Numbers 26
26
Né Tekeníhaton Sahonwatisénhnaren
1Sonhtó꞉hetste tsi kannhrataríhneskwe ne Roiá꞉ner wahawénhase ne Mahís ó꞉ni ne Eleazar né roʼní꞉ha né꞉ne Aaron, 2“Sehsenhnarónhnion skawatsiráʼtshons ne kanakeraserakwékon (nihonhitiokwaróroke) ne Israerʼronónke, ratiʼkwékon ne ronhnónhkwe ne tewáhsen natehonosehrihiákons khès ne sénha thohtí꞉ions né iatekaiéri tsi nihonathakaríhte nahontsotharónhni.” 3-4Ne Mahís tánon ne Eleazar wahiatewénhnarakwe tánon wahonwatihiataróroʼke ne ronhnónhkwe né thóh natehonosehrihiákons. Thóh nónhwe nahonhnitiokwahróroʼke tsi kahéntaien ne Moab í꞉se nakaniataráti ne Jordan né꞉ne tehiotiniátara ne Jericho.
Né kí꞉ken NʼIsraerʼró꞉nons ne Egypt nateʼthonénon:
5Ne tsi ratiʼtiokwáhien ne Reuben (Reuben ne toksténhakwe ne Jacob roiénha): né tsi ratiʼtáraien ne Hanoch, Pallu, 6Hezron, tánon ne Carmi. 7Tsi nihonatiókwahkwe kí꞉ken kentarasónhas 43,730 nihátikwe. 8Eliab nónhwe nithonatwatsiríhnons né Pallu 9tánon ne rahonekenteronhtsherasónhas né꞉ne Nemuel, Dathan, tánon ne Abiram né nènhne ne ienákere ronwahiatarákwen. Wahonwatiwenhnónhti ne Mahís tánon ne Aaron tánon né iahonwanatiatárahse ne Korah rahotiókwah nó꞉nen sahonwatswaténien ne Roiá꞉ner. 10Nonhón꞉tsa hontenonhtónko tánon iahakotiathanékwahne, tánon skát꞉ke wahonhníheie ne Korah tánon ne ronhwanonhterahtiéskwe nónenh nótsire sahakóthonte ne 250 niháti ronhnónhkwe; né wahakothokáten nonhkweshón꞉ʼas. 11Ók ne Korah rahonekenhteronhtsherasónhas iáh nènhne tehonwatinonhwariákon.)
12Tsi ratiʼtiókwahien ne Simeon: tsi ratitáraiens ne Nemuel, Jamin, Jachin, 13Zerah, tánon ne Shaul. 1422,200 nihátikwe kí꞉ken tsi rahtitaraiénthakwe.
15Ne raotiʼtiókwa ne Gad: tsi rahtiʼtáraiens ne Zephon, Haggi, Shuni, 16Ozni, Eri, 17Arod, tánon ne Areli. 18Kí꞉ken kentarahsónhas 40,500 nihátikwe ne ronhnónhkwe.
19-21Tsi ratiʼtiókwahien ne Judah: ne rahotitáras né꞉ne Shelah, Perez, Zerah, Hezron, tánon ne Hamul. (Né tenihiáse ne Judah rahonekenteronhtsherasónhas, Er tánon ne Onan, tsi tiohóntsaien ne Canaan nónhwe nihawenhéion.) 22Kí꞉ken kentáras 76,500 nihátikwe ronhnónhkwe.
23Ne raotiʼtiókwas ne Issachar: ne rahotitáras né꞉ne Tola, Puah, 24Jashub, tánon ne Shimron. 25Kí꞉ken kentáras 64,300 nihátikwe ne ronhnónhkwe.
26Tsi ratitiókwahien ne Zebulun: né rahotitáras né꞉ne Sered, Elon, tánon ne Jahleel. 27Kí꞉ken kentáras 60,500 nihátikwe ne ronhnónhkwe.
28Tsi rathitiókwahien ne Só꞉se, né kanísera kènhne ne tenihiáse rahonekenterasónhas, Manasseh tánon ne Ephraim.
29Tsi ratitiókwahien ne Manasseh. Machir né roiénha ne Manasseh né nènhne roienkénʼen ne Gilead, tánon ne kén iotsiétons kentáras né thontahioianénhawe ne shaʼkosotʼthonkonhkénʼen ne Gilead: 30tsi ratiʼtáraiens ne Iezer, Helek, 31Asriel, Shechem, 32Shemida, tánon ne Hepher 33Zelophehad né roʼní꞉ha né꞉ne Hepher iáh nènhne tehonekenhteronhtseraiéntakwe, nék khók ne konhtihiatáses rohiaʼtasetsheraiénthakwe; tsi nihiotisenhnoténsons né꞉ne Mahlah, Noah, Hoglah, Milcah, tánon ne Tirzah. 34Kí꞉ken kentáras 52,700 nihátikwe ne ronhnónhkwe.
