Numbers 3
3
Ne Aaron Rahonekenhteronʼtsheraʼshónhas
1Né kí꞉ken ne Aaron raowátsires tánon ne Mahís ehʼshiʼkaháwi ne Roiá꞉ner wahothárase ne Mahís ne tsi ionónhte ne Sinai. 2Ne Aaron kaiéri nihonekenteronhʼtsheraiénhtahkwe: né꞉ne Nadab, ne thokʼsténhaʼkwe, né꞉ne Abihu, Eleazar, tánon ne Ithamar. 3Né ronhwatiʼhiatarákwen tánon ronhwatiʼrihwaniráti tsi ratiʼtsihénsthatsis íken, 4ók kíʼ ne Nadab tánon ne Abihu ronhwatiʼnonhwariákon nónen né hianíthate ne iáh tehiotokénti ótsire rahohénton ne Roiá꞉ner né꞉ne iahonwentsaʼthènke ne Sinai nónhwe. Iáh thènen tehotiʼwiraiénthaʼkwe, káti ne Eleazar tánon ne Ithamar né wahiatsiʼhenstónhni tsi nikaríhwes ne Aaron rónhnhekwe.
Ne Levites Né Ronhwatiʼhiatarákwen Tahonwatiʼrihwásnieʼse Ne Ratiʼtsihénsthatsis
5Ne Roiá꞉ner wahawénhase ne Mahís, 6“Thaʼsehiaténhaf ne rahotiʼtiókwas ne Levites tánon sèhnhan né ronhwaʼhiótens ne Aaron ratsiʼhénsthatsi. 7Né enhotiʼhióten tsi niwaterihwaʼnónhtons natohsehrákon tsi nónhwe nikíteron tánon né ronhterihwaténtsiat tsi nateʼhiotonhontsóhon nahonwatiʼhiótenhse ne ratiʼtsihénsthatsis tánon ne kanakeraseraʼkwénhkon. 8Né enhonʼtenhnikonhráren akwékon tsi niwatsthaʼshónhas natóhsera tánon né ronhterihwaténtsiat tsi naʼtehioʼtonhotsóhon ne roʼnátsiakes NʼIsraerʼró꞉nons. 9Thotʼkhók níkon ronaterihwaiénhni ne Levites né꞉ne Aaron tánon ne sakohiohʼokónhas ahonwatiʼhiótenhse. 10Níse ónenk tsi Aaron entshiataráko tánon ne sakohiohoʼkónhas nahotiʼhióten tsi nihonaʼterihwaiénhni ne ratiʼtsihénstatsis; nónhka nakóren ahionteʼniénten né naiéhiere ónenk kíʼ tsi enhiontaʼtenonhwariákon.”
11Né Roiá꞉ner wahawénhase ne Mahís, 12-13“Né Levites ónenh kíʼ Í꞉i akonhkwéta wahónton. Nó꞉nen shaʼkhenonhwariákonh ratiʼkwékon ne tahontiérenhte wahonhnákerate ne Egyptró꞉nons, wahiʼhiatatoʼkéntiste tsi shí꞉ken ní꞉ioht ne kwáh Í꞉i riʼiénha íken né thakowánen ne skawatsiʼráʼtshons enhotiʼwiraiénhtaʼne NʼIsraerʼró꞉nons kawátsires tánon nenhtewatiérenhte enhonnákerate ne katshénens. Nónhwa, khèʼkok nenhtewatiérenhte enhotiwiraiénthaʼne NʼIsraerʼró꞉nons tsi ní꞉ioht Ní꞉i riʼiénha akénhake, Levites kíʼ khehiaʼtienawáston; roʼnónha kíʼ nakonhkwetaʼshón꞉ʼas enhónton. Í꞉i ne Watiá꞉ner.”
Tsi Wahonwatiʼsenhnaʼrónhnion Ne Levites
14Thóh ne tsi iahonwenhtsaʼthènken ne Sinai ne Roiá꞉ner wahoriʼhónten ne Mahís 15nashaʼkosenhnarónhnion ne Levites né꞉ne tsi nihotiʼtaró꞉tens ó꞉ni tsi nihatiʼwatsiró꞉tens, shaʼkosénhnaren ne iatekakʼshá꞉thake né sewenhnítha nahontahó꞉hionke khès ne sénha ahontaʼhóʼionhke, 16tánon ne Mahís thóh kíʼnaháiere. 17-20Ne Levi áhsen nihonekenteronhʼtsheraiéntakwe: né꞉ne Gershon, Kohath, tánon ne Merari, né꞉ne sakotiʼsotʼthonkonhkènʼen ne rahotiʼtáras thóh nihotiʼsenhnótenhne. Ne Gershon tèkeni tehonekenteronhtsheraʼiénthaʼkwe: né꞉ne Libni tánon ne Shimei; ne Kohath kaiéri nènhne niʼhonekenteronhtsheraʼiéntaʼkwe: né꞉ne Amram, Izhar, Hebron, tánon ne Uzziel; ók ne Merari tèkeni né tehonekenteronhtseraʼiéntaʼkwe: né꞉ne Mahli, tánon ne Mushi. Né꞉ne sakotiʼsotʼthonkonkénʼen kawatsíres né ronhwatí꞉iatskwe.
