Mak 1

Bơta rcang lài gơnoar broă Yàng Jesu dê

(1:1-13)

Gơnoar broă Jang Ƀaptis dê

(Mathiơ 3:1-12; Luka 3:1-18; Jang 1:19-28)

1Bơta rơp sơntòm Jơnau Niam Yàng Jesu Krist dê, la Kòn Yàng Tom Trồ. 2#Mal 3:1.Be neh cih tòm sră cau gơnoar hwơr Esai lah:

“Do, Añ sồr cau kong sồr Añ jê lòt tus di đap mê,

La cau rơp wàs gùng lài mê in.

3 # Esai 40:3. Gơs jơnau cau hòi driau tòm ƀlàng bràs lah:

Wàs tĕ gùng Yàng,

Bơsong tĕ ală gùng dềt Kơnràñ in.”

4Jang neh tus, lơh ƀaptem tòm ƀlàng bràs mơ bơto yal bơta ƀaptem bơh bơta gơjrañ sang glài nàng geh toh glài.#1:4 Rct: Jang Ƀaptis tus tòm ƀlàng ngềt ngơt, bơto yal bơta ƀaptem bơh bơta gơjrañ sang glài. 5Làm lơgar Jude mơ jơh làng bol tòm Jerusalem lòt tus hơ khai, yal glài he, mơ khai lơh ƀaptem bol hơ̆ in tòm hiòng Jordan. 6#II Bơtau 1:8.Jang soh ào sơnò làkđa, kơt che but mơ gơltau, sa srah nting mơ dà kròt brê. 7Khai bơto yal lah: “Bơtau tus tơnơ̆ añ gơs gơnoar dờng rlau mơ añ. Añ ò pal kun hồ che gơltau jă Kơnràñ dê. 8Añ lơh ƀaptem bol mê in mơ dà, mơya Kơnràñ rơp lơh ƀaptem bol mê in mơ Yàng Hwềng Goh.”

Yàng Jesu gơs ƀaptem mơ kong cà ràk ơniai

(Mathiơ 3:13 – 4:11; Luka 3:21-22; 4:1-13)

9Mơ tai, tòm ală ngai hơ̆ Yàng Jesu tus bơh Nasaret lơgar Galile, mơ Jang lơh ƀaptem Kơnràñ in tòm hiòng Jordan. 10Dơ̆ pa guh bơh dà, Kơnràñ gŏ ală tap trồ pò tơlik, mơ Yàng Hwềng Goh mù hơđang Kơnràñ be dô nơm sềm ntòp. 11#Sơnròp 22:2; Đơs Crih 2:7; Esai 42:1; Mat 3:17; 12:18; Mak 9:7; Luk 3:22.Mơ gơs jơnau bơh đang trồ đơs lah: “Mê la Kòn kòñ gơboh Añ jê, niam nùs Añ tòm jơh ală bơta.” 12Tŭ hơ̆ mo, Yàng Hwềng chồl Kơnràñ lòt tus tòm ƀlàng ngềt ngơt. 13Kơnràñ ơm tòm ƀlàng ngềt ngơt hơ̆ poan jơt ngai, kong cà Satan ơniai, ơm bal mơ ală phan poan jơng tòm brê, mơ gơs ală cau gơnrơh duh broă Kơnràñ.

Gơnoar broă Yàng Jesu tòm kơnhwàl Galile

(1:14 – 9:50)

Yàng Jesu rơp sơntòm gơnoar broă Kơnràñ dê. Ală cau bơtê sơnròp

(Mathiơ 4:12-22; Luka 4:14,15; 5:1-11)

14Tơnơ̆ mơ tŭ Jang gơkòl ơm jàm, Yàng Jesu lòt tus hơ Galile, bơto yal Jơnau Niam Yàng Tom Trồ dê, 15#Mat 3:2.mơ đơs lah: “Tơngai neh tơl, lơgar Yàng Tom Trồ neh tus rềp, ală bol mê gơjrañ sang glài tĕ mơ dòn Jơnau Niam.”

16Kơnràñ lòt rò gah dàlềng Galile, gŏ Simôn mơ Andre, oh khai, ơm dang bơtơng tòm dàlềng, bơh bol khai la cau kup ka. 17Yàng Jesu đơs mơ bol khai lah: “Jat tĕ Añ, Añ rơp lơh bol mê in gơlik gơs cau dang bơtơng cau.” 18Tŭ hơ̆ mo bol khai lòi bơtơng mơ jat Kơnràñ. 19Lòt ngài dô êt tai, Kơnràñ gŏ Jakơ kòn Sebede mơ oh khai la Jang, ơm srồt#1:19 Cil: srềp. bơtơng tòm ơhò. 20Chòp Kơnràñ hòi bol khai, gen bol khai lòi bèp bol khai la Sebede ơm wơl tòm ơhò bal mơ ală cau lơh ơpah, mơ bol khai lòt jat Kơnràñ.

