Numbers 5
5
Ne Iahʼtehiakotkwéniens Onhkweshón꞉ʼa
1Ne Roiá꞉ner wahawénhase ne Mahís, 2“Sehró꞉ri nonhkweshón꞉ʼas NÍsraerʼró꞉nonke nahionhtaʼtsiatí꞉nekenhwe ne tsi watená꞉taien onhkweʼtakwékon ne iotennrákteron nakonhéhonkne hiakónh꞉rare—tánon onhkweʼtakwékon nónhka ne iáh tehiakotʼkwéniens né꞉ne iehiakoiénen naʼwenhehiónhta. 3Ratiʼkwékon ietsihiatínekenf kí꞉ken ne shiʼhiorihwakáion tehiaʼkohiatátshons, né káti ne tó꞉sa thaʼhatítsionhte tsi watenáthaʼien, tsi nónhwe ne skát꞉ke iakwaná꞉kere nakonhkwetashón꞉ʼas.” 4NʼIsraerʼró꞉nons wahontewénhnarakwe tánon washaʼkotihiatínekenhwe ne tsi watená꞉taien.
Nahonsaʼkakaʼriákon Nahó꞉ten Ne Tewaterientaʼwenhréhon
5Ne Roiá꞉ner tahá꞉wen ne Mahís 6ne tehioterihwasonhterónhnions karihonhniennítsheras né nonhkweshón꞉ʼas NÍsraerʼró꞉nonhke akorihwàke. Nó꞉nen nónhkak tsi nítsion ne iáh tahisewarihwatokénhake rahonháke ne Roiá꞉ner tánon wahétken tsi nahitsihiaʼtiérase nónhkak akóren, 7ónenk kíʼ tsi ensehwarihwanírate ne sewarihwanerahákʼtsheras tánon kwáh enkanáʼnonhke tsi entsiʼsewaká꞉riake, tánon ne 20 iosénhtsheroʼte, né꞉ne tsi nikáien wahitsikarónhni. 8Ók tó꞉ka nètho ónhkwe waʼahʼéheie tánon iáh ónhka tehontáʼtenonhkwe né꞉ne roʼnónha ahonsahonwatiʼkáriakʼse, ónenk kíʼ tsi Roiá꞉ner entʼthónhion né꞉ne ratiʼtsihénsthatsis enhontiénawaste. 9Káti ó꞉ni kwáh tsi níkon ne katoʼkensthánions tshiaʼkoiesthánion né Israerʼró꞉nons thonwáwi ne Roiá꞉ner ratiʼtsihénstatsis káti rahonawenhkʼónhwe tsi roʼnónha kíʼ ronhwaná꞉wi. 10Shaʼtihiatáʼtshons kíʼ ne ratiʼtsihénstatsis enhontewenhiénton ne roʼnónha ronhwanáwi.
Né Iotiʼniáʼkhons Tsi Tekonhwatiʼnikonhráʼras Ne Rothiniát꞉kons
11Ne Roiá꞉ner wahó꞉rori ne Mahís 12-14nahontaʼshakáwen NʼIsraerʼró꞉nons ne tehioteriwaʼsonhterónhnions karihonhnienʼnítsheras. Ahónton né naiáwenhne né rónhkwe wateshaʼkotenikonhráraʼne ne ró꞉ne tsi iáh tehiaʼkorihwató꞉ken ne rahonhàke tánon watsionhthaʼtsiatáʼtsonste tsi skát꞉ke wahiá꞉rate nó꞉ia rónhkwe. Ók kíʼ ne teníteron iáh kwáh orihwí꞉io terónhnis, asèken ne shaʼkoksténha nonhtiérek ahiakorihwaséhtonke—iáh ónhka teierihwaní꞉rats, tánon iáh ónhka tehiontatʼtharáse. Khès ó꞉ni thóh nahiáwenhne ne roʼniákhon wateshaʼkotenikonhráraʼne ne ró꞉ne, iawerohátsien tsi iakorihwató꞉ken íken. 15Ne kwáh tsit nahiotónhake ne rónhkwe ónenk tsi ratsiʼhenstatsíʼne niensakohiaténhaʼwe ne ró꞉ne. Ónenk tsi ienháhawe tsi niwaterihwanónhtons ne iahióntkaʼwe tekakonhtshérake tehiotikonhstónres othèsera, ók iáh kíʼ thènen tahonthahoʼienónhti ne iakeniewá꞉tha kènie khès ne kanetanó꞉ron, tsioríhwa tsi ne ienwatkaʼwénhke tsi natehatenikónhraras ne roniákon, ne naʼrónhni ne orihwihioʼónwe ahoʼtóhkenhse.
