Mak 3

Yàng Jesu sơmbòi cau siar tê

(Mathiơ 12:9-14; Luka 6:6-11)

1Yàng Jesu mut wơl tòm hìu jum cau Juda, tềng hơ̆ gơs dô nă cau klau siar mpàng tê. 2Bol khai kơp sền Kơnràñ sơmbòi cau hơ̆ tòm ngai Saƀat hala ò, nàng yă Kơnràñ. 3Yàng Jesu đơs mơ cau siar mpàng tê lah: “Ñă tĕ, ntào digùl do.” 4Lồc behơ̆ Kơnràñ lùp bol khai lah: “Tòm ngai Saƀat geh gơnoar lơh broă niam hala broă iơh, dong klàs bơta kis hala tơnroh gơ taih?” Mơya bol khai ơm mŏ mŏ. 5Tŭ hơ̆ Kơnràñ sền làm di bol khai, gơjrañ mơ moat tài bơh nùs bol khai kră kơldang mơ tìs nrah, lồc behơ̆ Kơnràñ đơs mơ cau klau lah: “Pò tĕ tê mê dê.” Gen khai pò tê mơ gơ bòi. 6Tŭ hơ̆ mo ală cau Pharisi lik hơ bơdìh mơ bơyai bal mơ bơnòr cau Herôt dê nàng mbe lơh tồ tơnchơt Kơnràñ.

Mpồl làng bol di gah dàlềng Galile

7Yàng Jesu mơ ală cau bơtê Kơnràñ pleh lòt hơ gah dàlềng; gơs mpồl làng bol oă ngan bơh lơgar Galile lòt tus jat Kơnràñ. Bơh lơgar Jude. 8Jerusalem, lơgar Idume, lơgar đah ne hiòng Jordan, gùt dar Tirơ mơ Sidôn, kung gơs làng bol gal ngan kơno yal ală broă Kơnràñ lơh gen lòt tus hơ Kơnràñ. 9#Mak 4:1; Luk 5:1-3.Tài bơh làng bol oă ngan gen tàng Kơnràñ sồr cau bơtê rcang Kơnràñ in dô nơm ơhò dềt nàng Kơnràñ geh klàs bơh làng bol ntềt.#3:9 Cil: kơnjêt. 10Bơh Kơnràñ neh sơmbòi oă cau kòp jê gen tàng cau lơi gơs bơta kòp jê lơi kung ntềt sơrlèt nàng ƀư di Kơnràñ. 11Kòp dơ̆ ală cà gŏ Kơnràñ gen tơmbic să dê jơng Kơnràñ mơ hòi driau lah: “Kơnràñ la Kòn Yàng Tom Trồ!” 12Mơya Kơnràñ bơkơŭ bol gơ, ò ai yal cau lơi in git Kơnràñ.

Yàng Jesu sac rwah jơt bàr nă cau bơtê

(Mathiơ 10:1-4; Luka 9:12-16)

13Chòp Yàng Jesu guh hơđang mơnơm, hòi ală cau jat nùs Kơnràñ kòñ, gen ală cau hơ̆ lòt tus hơ Kơnràñ. 14Kơnràñ sac rwah jơt bàr nă sơnđan la cau gơnoar bơto dờng. Kơnràñ đơs mơ bol khai lah: “Añ sac rwah bol mê nàng ơm bal mơ Añ, mơ sồr lòt bơto yal, 15mơ ai gơnap gơnoar bol mê in bơtrơh cà.” 16Do la jơt bàr nă cau gơnoar bơto dờng mơ Kơnràñ neh sac: Simôn Kơnràñ sơnđan wơl la Pier, 17Jakơ kòn Sebede, mơ Jang la oh Jakơ dê, Kơnràñ sơnđan wơl bàr nă bol khai la Bôanerges, cih tơlik hơ̆ la ală kòn klau ntơr kơnàs dê; 18Andre, Philip, Bathelemi, Mathiơ, Thôma, Jakơ kòn Alphe, Thade, Simôn cau Kanaan,#3:18 Kananean: Jơnau do gơlik bơh jơnau cau Aram gơs gơtha la “ngac ngar, duh hul”. Tơnơ̆ wơl, mpồl do gơs sơnđan tòm jơnau Grek la “Selôt”, dô mpồl cau Juda kòñ gơboh dà lơgar kràñ cê nàng tòmdră mơ cau Rôma. 19mơ Juda Iskariôt, la cau pơrlơ̆ dră dê Kơnràñ.

Yàng Jesu mơ Beeljebul

(Mathiơ 12:22-32; Luka 11:14-23)

20Yàng Jesu mut tòm dô nơm hìu. Mpồl làng bol pơjum tai, tian gơs Kơnràñ mơ ală cau bơtê ò rgơi sào. 21Ală cau tòm hìu nhă Kơnràñ dê kơno behơ̆ gen tus nàng kup gàr Kơnràñ, bơh bol khai đơs lah: “Kơnràñ neh roh dơngoh jak rau.”

22 # Mat 9:34; 10:25. Ai ală cau bơto bơta boh lam mù bơh Jerusalem đơs lah: “Cau do kòl Beeljebul lơh, khai kơnòm di bơtau cà mơ bơtrơh cà.” 23Mơya Yàng Jesu hòi bol khai lòt tus, ai jơnau pơnyơu mơ đơs lah: “Mbe cà Satan rgơi bơtrơh Satan taih? 24Dilah lơgar lơi tòmcah is gen lơgar hơ̆ ò rgơi kơ̆ tai, 25mơ dilah hìu lơi tòmcah is gen hìu hơ̆ kung ò rgơi kơ̆ tai. 26Behơ̆ dilah lơgar cà Satan bơtào tòmsò is mơ tòmcah is gen ò gơs kơ̆ tai ò, mơya neh tus di lồi dut rài gơ rau. 27Ò gơs cau lơi rgơi mut tòm hìu cau pràn kơldang mơ phà kơñau phan, dilah lài ngan ò cap cau pràn hơ̆, gen sồng geh phà kơñau hìu khai dê. 28Añ đơs ngan mơ bol mê, jơh ală tồi glài rơp geh toh kòn sau jơi kòn mơnus in, mơ jơh ală jơnau tràl sơrbil bol khai đơs kung behơ̆ sơl; 29#Luk 12:10.mơya cau lơi đơs tràl sơrbil di Yàng Hwềng Goh gen ò gơs tŭ lơi geh toh glài ò, mơya gơkòl glài gam sùm sùm.” 30Yàng Jesu đơs behơ̆ tài bơh bol hơ̆ đơs lah: “Khai kòl cà lơh.”

Mè mơ oh mi Yàng Jesu dê

(Mathiơ 12:46-50; Luka 8:19-21)

31Mè mơ oh mi Yàng Jesu lòt tus, ntào hơ bơdìh mơ sồr cau hòi Kơnràñ. 32Mpồl làng bol nggui gùt dar Yàng Jesu, đơs mơ Kơnràñ lah: “Ne, mè mơ oh mi ồng dê ntào bơdìh jòi ồng.” 33Mơya Yàng Jesu ho lah: “Ñcau la mè mơ oh mi Añ taih?” 34Kơnràñ sền làm ală cau nggui gùt dar mơ đơs lah: “Do la mè Añ mơ oh mi Añ! 35Bơh cau lơi lơh jat nùs kòñ Yàng Tom Trồ dê, cau hơ̆ la oh mi, ruh lŏ mơ mè Añ jê.”

Currently Selected:

Mak 3: KPM2018

Highlight

Copy

Compare