35Tsi ratiʼtiókwaien ne Ephraim: ne kentáras né꞉ne Shuthelah, Becher, tánon ne Tahan. 36Ne rahotitáras ne Eran né tetsiohianénha tsi nithotwatsiríhnon ne Shuthelah. 37Kí꞉ken kentáras 32,500 nihátikwe ne ronhnónkwe.
Ne kí꞉ken ne kentarasónhas tsi nitsawé꞉non ne Só꞉se.
38Tsi ratitiókwahien ne Benjamin: ne kentáras ne Bela, Ashbel, Ahiram, 39Shephupham, tánon ne Hupham. 40Ne rahotitáras ne Ard tánon ne Naaman ne tetsiohianénha tsi rawatsiratátie ne Bela. 41Kí꞉ken kentáras 45,600 nihátikwe ne ronhnónhkwe.
42Tsi ratitsiókwahien ne Dan: né꞉ne rahotáras ne Shuham, 43né꞉ne 64,400 niháti ronhnónhkwe.
44Tsi ratiʼtiókwahien ne Asher: ne rahotitáras né꞉ne Imnah, Ishvi, tánon ne Beriah. 45Ne raotitárasonhas ne Heber oni ne Malchiel né thontahioianénhawe tsi rawatsiratátie ne Beriah. 46Ne Asher rohiatasehtseraiénthakwe Serah hiontátiatskwe. 47Kí꞉ken kentáras 53,400 nihátikwe ne ronhnónhkwe.
48Tsi ratitiókwahien ne Naphtali: ne rahotitáras né꞉ne Jahzeel, Guni, 49Jezer, tánon ne Shillem. 50Kíʼken kentáras 45,400 nihátikwe ne ronhnónhkwe.
51Ne tsiokweton tsi nihátikwe NʼIsraerʼró꞉nons ronhnónhkwe né꞉ne 601,730 nihátikwe
52Ne Roiá꞉ner wahawénhase ne Mahís, 53“Tetsinárit nonhóntsas tsi natehónteres nonhkweshón꞉ʼas, né tewanónhton tsi niháti. 54-56Shewasthótshon tsi tetsiná꞉rit nonhóntsas, tánon kowanénhak thaséhion ne ronatiokowáhnen íken tánon kénk ní꞉wa ne kénk nihatíha íken.”
57Ne tsi ratiʼtiókwahien ne Levi né ratikwékon ne kentáras ne Gershon, Kohath, tánon ne Merari. 58Tsi nithonatwatsiríhnons thóh rathihiátare ne ronhnitaranónhne Libni, Hebron, Mahli, Mushi, tánon ne Korah. Ne Kohath né roiénha ne Amram, 59Né꞉ne rotiniákon ne Levi shaʼkoiénha Jochebed, né꞉ne Egypt tsakawenakeráton. Ahónha tánon ne Amram tenihiáse wahotiʼnekenhterontsheraiéntaʼne, né꞉ne Aaron tánon ne Mahís, tánon wahotiʼhiatasetsheraiénhtaʼne, né꞉ne Miriam. 60Ne Aaron kaiéri niháti ronekenteronhtsheraiéntaʼkwe, né꞉ne Nadab, Abihu, Eleazar, tánon ne Ithamar. 61Ne Nadab tánon ne Abihu watníheie né nó꞉nen sahonwatáʼtse ne Roiá꞉ner nótsire ne iáh tehiotokénti í꞉ken. 62Ne rotiskenrakétes ne Levites ne sewenhníta nithohtíhions khès ne sénha thohtíhions 23,000 nihátikwe. Kwáh ákte nihatisénhnarakwe tsi ní꞉ioht ne Israerʼró꞉nons, né aoríhwa tsi iáh né othènen tehonwanonhontsáwi NÍsraerʼró꞉nonhke nónhwe.
63Ratikwékon kí꞉ken kenhtáras né꞉ne Mahís tánon ne Eleazar sakotisenhnarónhnions né nónen sahonwatiʼsenhnarónhnion NʼIsraerʼró꞉nons ne tsi kahéntaien ne Moab nónhwe né tehiotiniátare ne Jordan né꞉ne Jericho nónhwe. 64Kwáh iáh ne saiáta tshiateshotaténronʼne tsi nikáien ne Mahís ó꞉ni ne Aaron sakotisenhnarónhnions ne Sinai Ahonwenhtsa꞉thénhke nónhwe. 65Ne Roiá꞉ner ráwenh tsi kwáh ratikwékon enhonhníheie ne karakonhkówa nónhwe, tánon nék khók ne Caleb ne roiénha ne Jephunneh tánon ne Joshua né꞉ne roʼní꞉ha ne Nun.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.