Zephaniah 1
1
1Ne raowén꞉na ne Roiá꞉ner waohiatórenhne ne Zephaniah ne roʼní꞉ha né꞉ne Cushi né꞉ne roʼní꞉ha ne Gedaliah né꞉ne roʼní꞉ha ne Amariah né né꞉ne roʼní꞉ha ne Hezekiah, né꞉ne sihothenhniseraténionskwe ne Ronhnontí꞉iokwe Josiah né꞉ne roʼní꞉ha ne Amon ne Judahró꞉non.
2Kwáh orihwakwé꞉kon tsi enkerihwaʼthón꞉te
ne tsi ionhontsá꞉te, rá꞉ton ne Roiá꞉ner.
3Kwáh enkhehiátonte nonkweshón꞉as tánon ne kontiʼtshé꞉nens;
Kwáh enkhehiá꞉tonte notsitenhokón꞉as ne tsi iowé꞉rahre kontitses
tánon ne kentsonʼshón꞉as ne kaniatarakeʼkowáhne.
Kwáh ne enkhehión꞉ni ne ionhkweʼtahétkens tahatirakwenhtá꞉raʼne
tánon enkhehiátonte nonkweshón꞉as ne tsi ionhwenhtsá꞉te, ráton ne Roiá꞉ner.
4Kwáh Iathenkanentséste tsi nokwáh ne Judah;
tánon enkhehiatʼkónhten ne thóh nón꞉we nihatinákere ne Jerusalem;
tánon kwáh enkhehiákse ne ken nón꞉we niwatená꞉taien ó꞉ni ne konwashén꞉naiens ne Baal,
ó꞉ni ne raotisenhnashón꞉as ne kahiatón꞉ni ó꞉ni ne ratitsihénstatsis;
5tsi niiákon thenhiontsákete ne tsi karonhkwenáhere
raotihénton ne ratironhiakerononókons;
tánon tsi nihiákon thenhiontsákete tánon enhonwarihwanirát꞉tse ne Roiá꞉ner,
ók ethosà꞉ne ronhwariwaniráti ne raotiní꞉io Milcom;
6Tsi nihiákon ne tsakokton tsi ronhwanonhterá꞉tsene ne Roiá꞉ner,
ronónha ne iáh tehonwaiatísaks ne Roiá꞉ner khés ne thé꞉nen ahonwarihwanóntonhse.
7Sak thasatatón꞉ni raohénton ne Roiá꞉ner Rawenni꞉io!
Asè꞉ken ne rawenhní꞉sera ne Roiá꞉ner ákta í꞉wes;
ne Roiá꞉ner roweienhnenhtàhon rokʼkhwáhere,
sakohiatatokenhtíston ne sakohonkará꞉wi.
8Tánon ne kwáh thóh enwenhniserá꞉teke ne Roiá꞉ner tsi rokhwáhere
kwáh enkheréwate ne ronaterihóntons tánon ne ronhnontí꞉io raonekenteronhtseraʼshón꞉as
tánon tsi niiákon né꞉ne iakotseronhniáton ne tiwakwéniate.
9Ne thóh enwenhniserá꞉teke kwáh enkheréwate
ratikwé꞉kon ne iáh tsiahatiratane ne tsi tekanoháronkwe nó꞉nen ienhontawehiate,
ne rotinenskwenhaton oni rotinikonraton
tanon ne wahatinonsitkon ne tsi rotinonhshotons ne raotikoswetsera#1.9 raotikoswetsera: their master.
10Tánon ne kwáh é꞉tho enwenhniserá꞉teke, ráton ne Roiá꞉ner,
enwatsaróko tsi nationsentóhseron ne tsi tsothenhenrakàronte ne kénktionk ratinatónhkwa,
tánon tehiotenonhianì꞉ton oktsitóko ne ase iokwenrare tsi kanatowanen,
tsi niiorakareni natewaktoko ne tsi ionhnonhtarón꞉nions.
11Tesewahénret, í꞉se ne Mortar nón꞉we nisewanákere!
Asè꞉ken onhkweʼtakwé꞉kon sakotónhton ne Canaan nón꞉we nihatinákere;
ratikwé꞉kon ne rotiwistákete kaswistará꞉ken tsi enhonwenhnónhniake.
12Tánon kwáh é꞉tho nenhkaháwike entiatísake ne Jerusalem iehasehrénhas énkatste,
tánon kwáh enkheréwate nonhkweshón꞉as ne iontatón꞉ni
ók thóh ratitskwáhere raotiriwanerathatʼtserakon,
tsi nihiákon ne iónhton nakawériane,
“Né Roiá꞉ner kwáh iáh thahóthen tahontaharihwaié꞉rihte
khés ne thé꞉nen karihwahétken aohiò꞉then.”
13Tanon ne raonawenhshón꞉as kwáh enkanenskwenhátonke
tánon ne tsi rotinonhshó꞉tons kwáh enkanonsaiésa;
tánon enhontenonhshonhniánion
ók iáh kíʼ nonhwén꞉ton tsahontsá꞉ien;
enhatinenharahienʼthohseron
ók iáh kíʼ nonhwén꞉ton né꞉ne ahatinekírahte nonenharákeri.
14Ne wenhniseró꞉wahne tewenhniserónhte ne Roiá꞉ner rawenhní꞉sera ákta í꞉wes,
tánon thentsawénhstsi tsi nonhtaiawenhnonhátie;
tsi nenhiorahkáre ne rawenhní꞉sera ne Roiá꞉ner ne kwáh ronikonhraktshen;
otsitó꞉wa tenhasénhto ne ronikonratsani ratiriios ne nón꞉we.
15Né꞉tho ne enwenhniseronhtákwen ne kanakwáhtshera,
ne enwenhniseronhtákwen ne ahienikonhraronhiáken tánon nateraswatsénhtshera,
ne enwenhniseronhtákwen nakarihwentʼthonke tánon ne karihwaiesátshera,
ne enwenhniserontákwen ne tetioʼkarásheke tánon né꞉ne kwáh iáh tetiò꞉ken tsi natentioʼkarásehke,
ne enwenhniserontákwen nahiotsatarónhnionke tánon iáh thahonsahiokéntonhke,
16ne enwenhniserontákwen nahiehonhráwate tánon sotar ateriiosera ratiwenhnote
ne wathenhénrote ne tekanatanákton kanatowanénhhke
tánon ne tsi tekahiosakérons kanikató꞉tons.
17Tánon kwáh entekháwe ne kaʼnikonhraronhiákenhse nonhkwè꞉ne
tánon thóh ní꞉ioht tsi enhonhnésehke tsi ní꞉ioht ne tehieronhwékon
ne tiorì꞉wa tsi rotirihwanéren tsi nokwáh ne Roiá꞉ner.
Tánon ne raotinekwénhsa entewawerónhtake tsi ní꞉ioht nokénhra
tánon ne raotikaróstha thóh nenhióton tsi ní꞉ioht nóta.
18Sénha í꞉si nón꞉we ne raotiwístas kawistará꞉kens khés ne owistanó꞉rons
iáh tkakakwé꞉ni nahiakonónsthate
né꞉tho tewenhniséronhte ne Roiá꞉ner raonakwáhtshera;
ók onhontsakwé꞉kon ótsire enwatsáhate ne tsi nihotekéfen,
asè꞉ken ne enronhniáte ne tsi iehiotókte tenhiotenonhianí꞉tonhke
kwáh ratikwé꞉kon tsi nihiákon ienákere ne tsi ionhontsá꞉te.
Currently Selected:
Zephaniah 1: MHK
Highlight
Share
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