21Ne rahotiʼtáras ne Gershon né iekaʼkwéktons ne rahotiʼwátsires ne Libni tánon ne Shimei. 22Naʼkwékon tkaʼkwékton ne rotiskenhrakétes né sewenhníta khés ne sénha ahontahotíʼhionhke né ronhwatiʼsenhnarónhnion né꞉ne 7,500 niháti. 23Kí꞉ken ratiʼtáraien thóh ahonaʼnathaiénthake né꞉ne tsi iatewatʼséntʼthos nokwáhti né noʼnàken ne tsi watóhsehrote, 24skát꞉ke ne Eliasaph né roʼní꞉ha né꞉ne Lael né ranenhrakweʼní꞉io tsi ratiʼtáraien. 25Né ronateriʼhóntaʼkwe tsi nòkwah natóhsehra, né kanónskon tsi nahiotónhake tsi ioteró꞉ron, ó꞉ni náhtste nòkwah tsi ní꞉ioht tsi ioteró꞉ron, tsi ioharénhton ne tsi iehionthaʼwehiaʼtákwa, 26ne iohaʼrenhtónnions natenhénhrakon tsi naʼtehiokwahthaʼséhton tsi nónhwe niwatósehrote tánon ne ietsienharákwa, tánon ne ioniathaʼrénhton ne tsi ieʼionhtahwehiaʼtáhkwa naʼtenhénrakon. Ronónha ronaterihwaiénhniʼne nahonterihwatsʼtériste tsi watsʼthánions kí꞉kens.
27Ne rahotiʼtáras ne Kohath ne iekaʼkwéktons ne rahotiʼwátsires ne Amram, Izhar, Hebron, tánon ne Uzziel. 28Ne tiokwéktons ne rotiskenrakétes ne sehwenhníta nithohtíhions khès ne sénha ahonthaʼhotíhionke ne ronhwatiʼsenhnarónhnions né꞉ne 8,600 niháti. 29Kí꞉ken raʼtitáraien thóh nónhwe nahonhnátaien né꞉ne entiéne nokwáhti tsi watóhsehrote, 30skát꞉ke ne Elizaphan né roʼní꞉ha né꞉ne Uzziel ne renhtaraʼkweʼní꞉io. 31Né nènhne ronaterihwaʼiénhniʼne Nahonterihwatsʼtériste Naterihwaʼseronhniátshera Onerókwah, natekwáhra, ne waʼthasehroʼharáhkwa, ne ieʼtsienharákwas, tsi nihonsthaʼsónhas ne ratiʼtsihénstaʼtsis ne tsi Iotokénti Nónhwe, tánon ne ioniatarénhton ne tsi iehionhtawehiatáhkwa ne tsi nónhwe ne Kwáh Tiotoʼkénti íken. Ronhnónha akwékon ronaterihwaiénhniʼne nahonterihwatsʼtériste tsi niwatsʼthánions kí꞉kens.
32Ne ranenhraʼkwení꞉io ne Levites né꞉ne Eleazar né roʼní꞉ha né꞉ne Aaron né ratsihénsʼtatsi íken. Rahónha roterihónhthaʼkwe nashaʼkotenhnikónhraren tsi niháti ronateríhonte tsi nónhwe ne Iotokénti íken.
33Ne rahotiʼtáras ne Merari ne tkaʼkwéktons tsi ratiwaʼtsíraiens ne Mahli tánon ne Mushi. 34Ne iekaʼkwéktons ne rotiskenhrakétes né sewenhníta khès ne sénha thoʼtíhions né ronhwatiʼsenhnarónhnions né꞉ne 6,200 niháti. 35Kí꞉ken kentára né꞉ne othoʼréke nòkwahti enhonhnátaien ne tsi watóhsehrote, skát꞉ke ne Zuriel ne roʼní꞉ha né꞉ne Abihail né renhtarakweʼní꞉io. 36Né ronhwatiʼhiatharaʼkwáhton nahonterihwatsʼtériste nahoʼnikonharaʼshónhas natóhsehra, ne tewatʼrenhwákwas, kanawahʼathaʼshónhas, tsi kárate, tánon tsi niwatsʼthasónhas. Roʼnónha ronaterihwaiénhni ne tahatʼirihwásnieʼne nahonterihwatsʼtériste tsi niwatsʼthasónhas kí꞉kens. 37Roʼnónha ó꞉ni ronaterihwaiénhni tsi nòkwah nonawahʼathasónhas, tsitʼkárate, nowasʼthasónhas, tánon nasehríhies nátste natenhénrakon watsʼthákwas.
