̆ bal mơ pe nă cau bơtê Kơnràñ dê mut tòm ơdŭ tiah oh dềt bic. 41Kơnràñ at di tê khai mơ đơs lah: “Talitha koumi!” Gơtha la: “Ơ kòn ùr, Añ sồr ai guh tĕ!” 42Tŭ hơ̆ mo oh ùr hơ̆ guh mơ cơnđòa lòt, bơh khai neh tơl jơt bàr nam. Ală bol hơ̆ ai lơh crih crài oă ngan. 43Mơya Yàng Jesu bơkơŭ kràñ cê ală bol hơ̆ bañ yal cau lơi in git bơta hơ̆, mơ sồr ai oh ùr hơ̆ in sào.

Currently Selected:

Mak 5: KPM2018

Highlight

Copy

Compare