Yàng Jesu sơmbòi cau gơkòl cà lơh

(Luka 4:31-37)

21Yàng Jesu mơ ală cau bơtê lòt tus hơ Kapenaum; di di ngai Saƀat, Kơnràñ mut mo tòm hìu jum mơ bơto sồr tềng hơ̆. 22#Mat 7:28-29.Bol khai ai lơh crih crài bơh bơta bơto sồr Kơnràñ dê, bơh Kơnràñ bơto bol khai dô bă gơs gơnoar, ò di be ală cau bơto bơta boh lam.

23Kung tòm tŭ hơ̆, tòm hìu jum gơs dô nă cau kòl cà lơh, 24hòi driau lah: “Ơ Jesu Cau Nasaret, bol hi mơ Kơnràñ gơs ñchi jơnau taih? Kơnràñ lòt tus nàng tơnroh bol hi ơ? Añ git Kơnràñ la ñcau, la Bơtau sàng goh Yàng Tom Trồ dê.” 25Mơya Yàng Jesu lah pơrhơng gơ lah: “Ơm mŏ mŏ tĕ! Mơ lik bơh di cau do!” 26Chòp cà sơrglơm cau hơ̆ pràn ngan, ai jơnau hòi driau dờng mơ lik bơh di khai. 27Cau lơi gŏ kung ai lơh crih crài ngan, tian gơs lùp bal lah: “Ñchi jơnau behơ̆ taih? Bơta bơto sồr pa ơ? Cau do ai gơnoar sồr ală cà mơ bol gơ kung dòn jơnau sơl!” 28Tŭ hơ̆ mo tiơng pơnro Yàng Jesu làm jơh gùt dar kơnhwàl Galile.

Yàng Jesu sơmbòi po me Pier

(Mathiơ 8:14-17; Luka 4:38,39)

29Pa lik bơh hìu jum cau Juda, gen Yàng Jesu mơ ală cau bơtê lòt bal mơ Jakơ mơ Jang mut mo tòm hìu Simôn mơ Andre. 30Mơ tai, po me Simôn ơm bic kòp prơm; tŭ hơ̆ mo cau yal mơ Kơnràñ bơh khai. 31Chòp Kơnràñ tus rềp, at di tê khai mơ yò tơngguh; phòt bòi kòp prơm, gen mò sơntòm duh broă bol khai in.

Yàng Jesu sơmbòi oă cau

(Luka 4:40, 41)

32Trồ mho tòm tŭ mattơngai ñơp, cau cèng jơh ală cau kòp jê mơ cau gơkòl cà lơh lòt tus hơ Yàng Jesu. 33Jơh ƀòn dờng pơjum di đap mpồng hìu. 34Kơnràñ sơmbòi oă cau bơh tơl ală bơta kòp jê, mơ bơtrơh oă cà, ò ai gơnoar ală cà in đơs, bơh bol gơ git Kơnràñ.

35Rìng àng ngai tơnơ̆, trồ gam jơngo, Kơnràñ guh, lik lòt tòm tiah ngềt ngơt mơ hòi dan tềng hơ̆. 36Simôn mơ ală cau ơm bal mơ khai lòt jòi Kơnràñ. 37Dơ̆ neh bàn rau, gen bol khai đơs lah: “Jơh ală cau jòi Kơnràñ.” 38Kơnràñ đơs mơ bol khai lah: “Bol he lòt tĕ hơ tiah ndai tòm ală ƀòn gùt dar do, nàng Añ in kung bơto yal tềng hơ̆ sơl, tài bơh broă hơ̆ tàng Añ neh lòt tus.” 39#Mat 4:23; 9:35.Kơnràñ lòt làm jơh kơnhwàl Galile, bơto yal tòm ală hìu jum mơ bơtrơh cà.

Yàng Jesu sơmbòi cau dun

(Mathiơ 8:1-4; Luka 5:12-16)

40Gơs dô nă cau dun lòt tus hơ Yàng Jesu, cùn gơltang rac dan lah: “Dilah Kơnràñ kòñ, gen rgơi lơh Añ in gơs goh.”#1:40 Sền tòm jơnau cih kah tòm Mat 8:2. 41Yàng Jesu rngoh rngac nđàc sơngit,#1:41 Gơs dô êt sră cih mơ tê bơtơl: nđàc sơngit bal mơ ò niam nùs. ai tê ƀư di khai mơ đơs lah: “Añ kòñ, goh tĕ.” 42Tŭ hơ̆ mo dun roh thit mơ khai gơs goh. 43Yàng Jesu sồr khai lik lòt mo, mơ ai jơnau kràñ cê nting lah: 44#Leb 14:1-32.“Bañ yal jơnau hơ̆ mơ cau lơi, mơya lòt tĕ sơnio să mê mơ cau gơnoar ơn phan duh khoai; mơ bơh mê neh geh goh, gen ơn tĕ phan be Môise neh sồr nàng lơh cơng bol khai in.” 45Mơya cau hơ̆ lòt mơ yal pơnro broă hơ̆ làm jơh, tian gơs Yàng Jesu ò rgơi mut tòm ƀòn dờng dô bă loh làng tai; gen tàng Kơnràñ ơm đah bơdìh tòm ală tiah ngềt ngơt, mơ cau bơh ală đah lòt tus hơ Kơnràñ.

Currently Selected:

Mak 1: KPM2018

Highlight

Copy

Compare