Sơnròp Gơlik Gơs 19
19
Tồi glài làng bol Sôdôm dê
1Tus dê mho, bàr nă cau gơnrơh tus hơ Sôdôm mơ Lot ơm nggui di mpồng ƀòn. Dơ̆ Lot gŏ bol hơ̆ gen khai ñă lòt rò mơ tơmbic să di ù. 2Khai đơs lah: “Do, ală ồng, dan lòt tus ơm tòm hìu cau dĭ ală ồng dê, mơ ơm dô mang rào jơng ală ồng dê mơ guh àng hìng sồng lòt gùng.” Bol hơ̆ ho lah: “Ò, mang do bol hi ơm tòm gùng.” 3Mơya Lot kư̆ jà ngan tian gơs bol hơ̆ lòt tus mut tòm hìu khai. Khai lơh phan sa, mơ buh piang lă ò gơs kañ gen bol hơ̆ sào.
4Lài mơ tŭ bol khai bic, jơh ală cau klau tòm Sôdôm, bơh cau kơnòm tus di cau kra, jơh làng bol, bol khai ntoat tus ơm gùt dar hìu. 5 Bol khai hòi Lot mơ lùp lah: “Ntềng đah ală cau klau neh mut tòm hìu mê mho do taih? Lam tĕ bol khai lik hơ do, nàng bol hi in git bol khai.” 6Lot lik di tiah tus hơ bol khai di mpồng, gen til mpồng, 7mơ đơs mơ bol khai lah: “Ơ ală oh mi, añ dan ală oh mi bañ lơh bơta iơh bơsak behơ̆! 8Do añ gơs bàr nă kòn ơruh, añ ai bol khai ală oh mi in, ală oh mi kòñ lơh di bol khai mbe lơi khat gơboh, mìng bañ lơh bơta lơi iơh di ală cau klau do, bơh bol khai neh mut tòm hìu añ.” 9Làng bol đơs lah: “Mê pleh tĕ!” Mơ đơs tai: “Cau do neh tus tềng do be cau ơm ing mơ kòñ lơh gơs cau cahrña sơl ơ? Behơ̆ bol hi rơp lơh di mê iơh rlau mơ bàr nă cau ne.” Gen bol khai chồl jơlềt Lot mơ lòt tus nàng wà mpồng.
10Bàr nă cau klau tơlik tê hwài Lot tơmut tòm hìu, mơ til wơl mpồng, 11 mơ lơh jơngo mat làng bol ơm đah bơdìh mpồng bơh cau kơnòm tus di cau kra, gen bol khai jòi mpồng glar tơn mơ ò gŏ.
Bơta tơnroh Sôdôm mơ Gômôrơ
12Bàr nă cau klau lùp Lot lah: “Mê gam gơs cau tai tềng do sơl? Bơrtơu, kòn klau, kòn ùr mơ cau lơi bal mơ mê tòm ƀòn, lam lik tĕ bơh di tiah do! 13Bol hi rơp tơnroh tiah do, jơnau hòi driau bơh cau ƀòn do dờng ngan di đap Yàng Jehôwa, gen Kơnràñ sồr bol hi mù tơnroh gơ.” 14Gen Lot lik lòt mơ đơs mơ ală bơrtơu rơp tòmbau mơ ală kòn ùr khai lah: “Ñă lik lòt tĕ bơh dê tiah do, bơh Yàng Jehôwa rơp tơnroh ƀòn.” Mơya ală bơrtơu tồnlah khai đơs kơnhơl. 15Àng drim hìng, gen bàr nă cau gơnrơh pơrjal Lot mơ đơs lah: “Ñă tĕ, lam bau mê mơ bàr nă kòn ùr mê lik, rngòt mê kung chơt tòm bơta lơh glài ƀòn dê mòn!” 16 Mơya Lot pơrwài, gen bàr nă cau klau sơmbat di tê khai, bau khai, mơ bàr nă kòn ùr khai mơ lam lik bơh di ƀòn, bơh Yàng Jehôwa kòñ nđàc Lot.