38Ne Mahís tánon ne Aaron ó꞉ni ne sakotiʼhioʼokónhas ohénton ne tsi watóhsehrote né nónhwe nenhontenáʼtaien né꞉ne tsitʼkarakwínekens nòkwahti. Né nènhne roʼnaterihwaiénhni nahonterihwatsʼtériste tsi niʼhioterihwaʼtiéren tsi nónhwe ne Iotokénhti íken né nonhkweshón꞉ʼas NÍsraerʼró꞉nonke akorihwáke. Nónhka akóren nahionʼteniénten né nahiéiere kwáh kíʼ enhionhthaʼtenonhwariákon. 39Ne tiokwékton tsi niháti ne Levites rotiskenrakéte né sewenhníta khés ne sénha thoʼtíhions nètho Mahís sakosenhnarónhnions ne sotiʼtaráʼtshons né tsi nihoʼnáhon ne Róiá꞉ner, né꞉ne 22,000 niháti.
Ne Levites Né Tonhsahonʼwatiʼnaktáhkwen Ne Thoʼnatierénhton Ronaʼnakeráton Roʼtiskenhrakéte Iakowiraʼientáhon
40-41Ne Roiá꞉ner wahoró꞉ri ne Mahís, “Ratiʼkwékon ne thoʼnatierénhton rotiskenrakéte rotiwiraientáhon NʼIsraerʼró꞉nons Í꞉i akonhkweʼtashón꞉ʼas íken. Káti sheʼsenhnarónhnion ratiʼkwékon ne thoʼnatierénhton roʼnanakeráton NʼIsraerʼró꞉nons, né sewenhníta khès ne sénha thoʼtí꞉ions. Ók tsi ní꞉ioht ne roʼnónha akénhake katʼróris ratiʼkwékon ne Levites tsi Í꞉i akonkwetaʼshon꞉ʼas íken! Í꞉i ne Watiá꞉ner! Tánon katró꞉ris ó꞉ni ne konhtiʼtshénens ne tionatierénhton ionanakerátons ne Levites rahotitʼtsheʼnenhókons né tonhsaʼkonhwatinakʼtáhkwen konhtiʼkwékon ne tsionatierénhton ionanakerátons ne konhtiʼtshénens.” 42Ne Mahís wahaʼtewénhnarakwe, tánon washaʼkosenhnarónhnion ne thoʼnatierénhton roʼnanakerátons roʼtiskenrakéte 43ne sewenhníta khès ne sénha thoʼtíhions, ne tiokwéktons né꞉ne 22,273 nihátiʼkwe.
44Ne Roiá꞉ner wahoró꞉ri ne Mahís, 45“Ó꞉nen sehiatatérist ne Levites tsi Í꞉i akonhkwetaʼshón꞉ás í꞉ken tsi ní꞉ioht ne thoʼnatierénton ne Israerʼró꞉nons rahotiʼnekenteronhtsheraʼsónhas, tánon sehiataʼtériste ne Levites rahotiʼtshenenhókons né꞉ne tahonsahonwatiʼnakthákwen ne thoʼnatierénhton roʼnanakeráton ne Israerʼró꞉nons rahotiʼtshenenhó꞉kons. 46Ne thoʼnatierénhtons roʼnanakerátons ne Isaerʼró꞉nons rahotiʼnekenteronhtsheraʼsónhas tsi ronhwatiʼtiokwahkénhnion ne Levites né꞉ne 273, nikaksáthake tsi ní꞉ioht tsi ronhwatiʼtiokwahkénhnion, ónenk kíʼ tsi ensheʼsetsataninónhnion ne iehotiʼhiathakéh꞉toʼte rahotiʼnekenteronhtseraʼsónhas. 47Ne shatiʼhiatáʼtshons wísk-nikawístakes kawistarákens enskáriake, enhtsohianénhawe tsi nikanó꞉rons, 48tánon kí꞉ken owísta Aaron tánon sakohiohʼokónhas tahséhion.” 49Ne Mahís wahaʼtewénhnarakwe tánon iaháhawe 50ne 1,365 níʼ kawístakes kawistarákens 51tánon Aaron tánon ne sakohiohʼokónhas tahshaʼkáwen.
Currently Selected:
Numbers 3: MHK
Highlight
Copy
Compare
Share
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
