Joshua 3
3
Nonhkweshón꞉a Ne Israerʼró꞉nonke Wathatihiáiake Ne Jordan
1Nó꞉ia sahioʼrénhne Joshua tánon ratikwé꞉kon nonhkweshón꞉a Nisraerʼró꞉nonke oronhkéstsi wahontkétsko, sahontoserothakwenháton ne Acacia nón꞉we, tánon ákta ne Jordan niahónhne, thóh nón꞉we ionsahontaʼtohseró꞉ten tsi karí꞉wes rothiráhrekwe ne tahatihiáiake. 2Ásenhnonta onakèn꞉ke ne shakotihéntenhse waʼthontawénrie tsi watohseró꞉tons 3tánon washakotiró꞉ri nonhkweshón꞉as, “Ne nó꞉nen entsisewá꞉ken ne rokhá꞉res ranorokwenhá꞉wi ne Ateriwaʼseronhniá꞉tshera né꞉ne Roiá꞉ner Sewaní꞉io Rahoneró꞉kwa, shasewatoʼserotakwenhá꞉ton tánon tsi sewáser. 4Iáh nonhwénton kén꞉en tethisewénon, káti ronónha henietsinaʼtónhase tsi nienhénsewe. Ók tó꞉sa ki ákta í꞉sewet Naterihwaʼseronhniá꞉tshera Oneró꞉kwa; tó꞉ka asénhnon ne tsi nihióhase nió꞉re oná꞉ken sewahténti.”
5Ne Joshua wasakohró꞉ri nonhkweshón꞉a, “Sasewatonhnakanonhni, asèken enhiorenhne ne Roiá꞉ner ioriwanerahkwat tsi nenhá꞉iere ne sewahenton.” 6Ethò꞉ne wahohró꞉ri ne rokhá꞉res ieháhaf Nateriwaʼseronhniá꞉tshera Oneró꞉kwa tánon rahotihén꞉ton nonhkweshón꞉as niére. Tó꞉ki nahá꞉iere tsi nahénron.
7Ne Roiá꞉ner wahawénhase ne Joshua, “Tsi nenhtiére nón꞉wa wenhniserá꞉te ratikwé꞉kon nonhkweshón꞉as ne Israerʼró꞉nonhke enieshakwénienste tsi nitisaʼtshénhnathe, tánon enhonktó꞉ke tsi tenikwé꞉kon kwáh ki tsi nihiotónhne ne Mahís. 8Sró꞉ri ne rokhá꞉res ne Ranorokwenhá꞉wi Nateriwaʼseronhniá꞉tshera nó꞉nen ienhón꞉newe ne kaniataráktha, ó꞉nenk tsi awénhke nienhónhne tánon atsatáktha tehatítann.”
9Ethò꞉ne ne Joshua washakohró꞉ri nonhkweshón꞉a, “Kén꞉en nonhtásehwe tánon sewatahónsatat tsi nahó꞉ten ne Roiá꞉ner Onhkwaní꞉io ró꞉ien nahèn꞉ron. 10Tsi iensewahténhti, kwáh oriwihiohón꞉we tsi enshakotekwáhthe ne Canaanites, ne Hitró꞉nons, ne Hivró꞉nons, ne Perizró꞉nons, ne Girgashró꞉nons, ne Amorʼró꞉nons, ó꞉ni ne Jebusites. Kwáh ki ensewaterienʼtará꞉ne ne ronhnhehón꞉we Ní꞉io tsi kén꞉en í꞉res tewahiataʼtónhtie 11nó꞉nen ne Roiá꞉ner Rahoneró꞉kwa ne Aterihwaʼseronhniá꞉tshera ne nonhontsakwé꞉kon aoriwà꞉ke iatenhkaiá꞉iake ohénton tsi ní꞉se ní꞉ioht. 12Ó꞉nen ki tékeni iawénhre niháti ietsihiatará꞉ko, shatihiataʼtsions ne tékeni iawénhre nihothiʼthárakes ne Israerʼró꞉nonke. 13Nó꞉nen ne rokhá꞉res ne ranorokwenhá꞉wi nateriwaʼseronhniá꞉tshera né Roiá꞉ner rahoneró꞉kwa né꞉ne ohontsakwé꞉kon akoriʼwá꞉ke iatenhonrashì꞉towe nawénhke, ne Jordan enwátkaʼwe tsi watnekí꞉ne, tánon noné꞉kanos ne tsi nonthahiotnekinónhatie kwáh enskakʼkok tsi nón꞉we nakaniátoʼne.”
14-15Tánon ó꞉nen tsi nihieientwákwas, tánon ne kaniataratátie iawenhó꞉ton.
Nonhkweshón꞉as wahontén꞉ti tsi nón꞉we nihonahtenataiéntakwe né꞉ne iatahatiniatarihiáke ne Jordan, tánon ne rokhá꞉res rahotihén꞉ton niahá꞉re ranerokwenhá꞉wi naterihwaʼseronhniá꞉tshera í꞉wah. Né꞉ne kokwitè꞉ne shikahá꞉wi, eʼnikahá꞉wi ne Jordan kaniataratátie kawenhó꞉tons natsaktóntie. Kwáh tsi niiostó꞉re ne rokhá꞉res iatharashitó꞉we nawénhke, 16nonékanos ontkà꞉we tsi watnekí꞉ne tánon waʼkaweʼnhó꞉ton, kwáh tsi nió꞉re ne Á꞉tonion꞉ke, né꞉ne kanatowanèn꞉ke ákta ne Zarethan. Ne tsi niehiotnekí꞉non ne Dead Sea kwáh nénhne hiotnekénston, tánon nonhkweshón꞉a ónhton watahathihiáiake ákta ne Jericho. 17Tsi nikarì꞉wes nonhkweshón꞉as thakéson rónhne tehothihiaiakonhátie iahontsiaʼténhen, ne rokhá꞉res ne rahá꞉wi ne Roiá꞉ner Rahoneró꞉kwa Naterihwaʼseronhniá꞉tshera tho í꞉wah iahontsiát꞉ten tsi nón꞉we niráthe né꞉ne shatekaniatharíhen ne Jordan kwáh tsi nió꞉re ratikwé꞉kon wathatihiá꞉iake.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.