17Tơnơ̆ mơ tŭ bàr nă cau klau neh lam bol khai lik rau, dô nă tòm bàr nă đơs lah: “Dô tĕ nàng dong klàs bơta kis mê dê, bañ wơlke tơnơ̆ mơ kung bañ ơm tiah lơi tòm ƀlàng, dô tĕ tus tòm mơnơm, rngòt mê gơkòl chu gen hă!” 18Lot ho bol khai lah: “Ơ Yàng, ò di behơ̆ ò. 19Do, cau dĭ Kơnràñ dê neh geh bơta nđàc di đap Kơnràñ; Yàng neh yal loh mơ añ nùs kòñ nđàc dờng ngan mơ dong klàs bơta kis añ. Mơya añ dô pồn tus hơ mơnơm ò jai lài mơ tŭ bơta rung rài tus, gen añ chơt. 20Ne, ƀòn hơ̆ la dềt, mơ kung rềp nàng añ dô tus. Ơ Yàng, lòi añ in dô tus tềng hơ̆ nàng dong klàs bơta kis añ. Ƀòn hơ̆ ò di la dềt sơl ơ?” 21Cau klau đơs lah: “Do, añ ai mê in lơngai do tai, añ rơp ò tơnroh ƀòn mê neh đơs do. 22Mhar mhar dô tĕ tềng hơ̆, bơh añ ò di lơh bơta lơi lài mơ tŭ mê òhềt tus tềng hơ̆.” Tài bơh hơ̆ cau sơnđan ƀòn hơ̆ la Soar.
23Tòm tŭ mattơngai neh lik hơđang ù, gen Lot tus hơ Soar. 24 Chòp Yàng Jehôwa tơndùh mìu siau mơ ồs bơh hơđang trồ tus tòm Sôdôm mơ Gômôrơ, 25tơnroh bàr ƀòn hơ̆, jơh làm ƀlàng, jơh ală làng bol bal mơ jơh ală chi ñhơt hòn tòm ù hơ̆.
Bau ùr Lot gơlik gơs rùp boh
26 Mơ bau ùr Lot wơlke sền tơnơ̆ khai, gen gơlik gơs dô nơm rùp boh.
27Abraham guh bơh drim, lòt tus di tiah khai neh ntào di đap Yàng Jehôwa. 28Khai tơnggòr sền đah Sôdôm mơ Gômôrơ, mơ làm lơgar tòm ƀlàng, gen khai gŏ ñhŭ bơh tòm tiah hơ̆ guh hơđang, kung be ñhŭ ồs bơh tòm bơnhă dờng. 29Tòm tŭ Yàng Tom Trồ tơnroh ală ƀòn tòm ƀlàng, hơ̆ la ală ƀòn Lot ơm, gen Kơnràñ kah Abraham mơ dong Lot lik klàs bơh tiah rung rài hơ̆.
Gơlik gơs làng bol Môap mơ làng bol Ammôn
30Lot rngòt ơm tòm Soar gen khai mơ bàr nă kòn ùr khai lik lòt bơh tềng hơ̆ mơ guh tòm mơnơm, ơm tòm dô nơm trồm lŭ. 31Bi ùr đơs mơ oh ùr khai dê lah: “Bèp he neh kra rau, mơ ò gơs cau klau lơi hơđang ù nàng tus mơ he be bơta òs dunnia dê. 32Tŭ do, he tơñô tơrnòm bèp he in mơ lòt bic bal mơ khai nàng lòi gơs sơntìl bèp dê.” 33Mang hơ̆, bàr nă bol khai tơñô tơrnòm bèp khai in, cau ùr bi tus bic bal mơ bèp, mơ khai ò git tŭ cau ùr bic mơ tŭ cau ùr guh wơl. 34Ngai hìng bi đơs mơ oh lah: “Do, mang ti añ neh bic mơ bèp rau, mang do he tơñô tơrnòm bèp in tai, gen ai lòt bic tĕ bal mơ khai nàng lòi gơs sơntìl bèp dê.” 35Mang hơ̆ bàr nă bol khai tơñô tơrnòm bèp khai in tai, gen oh ùr lòt bic bal mơ bèp, mơ khai ò git tŭ cau ùr bic mơ tŭ cau ùr guh wơl. 36Bàr nă kòn ùr Lot dê bơh dê bèp khai mơ gơs bun. 37Bi ùr deh dô nă kòn klau sơnđan la Môap, khai la ồng pàng làng bol Môap dê tus dê ngai do. 38Oh ùr kung deh dô nă kòn klau sơnđan la Ben Ammi, khai la ồng pàng làng bol Ammôn dê jơl tus dê ngai do.
Currently Selected:
Sơnròp Gơlik Gơs 19: KPM2018
Highlight
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.