Proverbs 16
16
1Enwá꞉ton aietewatenʼnikonhrísa nok Rawenni꞉io kiʼ nohná꞉ken tenthatà꞉ti.
2Íhsehre tsi sanonhtónnions akwé꞉kon tkariwaié꞉ri tsi nihsatiéhrha nok ki Roiá꞉ner tenhiaiaʼtó꞉rehte tsi nahò꞉ten satenʼnikonhríson.
3Ehtsheʼné꞉ken Roiá꞉ner ahaiaʼtaté꞉rihste tsi nahò꞉ten wahsateʼnikonhrísa eʼthó꞉ne ensaterihwahténtiaʼse.
4Akwé꞉kon ne Roiá꞉ner tsi nahò꞉ten róhson nieionateríhonte; tsi niahonenonhátie ne rotirihwaneraʼákskon enhatiiaʼtáhton.
5 Roiá꞉ner ráhswens nónhka iakotkenhronniá꞉tskon; iáh nonwén꞉ton thahatiʼniá꞉kenʼne tsi ahshakohré꞉wahte.
6Sarihwatokénhak tánon sanitenrahtskónhak, Rawenni꞉io enshiaʼnikónhrhenʼseʼ tsi sarihwanéren. Tshewèn꞉narahkhwak ne Roiá꞉ner tánon iáh oʼthé꞉nen ne karihwáksen thaiesà꞉raʼne.
7Nó꞉nen entsheʼnikonhraié꞉rite Roiá꞉ner, enhskwé꞉ni ne iesáhswenhs ahsheiatenroʼserónnion.
8Ne sénha ioiánere ne ostón꞉ha tahsatèn꞉tsha tókaʼ tkarihwaié꞉ri, tsi niʼiot ne wé꞉so tahsatèn꞉tsha tánon iáh tetkariwaié꞉ri tsi ní꞉ioht tsi wesaién꞉taʼne.
9Enwá꞉ton í꞉se enhsateʼnikonhrísa, nok Rawenni꞉io kiʼ enhiaianénhawe tsi nenhsátiere.
10Ronontí꞉io tsi thatá꞉tis Ronhnheʼón꞉we thó꞉wis ne kaʼshatsténhsera; tsi nahò꞉ten enharihwísa tiótkon tkariwaié꞉ri.
11 Roiá꞉ner tehotonhwentsó꞉ni tsi kakontsheríhare tánon ne ateʼnienténhtshera aontakariwaié꞉rike nahò꞉ten watenhní꞉non ne kwáh aontakarihwaié꞉rike.
12Rotinontí꞉ios iáh thahatiié꞉na ne karihwanéren, aseʼkénh aterihwakwarihshiónhtshera tkáhas ne kakoráhsera akaʼshátsteke.
13Ronontí꞉io tehotonhwentsó꞉ni ahothón꞉teke ne orihwí꞉io tánon enhshakorihwakwénienhste nónhka iáh teiakonó꞉wen.
14Nónhka ionttokhahtsherí꞉io enionteʼnién꞉ten nahotonhnhá꞉rake ne ronontí꞉io. Tókaʼ enhoná꞉khwen ne ronontí꞉io, tókaʼ nón꞉wa ónhkaʼk eniaíeheie.
15Kaswathetserákon ne Ronontí꞉io rakonsónthe éʼtho káien natónhnets, tánon ne raoriwanirátʼtsera ne shá꞉ka ne#16.15 Enwá꞉ton nahsì꞉ron kenkwitè꞉ne tókaʼ ó꞉ni kokwitè꞉ne. ioronhiarátieʼs#16.15 Enwá꞉ton nahsì꞉ron ioronhiarátieʼs tókaʼ ó꞉ni ohtsì꞉kera. ne tkáhas naiokén꞉nore kenkiténe.
16Kwáh sénha ísiʼ non tsi ioiánere nashiena nattokhahtsherí꞉io tsi ní꞉ioht noʼ ohwistanó꞉ron. Nashena kanikonraienthatshera tsi aiesaiatarakwen tsi niiot ne kawistaráken.
