Zechariah 11
11
Tsi Ronhwashénhnion Ne Shakoronhiakéntha
1Teshanonhónti, Lebanon,
ne nahónton nótsire ahontsáhate ne sahronthashónha nonenhtakwenthétshera! 2Teshaséntho tánon teshahénret, cypress karontahshónha—
ne onenhtakwentétsheras iorenién꞉en;
ne thóh ioronhtanehrahkwaténions kwáh wahthónton!
Teshaséntho tánon teshahénret, karíhtons ne Bashan nón꞉we—
ne ioterahthò꞉on kwáh kahiá꞉khons!
3Ne ratikoráhsons tiatehotihenréhtha tsi nihotinikonhráksens;
ne rahonaʼtsenhnionniá꞉tshera iototʼtáhon!
Shatahónsahtat tsi nihionahthatenahkón꞉ni ne kénreks;
tsi konthiʼterónhtakwe ne kahráhkon ákta ne Jordan karihwahthón꞉ton!
Ne Teʼnihiá꞉se Shakotinónhʼne Ne Kaʼtshé꞉nenhs
4Ne Roiá꞉ner á꞉ke-Ní꞉io wahakénhase, “Ne shatatón꞉ni ne kaʼtshé꞉nenh shakonónhʼne ne ken tiohkowá꞉nen teiotinakarontón꞉a wakonhwanahwenhthósehre. 5Ne kwáh rahothitshenenhó꞉konhs konhwanahwénhthos tánon iáh thé꞉nen tehonwahthirewáhtha. Ronhtewahrahní꞉nonhs tánon rónton, ‘Tetsitewahnonhwerá꞉thon ne Roiá꞉ner! Tsi nihionkwahkwátse!’ Iekaní꞉hare ne kwáh shakotinónhʼne iáh tehotí꞉ien nahkonhwathítenhre.”
( 6Ne Roiá꞉ner wahèn꞉ron, “Kwáh ó꞉nenh iáh ónhka tahonsakʼkheténrahke ne tsi ionwenhtsá꞉te. Kwáh Í꞉i thóh nón꞉we nenhkhehiátkawe rahotishatstenhserá꞉kon ne rahothikoráhsons. Kí꞉ken rathikoráhsons kwáh enhontiéshate ne tsi ionwenhtsá꞉te, tánon iáh tahonshakenonhstháte tsi nokwáh ne rahothishatsténhsera.”)
7Tsi nihá꞉ti ne rothinaskwaní꞉nonh ó꞉ni ne ronatenaskwahní꞉nonh ne teiotinakarontón꞉a wahonké꞉nhane, tánon ne wahkhehiaʼtennikónhrahren ne teiotinakarontón꞉a ne konhwanawenhʼthóhsere. Tekahnahkárahke wahkatʼtháwah: nénhska ne wahkenáhthonkwe “Ataniténron” tánon nó꞉ia “Skarihwakʼiken.” Tánon wakhehiatenhnikónhrahren ne konhtiʼtshé꞉nen. 8Watekhehiatherhiathítkon ne áhsen nihá꞉ti sakotinónhnhe ne kaʼtshé꞉nenh, ióntʼshions, tánon tsi nió꞉re ne sehwenhní꞉tha ratikwé꞉kon ahé꞉renh wahkhehiaʼtenhá꞉wite. 9Ethò꞉ne wakheiénhase ne kontiʼtshé꞉nen, “Kwáh ó꞉nenh iáh Í꞉i tahonshakwatenhnikónhrahren. Tsi nahó꞉ten nakenhéie á꞉ki kenhéie. Tsi nahó꞉ten nakarihwahthón꞉ton kwáh ki karihwahthóntont. Tsi nihá꞉ti ne iatenhonahthaténre kwáh ki tenhontathawénhtho.” 10Ethò꞉ne ne kániah ne iʼkháwe ne “atanitén꞉ron” wakenahthónkwen wahtkeniáhke, né꞉ne ahonsahkariwahrí꞉shionke tsi nahó꞉ten ne Roiá꞉ner róhshon tsi tatehóntereh nonhkweshón꞉ʼa. 11Káti naterihwahsehronniáhtshera shonterihwáhthon né꞉ne sahenhní꞉sera. Tsi nihá꞉ti ne rohtinaskwahní꞉nonh ó꞉ni ne rohnatenaskwahní꞉nonh kwáh ionkenikonhrá꞉rahkwe, tánon rohnahterienʼtá꞉rahkwe né꞉tho Roiá꞉ner é꞉tho nón꞉we nikaiénthakwe ne raowén꞉na ne tsi niwahtsiotén꞉en. 12Wahkheiénhase, “Tó꞉kaʼa asaʼthontáttseke, táskon naʼkarhiáktshera. Ók tó꞉ka iáh, sahtewehiénton.” Sók káti áhsen niwáhsenh ní꞉kon kawistará꞉kens wahonkʼkharhiákten.
13Ne Roiá꞉ner wahakénhase, “Tsi iewisthaientháhkwa nononhsatokenhtí꞉ke iahátien.” Sók ki iahákhawe ne áhsen niwáhsen ní꞉kon kawistará꞉kens—tsi nihiawetaʼtsá꞉ni ronhnéreh natiatanó꞉ronhke—tánon ononhsatokenhtí꞉ke tiewistaientháhkwa iakathakweniáhien. 14Ethò꞉ne ó꞉nenh ne tekení꞉haton ne nón꞉wa tonshakéniake, tsi niká꞉ien ne kenahthónkwen “Shakarí꞉wa í꞉ken,” tánon tsi sahothirì꞉wa í꞉ken ne Judah tánon ne Israerʼró꞉nons wathothiriwahríhse.
15Ethò꞉ne ne Roiá꞉ner wahakénhase, “Shé꞉kon ne shashateriwahthéntiat tsi nihohiotenhseró꞉ten ne teiotinakarontón꞉a sakonónhne, ók ki nón꞉wa thóh ná꞉tser tsi shí꞉ken ní꞉ioht ne iáh thé꞉nenh thahariwasthátonke. 16Wahirihón꞉ten ne sahkonónhne teiotinakarontón꞉a nashakotenhnikónhrahren nakitshenenhó꞉kon, ók iáh ki teshakoienahwáse ne teiotinakarontón꞉a ne kontsiatátons iáh ó꞉ni tesheshakohiaʼtí꞉saks ne kenk tiehioné꞉non; iáh ó꞉ni tesheshakotiéntha ne iothikarewáhthon, iáh ó꞉ni teshakonónhtens ne ionathakárithe. Kek, ne rahwá꞉rats ne kwáh ionarésenhs ne teiotinakarontón꞉a, kwáh ó꞉ni shakotsinahriéntsiats. 17Né꞉tho iáh thé꞉nenh tehariwástha nakonkwè꞉ta sakonónhne teiotinakarontón꞉a, tsi shakotewenhthétha ne kaʼtshé꞉nen! Aiá꞉wenhs náhsare ahoiénte ne ranenhtʼtsáke tánon ne sawehienthetháhkwen nahakaráti! Kwáh ne rahnénhttsiake ahonthakénheie, ne sahnekwá꞉ti nahakará꞉ti kwáh taharónwehke.”
Currently Selected:
Zechariah 11: MHK
Highlight
Share
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
