Luka 6
6
Ală cau bơtê ròs kòi mi tòm ngai Saƀat
(Mathiơ 12:1-8; Mak 2:23-28)
1 Di di ngai Saƀat, tòm tŭ Yàng Jesu lòt gan di ƀlàng sre kòi mi, ală cau bơtê ròs kòi mi, ai tê rpau mơ sa. 2Gơs dô êt cau Pharisi đơs lah: “Ñchi bơh tài bol mê lơh bơta ò geh gơnoar lơh tòm ngai Saƀat taih?” 3 Yàng Jesu ho lah: “Bol mê òhềt sền sră cih bơh broă Dabit lơh tòm tŭ khai mơ ală cau lòt jat khai jơgloh ơ? 4 Mbe lơi khai mut tòm hìu Yàng Tom Trồ dê, ai piang lă pơdơng mơ sa, kung ai ală cau jat khai in sa sơl, la piang lă mơ ò gơs cau lơi geh gơnoar sa, mìng lòi ală cau gơnoar ơn phan duh khoai in lơm.” 5Kơnràñ đơs lah: “Kòn Mơnus la Yàng ngai Saƀat dê.”
Yàng Jesu sơmbòi cau siar tê
(Mathiơ 12:9-14; Mak 3:1-6)
6Dô ngai Saƀat ndai, Yàng Jesu mut tòm hìu jum cau Juda nàng bơto sồr. Tềng hơ̆ gơs dô nă cau klau siar mpàng tê ma. 7Ală cau bơto bơta boh lam mơ ală cau Pharisi kơp sền Yàng Jesu sơmbòi kòp jê tòm ngai Saƀat hala ò, nàng jòi kai tồ yă Kơnràñ. 8Mơya Yàng Jesu git ală bơta kơlôi sơnơng bol khai dê, gen đơs mơ cau siar mpàng tê hơ̆ lah: “Ñă tĕ, ntào digùl do.” Gen khai ñă ntào. 9Yàng Jesu đơs mơ bol khai lah: “Añ lùp bol mê, tòm ngai Saƀat geh gơnoar lơh broă niam hala broă iơh, dong klàs bơta kis hala tơnroh bơta kis taih?” 10Kơnràñ sền làm tơl nă bol khai, gen đơs mơ cau hơ̆ lah: “Pò tĕ tê mê dê.” Khai pò tê gen tê gơs bòi. 11Mơya bol khai gơhào nùs bềng bơta gơjrañ mañ, gen bơyai bal mbe pal lơh di Yàng Jesu.
Yàng Jesu sac jơt bàr nă cau gơnoar bơto
(Mathiơ 10:1-4; Mak 3:13-19)
12Tòm tŭ hơ̆ Yàng Jesu guh hơđang mơnơm nàng hòi dan, mơ kư̆ hòi dan mơ Yàng Tom Trồ mang àng tơn. 13Tus àng drim, Kơnràñ hòi ală cau bơtê lòt tus, sac rwah jơt bàr nă tòm bol khai, sơnđan la cau gơnoar bơto dờng: 14Simôn, Yàng Jesu kung tơmoh sơnđan la Pier, Andre oh khai, Jakơ mơ Jang, Philip mơ Bathelemi, 15Mathiơ mơ Thôma, Jakơ kòn Alphe dê, Simôn kung gơs sơnđan la Selôt, 16Jude kòn Jakơ, mơ Juda Iskariôt, la cau rơp gơlik gơs cau pơrlơ̆ dră.
17Lồc behơ̆ Kơnràñ mù bal mơ bol khai, ntào di tiah ring bal mơ oă cau bơtê. Làng bol gal ngan bơh làm Jude, Jerusalem, mơ di gah dàlềng Tirơ mơ Sidôn dê lòt tus nàng iat Kơnràñ mơ geh sơmbòi bơta kòp jê. 18Ală cau gơs cà lơh bòl glar kung geh sơmbòi sơl. 19Jơh mpồl làng bol oă jòi bơta nàng ƀư di Kơnràñ, bơh gơs gơnap gơnoar lik bơh Kơnràñ mơ sơmbòi jơh tơl nă cau.
Bơta lơngai mơ bơta bòl glar
(Mathiơ 5:1-12, 38-48; 7:12a)
20Yàng Jesu tơnggòr sền ală cau bơtê mơ đơs lah:
“Lơngai bol mê in la cau rƀah lơòi,
bơh lơgar Yàng Tom Trồ la bal mơ bol mê!
21Lơngai bol mê in ơm jơgloh,
Bơh rơp geh hòm!
Lơngai bol mê in ơm ñìm,
bơh rơp ñŏ!
22 Lơngai bol mê in tòm tŭ bơh Kòn Mơnus mơ cau gơjrañ kơuềng di bol mê, ò dòp rò bol mê, bơtat bơtròh di bol mê, sang sơnđan bol mê be phan ƀơ̆! 23 Tòm ngai hơ̆ hòn chò sơnđoh ñchừn tĕ, bơh phan ƀàn bol mê hơđang trồ la dờng; bơh ồng pàng bol khai kung lơh behơ̆ sơl gơwèt mơ ală cau gơnoar hwơr.
24Mơya bòl glar ngan bol mê in la cau pas sơm,
bơh neh geh bơta pơndòm pơniang he dê rau!
25Bòl glar ngan bol mê in la cau hòm,
bơh rơp jơgloh!
Bòl glar ngan bol mê in la cau ơm ñŏ,
bơh rơp moat jrùng mơ ñìm rac!
