Romans 5
5
Skariwaserónʼni Tsi Nòkwa Ne Rawenni꞉io
1Ne káti tsi sénhak tionkwateriwaʼseronnién꞉ni tsi nitióha ne tewetákwen, ionkwaientáʼon ne skén꞉nen rahonháke ne Ié꞉sos Kerístos. 2Rahonháke non niʼionkwariwaienteráhon kí꞉ken ataniténron tsi nitsionʼnhétie, tánon onkwatsenʼnonniatserákon non niʼionkwathonʼnáhe꞉re nahitewaiéna ne Rawenni꞉io rahohiatanerakwátsera. 3Kwáh ísiʼnon, tsi nihʼionkwatonʼnáhe꞉re non kwaronhiakenserákon, tiehionkwateriéntare ne karonhiakénsera tekawisʼsátste. 4Naiontakátsʼtate tkáhas ne Rawenní꞉ioʼs rahoriwahniráhtsera, tánon ne rahoriwaniráhtsera iónʼnis ne askanéktsera. 5Kí꞉ken naskanéktsera iáh teionkwanikonraténʼni, asèken ne Rawenni꞉io thowéron ne rahononronkwátsera non kweriánes tsi nihorihotáshon ne ronikonriʼióston, raónha ne Rawenni꞉io sonkwáhwi.
6Neh꞉ne sékon iáh sitewasátsʼte, Kerístos wasakawenhé꞉iaʼse ne iakoriwáneren shakáhewe tsi nihorákwen ne Rawenni꞉io. 7Kwáh íken tsi wateriwentóre nónkak ahiontathihéiaʼse neh iakoriwakwaríshon. Sékons ó꞉ni tòhka ónhkak áienreh ahiontathihéiaʼse ne ionkwetí꞉io. 8Nók Rawenni꞉io rawenéston tsi nishonkwanorónkwa—kwáh sékon sihionkwariwáneren neh Kerístos shasonkwenʼhéiaʼse! 9Tsi iehotathatkáwen ne kenheiátʼne ónen tionkwateriwaseronʼniénʼni tsi nòkwa ne Rawenni꞉io; tòhkati áreh sékon níkon, neh raónha ensehsonkwanónstaʼte tsi nòkwati ne Rawenni꞉io rahoʼnhakwátsera! 10Tsi tewásonskwe ne Rawenni꞉io, nók washontiónʼnien ne raónha nonkwatéro ahitewáton thoʼnahontáwe ne tsi raweheión꞉ne ne Roiénha. Nónwa neh tsi ónen Rawenni꞉io onkwaténro ionkwatónʼon, tohsékon níkon entionkinónstate ne Kerístos rahothónʼnhets akarihón꞉ni! 11Nók iáh kíʼ thók tèkon; ionkwatonʼnáhere neh tsi nihoiéren ne Rawenni꞉io rahonháke ne Sonkwaiáner Ié꞉sos Kerístos, rahónha ónen wasontiónʼnien ne Rawenni꞉io aionkwaténroke.
Tsi Natheiatʼtíhe Ne Á꞉ton Tanon Ne Kerístos
12Kariwaneren tsawenon tsi ionwentsiate neh꞉ne saiatak khók rorihonʼni꞉on, tánon ne rahoriwanerahaktsera tsioha ne kenhéion. Tsi ehniʼiawenhen, kenhéion watewareni ne kwáh tsi niateiakahontsiake ne iorihon꞉ni tsi kwáh iateionkwetake iakoriwaneren. 13Kaiénthakwe ne kariwáneren ne tsi ionwentsiate nohénton ne kaianerénsera sahonthontʼkáwen; nók kanónwe ne iáh tekahianerenseráien, iáh kanèka tekahiátonkwe nahonteweiénthonke ne kariwánerens. 14Nók tsi nióre ne Á꞉ton tánon ne Mahís, kenhéion tsiakoniarotharón꞉ne ne onkwesónhas, iekaníhare tsi niháti ne iáh thotèhiot tsi ahotiriwáneren tsi ní꞉ioht ne Á꞉ton tsi iáh tehowenʼnarákwen neh Rawenni꞉io sahotsiawenrátʼtse.
Ne Á꞉ton thóhwa tahonsakaieróntarake tsi nikáien neh táre. 15Nók kíʼ teʼnihiáse thaténite. Asèken neh Rawenni꞉io iáh nènʼne thènen tehakaráiens, iáh tsi ní꞉ioht ne Á꞉ton rahoriwaneraháktsera. Kwáh oriwihioʼónwe ronatiokowánen rohnenhéion neh iorihonníʼon ne thóh sahiata rahoriwanerahákʼtsera. Nók kíʼ ne Rawenni꞉io rahoténrat sénha ne kasátste, tánon kíʼ ó꞉ni tsi iáh thènen tehiokaráien kwáh iakotiokowánen nonkwesónha rahonháke niehiakawénon, ne Ié꞉sos Kerístos. 16Tanon kwáh kíʼ thetsiatʼthíhen neh Rawenni꞉io rahothatawítsera tánon neh saiátat rahoriwaneraháktsera. Sahariwaneráke neh Á꞉ton Rawenniʼio watoʼiatórete tsi rhoníkon; nók kíʼ tsi niʼiakotsiokowánen iakoriwáneren Rawenni꞉io wasakawehnésten ne rahothaniténrat ráthon, “Iáh tesewahníkon!” 17Kwáh thóske tsi saiátat wahariwaneráke neh kenhéion thontásawen wahakotiatakwení꞉ioste neh rahorihónniat nètho saiátat rónkwe. Nók thóh ónhte niwéso sénha ioriʼowáhnen tsi nihokanón꞉ni nètho saiátat rónkwe, Ié꞉sos Kerístos! Tsi niʼiákon neniehiéna neh kwáh kanhánon Rawenni꞉io rahoténrat ó꞉ni kwáh thikénhak tiakotatewennihió꞉on tsi tiakoiánere tsi nateiátereh eniehiatakwení꞉ioke tsi enhiakónʼnheke rahonháke ne Kerístos. Ne tsi nihoriwakanón꞉ni ne Kerístos
18Ne kátiken, nètho énskat kariwáneren iakorewáthon nonkwetaʼkwékon, kwáh ne sákat nénskat kariwakwarishíontsera tiakówis nathatewennihiótseras nonkwesónha ó꞉ni tshiakahónʼnhets. 19Tanon kwáh tsi ní꞉ioht nonkwesónha tsi iontateriwanerahaktén꞉nis ne tsi nihoiérehn nètho iáh tehotewennarákwen, kwáh éhʼthoh ní꞉ioht tsi entiontateriwiʼiósten tsi nòkwáh ne Rawenni꞉io ne tsi nihoiéren neh Ié꞉sos Kerístos.
20Tsi tewatkáwen ne kaianerénsera nehʼne ahontehiáron ne aterientawenriétsera; nók tsi nónwe ne kariwáneren wahtewatsisá꞉sere, sénha iawehthowánen ne Rawenni꞉io rahoténrat tsi onhtehiáron. 21Kwáh káti, tsi ní꞉ioht ne kariwáneren wakaiatakwenihió꞉ne ne kenhéion, thóh káti nòn꞉ne ní꞉ioht ne Rawenni꞉io rahoténrat tsi kaiatakwení꞉io neh kariwakwarishóntsera, thóh niehionkwahiaténhas tsi nónwe ne ionnheónhwe natónnhets rahonháke ne Ié꞉sos Kerístos sonkwaiáner.
Currently Selected:
Romans 5: MHK
Highlight
Share
Compare
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
