Sơnròp Gơlik Gơs 2
2
Ngai rlô mơ suơn Eden
1Behơ̆, ală trồ mơ tiah mơ jơh ală phan tòm ù neh crơng gơs rau. 2 Ngai poh Yàng Tom Trồ neh lơh sir ală broă Kơnràñ neh lơh, mơ ngai poh Kơnràñ rlô. 3Kơnràñ ai lơngai lơngò ngai poh in, mơ sơnđan la ngai sàng goh, tài bơh tòm ngai hơ̆ Kơnràñ rlô bơh dê ală broă Kơnràñ neh crơng gơs mơ neh lơh gơs rau.
4Hơ̆ la tòm ryas ală trồ mơ tiah tòm tŭ neh crơng gơs rau.
Bơta crơng gơs ndai
Tòm ngai Jehôwa Yàng Tom Trồ crơng gơs trồ mơ tiah, 5òhềt gơs dô nơm chi dềt lơi hòn tòm ƀlàng, mơ kung òhềt gơs dô nơm ngkòng ñhơt lơi hòn tòm sre, bơh Jehôwa Yàng Tom Trồ òhềt ai mìu dùh tòm ù, mơ kung ò gơs dô nă cau lơi lơòr ù. 6Mơya gơs kơnhồl dà bơh tòm ù guh hơđang tuh lam jơh hơđang ù. 7 Mơ Jehôwa Yàng Tom Trồ ai kơmbuh ù mòn gơs kòn mơnus, khồm nhơm bơta kis dê tòm trồm muh gen kòn mơnus gơlik gơs dô jơi gơs hwềng kis.
8Gen Jehôwa Yàng Tom Trồ lơh gơs dô nơm suơn tòm Eden, đah mattơngai lik, mơ ơn kòn mơnus tềng hơ̆ mơ Kơnràñ neh crơng gơs. 9 Jehôwa Yàng Tom Trồ lơh ù in hòn ală chi hàng mơnĕ, gơlik plai sa bơkah, digùl suơn gơs chi bơta kis mơ chi git bơta niam mơ bơta iơh.
10Dô nơm hiòng hòr bơh dê Eden nàng tuh suơn mơ bơh hơ̆ gơcah is tòm poan sơnah. 11Sơnđan sơnah sơnròp la Pison, gơhòr gùt dar Habila, la tiah gơs màh. 12Màh lơgar hơ̆ la niam ngan, tiah hơ̆ kung gơs kơlhô mơ lŭ màng. 13Sơnđan sơnah hiòng bàr la Gihôn, gơhòr gùt dar lơgar Kus. 14Sơnđan sơnah hiòng pe la Tigris, gơhòr đah mattơngai lik lơgar Asiri dê. Mơ sơnah hiòng poan la hiòng Ơphrat.
15Jehôwa Yàng Tom Trồ ơn kòn mơnus tòm suơn Eden nàng rcang gàr suơn. 16Mơ Jehôwa Yàng Tom Trồ sồr lah: “Mê sa di khat gơboh plai ală chi tòm suơn, 17mơya chi git bơta niam mơ bơta iơh, gen bañ sa gơ, bơh ngai lơi mê sa, ngan mê rơp chơt.”
Bơta tòmbau
18Jehôwa Yàng Tom Trồ đơs lah: “Cau klau ơm is dô nă ò niam, Añ rơp lơh gơs dô nă cau dong kòl ndròm bal be rùp să khai.” 19Jehôwa Yàng Tom Trồ ai ù mòn gơs ală phan poan jơng tòm ƀlàng, ală sềm par hơđang trồ gen Kơnràñ cèng gơ tus di đap cau klau nàng lòng sền mbe gơlơh khai tơmoh sơnđan bol gơ tồ sơnđan lơi khai tơmoh kòp ală phan tă nhơm gen hơ̆ la sơnđan is gơ dê. 20Cau klau tơmoh sơnđan ală phan poan jơng tòm hìu, ală sềm hơđang trồ mơ ală phan poan jơng tòm ƀlàng, mơya đah mơ khai ò jòi gơs dô nă cau be rùp khai nàng dong kòl khai. 21Jehôwa Yàng Tom Trồ lơh cau klau in bic lơhă, gen Kơnràñ ai dô nơm ntìng rpàs khai dê, mơ lềt wơl poac. 22Yàng Tom Trồ ngui ntìng rpàs Kơnràñ neh ai bơh di cau klau mơ lơh gơs dô nă cau ùr, mơ cèng khai tus dê cau klau. 23Cau klau đơs lah:
“Cau do la ntìng bơh ntìng añ,
poac bơh poac añ mơ gơlik gơs.
Cau do rơp sơnđan la cau ùr,
bơh khai la bơh cau klau mơ gơs.”
24 Tài behơ̆, cau klau rơp lik bơh mè bèp mơ đềt mềr mơ bau ùr he dê, mơ bàr nă gơlik gơs dô nơm poac bal.
25Cau klau mơ bau ùr khai jơh bàr nă ơm kuh lòi rồ, mơ bol khai ò git ƀàssìl.
Currently Selected:
Sơnròp Gơlik Gơs 2: KPM2018
Highlight
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.