17Nónhka tionkweʼtaié꞉ri tho nón꞉we enionthahaté꞉ko tsi iohatátie ne karihwanéren; satenʼnikón꞉raren ká꞉ti tsi nón꞉we wesenonhátie—tókaʼ ne ensaʼniá꞉kenhte.
18Kanaiéhtshera eniakohshá꞉rine tsi nonkwá ne karihwaiesáhtshera, tánon atkenronniáhtshera ehtà꞉ke ieniakoiaʼténhas.
19Ne sénha ioiánere nahsaní꞉tenhte tánon aiesenténhton tsi ní꞉ioht ne ahsheiatiaʼtáhrhahse ne ronatkenhronniá꞉tskon tánon ahshié꞉na tsi nahò꞉ten rotinénhskwen.
20Satahonhsí꞉iohst tsi nahò꞉ten eniesarihónnien, ne ensakwáhtsheʼne; ehtsheniáhes Roiá꞉ner tánon ensatonhnhá꞉rake.
21Nónhka tehoʼnikonhráthe tánon rotonkweʼtíson ronwaienté꞉ri tsi roʼnikonhraientá꞉tskon. Sénha ronʼwé꞉sen tsi enthatà꞉ti sénha kiʼ enthonwéhtahkweʼ.
22Attokháhtshera tiohné꞉kote ne iónhnhe nónhka teiakoʼnikonhráthe nok ahsateʼnién꞉ten ahsherihónnien ne iáh thaʼteiakoʼnikonhráthe iáh shaʼtékena té꞉ken.
23Nón꞉kwe rotiʼnikonhrattókha enhonnonhtonnión꞉ko ohén꞉ton enthontá꞉ti; tsi ká꞉ti nahò꞉ten enhonní꞉ron sénha ki enhonwanatahónhsatate.
24Kawenní꞉ioʼs ne shá꞉ka ne otsiʼnahkontahkwá꞉ne ne ótsikheta—teiotsikhè꞉tare nahsátkenʼse tánon iakaohnhiióhstha.
25Tsi nahò꞉ten íhsehre tkariwaié꞉ri tsi niiohahó꞉ten sathahitáhkhe tókaʼ eʼthó꞉non niensaiaʼténhawe tsi nón꞉we kenhé꞉ion.
26Rón꞉kwe ne roióʼte rotonhkariá꞉kskon sénha enhahkwísron enhoióʼten ne tsi enhawerienʼtí꞉io nó꞉nen tenhsatská꞉hon.
27Nón꞉kwe ne iáh tethotirihwaié꞉ri ronné꞉saks ne ahshakotikarón꞉ni nakotiaʼkéhshon; ók ó꞉ni wátshaʼahs tsi thatiwennínekenʼs.
28Nón꞉kwe ne iáh tetionkweʼtaié꞉ri teierihwenhawíhtha; ó꞉ni tahshakonaʼnikonhrhá꞉ren tánon tahshakotikháhsi natenroʼseraʼshón꞉ʼa.
29Nón꞉kwe ne ratiʼnikonhrahétkenʼs shakonanowenhtén꞉nis ne rontenroʼshón꞉ʼa tánon nek enhshakonahshá꞉rine nahshakotikarón꞉ni.
30Seʼnikón꞉rarak nón꞉kwe rotikonhsaiéhshon tánon rontkahrokeríkhons tsi teiesaká꞉nere; karihwáksen tsi nahò꞉ten ronnonhtonniónkwas.
31Ne tiakorihwaié꞉ri teniakoterihwaʼserákwahse eniakonhnhé꞉son; ataʼkenhróhkhwa niiakononhkwiseró꞉ten ne shá꞉ka tsi ní꞉ioht kakwenienhstáhtshera teiakoterón꞉ronh te.
32Ne sénha ioiánere ne iakoʼnikonhrí꞉io tsi ní꞉ioht ne aiakoʼshatstenhserowanénhake. Ne sénha ioiánere aontahsanónhton tsi sónhnhe tsi ní꞉ioht ne aontasahnónhton tsi kanataién꞉ton.
33Nón꞉kwe tehatí꞉iens tsi ní꞉ioht tsi nahatiweientéhtaʼne Rawenni꞉io raononhtonniónhtshera, nok ki Rawenni꞉io raonhá꞉ʼa thanónhtons tsi nieniá꞉wenʼne.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.