Ruth 3
3
Ruth Waʼenahkwahtshén꞉ri
1Ohnakénhkha káti Naomi iaontatharháhse ne Ruth, “Ó꞉nenk tsi enkonnahkwahtshenriá꞉se ó꞉nen kiʼ nen né꞉ʼe ensanonhsó꞉taʼne. 2Sehià꞉rak. Ne kí꞉ken rón꞉kwe Boaz tewatatenónhkwe; ne kí꞉ken konnón꞉kwe ronwaióʼtenhse skátne sewaióʼtehkwe. Satahónhsatat. Ón꞉wa ioʼkarahtsherá꞉te enhatiwá꞉eke ne teiotikonhstónhrhes. 3Satá꞉wen tánon iontiaʼtakonstáhkhwa satéhrho tánon satiaʼtahserón꞉ni kwáh tioiá꞉nere sá꞉ien ahtsherón꞉nia. Thó꞉ne eh tho iénhse tsi nón꞉ thahwá꞉ʼeks nok kiʼ tóhsa ráttok tsi tho í꞉ses tsik enhó꞉taʼne tánon tsi rohnekì꞉ren. 4Orihwí꞉io són꞉ni tsi nón꞉ nenhà꞉rate, tánon nó꞉nen ienhótaʼwe, eh tho iahá꞉se tánon tahshará꞉tat ne róhere tánon rahsiʼtákta enhsá꞉rate. Raónha enhiahró꞉ri tsi nénhsiere.”
5Ruth tontaieriʼwaserá꞉ko, “Akwé꞉kon tho néntiere tsi nahò꞉ten waʼshekhró꞉ri.”
6Tho káti Ruth niaʼhá꞉en tsi nón꞉ thatihwá꞉ʼeks eh tho naié꞉iere tsi nahò꞉ten waʼontathró꞉ri nontatshá꞉wha. 7Tsi ó꞉nen Boaz wahótaʼne ó꞉ni tsi rohnekì꞉ren, kwáh í꞉ken ionʼwésen tsi ranonhtónnion. Tho niahá꞉re tsi nón꞉ tioʼtón꞉iote teiotikonhstónhrhes eh tho wahá꞉rate tánon wahó꞉taʼwe. Ruth kwáh skenén꞉ʼa tho niahà꞉en taiehará꞉tate ne róhere tánon tho waʼón꞉rate rasihtákta. 8Tsi káti niwahsón꞉tes thontaiawénstsi wahá꞉ie, wahatʼkarháhtho wahonehrá꞉ko tsi iakón꞉kwe ieiaʼtión꞉ni rasihtákta. 9“Ónhka ní꞉se”? wahariʼwanón꞉ton.
Tontaieriʼwaserá꞉ko, “Sénhsion, Ruth kí꞉ken ne tsi ákta tsi tiatatenónhkwe, í꞉se káti saterihwaién꞉ni taséksnieʼne. Ahsathontátsheke káti naionkení꞉niake.”
10Wahèn꞉ron, “Roiá꞉ner ahiaiaʼtatérihste. Wéne senestonhá꞉tie tsi sénha seriwakweniéns꞉tha ne kahwá꞉tsire tsi nihsatiérha nón꞉wa, tsi niʼsheiatierá꞉se iesasá꞉wha. Aiotónʼon aiesesá꞉kon sénha kenʼnithoiénha tóka rokwáhtshe tóka niʼ ró꞉ten nek tsi iáh kiʼ tho tesaié꞉ren. 11Tóhsa káti tesatateʼnikòn꞉raren Ruth. Akwé꞉kon tho néntiere nahò꞉ten wahseriʼwanón꞉ton aséʼken akwé꞉kon tsi niiá꞉kon nonkwaná꞉takon ronaterién꞉tare kí꞉ken són꞉kwe tehsonkweʼtaié꞉ri. 12Tokénske tsi ákta tewatatenónhkwe tánon wakaterihwaién꞉ni ne takónsnieʼne. Nek tsi rón꞉kwe sénha ákta tsatatenónhkwe tsi ní꞉ioht ní꞉ʼi. 13Kén꞉ʼen sé꞉shek tsi niwahsón꞉tes tánon ohronʼkè꞉ne enteniriʼwahtshén꞉ri tóka kenʼ enharihwanón꞉weʼne ne raónha tahiásnieʼne. Tóka enharihʼwanón꞉weʼne ioiá꞉nere, tóka iáh taharihwanón꞉weʼne, enkerihwaní꞉rate káti raohénton ne Roiá꞉ner tsi í꞉ʼi ki wakaterihwaién꞉ni takónsnieʼne. Ken sé꞉shek tánon sà꞉rat tsi niió꞉re ohronʼkè꞉ne.”
14Tho káti waʼòn꞉rate rahsitákta, waʼontkétsko ohénton tsi niió꞉re watioswathéhne ne tóhsa ónhka aiontátken ne tsi iáh thatehotonwentsó꞉ni ónhka aiakotókenhse tsi eh tho í꞉ienskwe. 15Boaz washakohró꞉ri, “Seríhsi ne sateweiá꞉ra kén testákwarit.” Eh tho kiʼ naʼé꞉iere. Sók ki tahàweron teiotikonhstónhrhes, tóka wísk niwáhsen nikakonhtsherá꞉ke tánon waʼshakosnié꞉nen iehnenhsà꞉ke taha꞉ren. Ionsaiéhawe kaná꞉takon nionsá꞉ien. 16Tsi káti ó꞉nen ionsaión꞉we ontatshá꞉wha waontateriʼwanón꞉tonhse, “Oh káti niahesarì꞉wawen konién꞉ʼa?”
Ruth akwé꞉kon waʼontathró꞉ri tsi naʼshakotié꞉raʼse ne Boaz. 17Saiaì꞉ron, “Wahakhró꞉ri tóhsa taontá꞉ke ne iáh thé꞉nen thakhá꞉wi ne káti kí꞉ken niiawé꞉ta teiotikonhstónhrhes wahá꞉kon.”
18Naomi waʼì꞉ron, “Satenòn꞉na Ruth, tsi niió꞉re iatenkarihwaién꞉taʼne. Iáh thahatoríshen nón꞉wa wenhniserá꞉te tsi niió꞉re enharihwakwatá꞉ko.”
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.