16Ne ratsihénstatsi ohénton nienshaʼkohiaténhawe ne iakónhkwe tánon enshaʼkahónhnien ohénton thaʼiétanne ne ietsienharákwahke. 17Kwáh ionekatokénhti enhanékaren ne ionaʼwasthakarí꞉io kákʼsakon tánon ostónha tenhakénhrakwe noswenhkaráke káien tsi nónhwe niwatóhsehrothe ne tsi rénhteronh ne Roiá꞉ner tánon onekanóske ienhó꞉ti né꞉ne akanekákshaʼte. 18Ethòne enshaʼkhononkwiseranerénhsi ne iakónhkwe tánon ne iewatkáwen nothésera hionhtsaná꞉ke enhá꞉weron. Ratsanáke ne ratsihénstatsi enhatʼtháwa ne akèra né kanèkare ne kaʼnekátksen né꞉ne tká꞉has karewatá꞉tshera. 19Ethòne ne ratsihénstatsi enshaʼkahónhnien ne iakónhkwe naierihwanónhwene naierihwanírate tsi nenhénron ne ratsihénstatsi: “Tó꞉ka iáh teshaʼtenakwahiesáton, iáh kíʼ tahishaʼkarónhniate ne karewatá꞉tshera tsi nitʼkáhas kí꞉ken onékanos. 20Ók tó꞉ka shaʼtenakwaieʼshá꞉ton, 21aiáwenhs ne Roiá꞉ner ahiasenhnáksate tsi nòkwah ne shonkwetaʼshónhas. Aiáwens né senhitsháke nahonktóhkerihke tánon ne senekwenhtáke aonthó꞉we. 22Aiáwens kí꞉ken onékanos senekwénhtakon niáwe tánon ne akarihónhni naʼsatenekwénto tánon ne sheniʼtshake nahonkʼtóhkerihke.”
Ne iónhkwe tsi tenhkarihwasehráko, “Waʼkerihwanónhwene; aiáwenhs ne Roiá꞉ner thóh nihá꞉ier.”
23Ethòne ó꞉nen ne ratsihénstatsi kahiatonhseráke enhaʼhiáton kí꞉ken karewatáhtshera tánon thóh kák꞉sakon enhanóhare ne kaʼnekáksen nahonsonhterá꞉kewe ne kahiáton. 24Nohénton narónhnien ne iónkwe nakanekíhra nonèkanos, né tsi nonhtiérek ne enkarihónhni kwáh íken tsi enhionhnonhwaʼtáten, 25ne ratsihénstatsi ónenk tsi enshá꞉kwa ne iónhkwe ne iewát꞉kawen nothésera, ienhá꞉thate tsi enhahiaʼtatériste rahohénton ne Roiá꞉ner, tánon thóh ietsienhará꞉kwahke ienhá꞉ren. 26Ethòne kwáh sewatsá꞉na nothèsera ienhát꞉kawe né꞉ne iakheʼhiarastákwah enrónhniate tánon thóh enháʼtshahʼáhte ne ientsienharákwahke. Noʼnakènhkha, ónenk tsi enrónhnien ne iónhkwe nakanékeri nonékanos. 27Tó꞉ka iotenaʼkwahiesháton, noné꞉kanos kwáh íken tsi tehiotenonhianíton tsi enhioronhiá꞉kenthe; né kanekwenhtáke kwáh enwató꞉we tánon ne kaʼnitʼtshákes enwaʼtókerihke. Naosénhna enkarewáthonke tsi nòkwah nahonkwetashón꞉ʼas. 28Ók tó꞉ka iáh tehionhí꞉kon, iáh kíʼ othènen thaʼhiohiátawen tánon kíʼ enwáton nahiowiraiéntaʼne.
29-30Né kí꞉ken ne kaianerénhsera tsi nihiáwenhs nó꞉nen ne rónhkwe roʼtekéfʼfen tánon tenshaʼkotenikonhrárahne ne shaʼkoksténha tsi iakotenaʼkwahiesháton. Ne iónhkwe enkhonhiónhnien ohènton takáthane ne tsi ientsienharakwáhke, tánon ne ratsihénstatsi né enhaʼterihwaténhtsiaʼte ne orihwakáion kaianerénhsera. 31Ne shaʼkoksténha kwáh kíʼ enshaʼtiatotaríhsi tsi nahonhí꞉konhke, ók ne iónhkwe, tó꞉ka hioʼnhí꞉kon, ónenk kíʼ tsi enkaronhiáken tsi nienhiáwenhne.
Currently Selected:
Numbers 5: MHK
Highlight
Copy
Compare
Share
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