26Bòl glar ngan bol mê in, tòm tŭ tơl nă cau đơs niam bơh bol mê!
Bơh ồng pàng bol khai kung lơh behơ̆ sơl gơwèt mơ ală cau gơnoar hwơr ma blac.”
Ală bơta bơto sồr ndai
27“Mơya Añ đơs mơ bol mê la cau iat Añ: Kòñ gơboh tĕ di ală cau sò tơm bol mê, lơh niam tĕ mơ ală cau gơjrañ kơuềng di bol mê, 28ai lơngai tĕ ală cau in srat rma bol mê, cau bơtat bơtròh di bol mê gen hòi dan tĕ bol khai in. 29Cau lơi pah mê đah tơrmồ do, ai tĕ tơn đah tơrmồ ne; ai cau lơi tòmpìt ào bơdìh mê dê, kung lòi tĕ khai ai tơn ào dơlam sơl. 30Cau lơi dan mơ mê, ai tĕ; cau lơi tòmpìt phan mê dê, gen bañ lùp wơl. 31 Bol mê kòñ cau lơh bol mê in be lơi, gen kung lơh tĕ bol khai in behơ̆ sơl.
32Dilah bol mê kòñ gơboh di cau kòñ gơboh di bol mê, gen gơs bơta lơngai lơi taih? Bơh cau glài kung kòñ gơboh di cau kòñ gơboh he sơl. 33Dilah bol mê lơh bơta niam di cau lơh bơta niam bol mê in, gen gơs bơta niam lơi taih? Bơh cau glài kung lơh behơ̆ sơl. 34Dilah bol mê ai cau in càn mơ kơp kòñ ai wơl, gen gơs bơta nđàc lơi taih? Cau glài kung ai cau glài in càn, tồ ai wơl kàr hơ̆ sơl. 35Mơya kòñ gơboh tĕ di ală cau sò tơm, lơh niam tĕ, ai càn tĕ mơ bañ kơp kòñ tơm wơl, gen phan ƀàn bol mê dê rơp la dờng mơ bol mê rơp lơh gơs kòn Bơtau Hơđang Rlau Jơh dê; bơh Kơnràñ la kơ̆ dơn gơwèt mơ ală cau ò kah bơta nđàc mơ ală cau iơh bơsak.
36Kòñ nđàc tĕ be Bèp bol mê òs kòñ nđàc. 37Bañ cahrña di cau lơi, gen bol mê rơp klàs bơta cahrña; bañ lơh nền glài cau lơi, gen bol mê rơp klàs bơta lơh nền glài; toh glài tĕ gen bol mê rơp geh toh glài. 38Pà gòi tĕ, gen bol mê rơp geh cau pà wơl; bol khai rơp ai rnoas dờng, jeh, jơlềt rơnggô, bềng lìu, mơ tuh tòm ào jrùh bol mê dê. Bơh bol mê was cau in mơ rnoas lơi, gen cau kung rơp was wơl bol mê in mơ rnoas hơ̆ sơl.”
39 Kơnràñ kung đơs mơ bol khai dô jơnau pơnyơu lah: “Cau jơngo rgơi tề lam cau jơngo sơl? Jơh bàr nă ò di dùh bal tòm trồm tơrluh ơ?
40 Cau bơtê ò lin rlau mơ cau bơto, mơya dilah cau bơtê geh bơto wil tơl gen rơp be cau bơto. 41Ñchi bơh tài mê sền gŏ thul tòm mat oh mi mê dê, mơ ò gŏ ròc dra tòm mat mê taih? 42Mbe mê rgơi đơs mơ oh mi mê dê lah: ‘Ơ bi, ai añ in tă thul bơh di mat bi,’ mơ să tòm mê ò gŏ ròc dra tòm mat mê ơ? Ơ cau ma blac, lài ngan tă tĕ ròc dra bơh di mat mê, gen sồng gŏ loh làng nàng tă thul bơh di mat oh mi mê dê.
43Ò gơs chi niam mơ gơlik plai iơh, kung ò gơs chi iơh mơ gơlik plai niam. 44 Bơh sền plai gen git chi. Cau ò di pic plai chi ƀal di tòm lò, kung ò pic plai ño di tòm lò kuh sơl. 45 Cau lơbơn niam bơh bơta niam tòm nùs mơ tơlik bơta niam, cau iơh bơsak bơh bơta iơh bơsak tòm nùs mơ tơlik bơta iơh bơsak, bơh jat bơta bềng lìu tòm nùs gen sồng bơr đơs tơlik.
46Ñchi bơh tài bol mê hòi sơnđan Añ la ‘Yàng, Yàng!’ mơ ò lơh jat jơnau Añ sồr taih? 47Añ rơp sơnio bol mê in git cau lơi lòt tus hơ Añ, iat jơnau Añ mơ lơh jat, la tòm toh be ñcau. 48Cau hơ̆ ndròm be cau ne bơt hìu, tò jrô, bơt mơnàng hơđang lŭ klềr; tòm tŭ dà tih ngơr, gơhòr jroh tus di hìu hơ̆, kung ò geh wañ lơnggơh, bơh neh bơt bơtào kơ̆ cê. 49Mơya cau lơi iat jơnau Añ mơ ò lơh jat, gen ndròm be cau ne bơt hìu hơđang tiah ò gơs mơnàng; dà hòr jroh tus di hìu hơ̆, gen tơrlah mo, bơta roh rui la dờng ngan.”
Currently Selected:
Luka 6: KPM2018
Highlight
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.