Joshua 20
20
Ne Tsi Kanatowá꞉nens Nón꞉we Nihionthasehthákwa
1Ethò꞉ne ne Roiá꞉ner wahoró꞉ri ne Joshua 2nashakawénhase nonhkweshón꞉as ne Israerʼró꞉nonhke nón꞉we, “Sewathaterákwas ne kanatowá꞉nens nahisewathasehthákwake né꞉tho ne í꞉i Mahís tsi nikwahró꞉ri. 3Tó꞉ka ónhka tsi nítson iáh tahisewaʼnikonhrón꞉ni ónhkak aieʼtsinonhwarià꞉kon, enwá꞉ton ne nón꞉we niahísewe tánon natsisewaniá꞉kenhse tsi niká꞉ien ne rateshenhnanón꞉waks nahonsahakáriaʼke. 4Enwá꞉ton ne eʼniastátke ki tsitkanatowá꞉nens, toniaháse ne tsi teiehiatorethákwa né꞉ne tsi iehionthawehiaʼthákwa ne kanatowanénhke, tánon sehnikonhraientháthen ne rotikstenhokón꞉as tsi nahá꞉wenhne. Ethò꞉ne ki eniesarí꞉hon niasatháwehiaʼte ne tsi kanatowanénhke tánon enhiesanákthon tsi nón꞉we nashiʼterónhthake, ne káti nahónton ne nón꞉we nasathatì꞉teron. 5Tó꞉ka tsi niká꞉ien ne ratesenhnanónhwaks nahonsahakáriaʼke tánon thóh nón꞉we nienhiásehre, nonhkweshón꞉as ne tsi kanatowanénhke iáh tehiówenk niaieshatiaʼkwaríhsi ne rahonhà꞉ke. Ó꞉nenk tsi entiesá꞉ne tiorì꞉wa tsi iáh teshaʼnikonhrón꞉ni tsi wasehnonhwarià꞉kon tánon iáh kanakwahtsherá꞉kon tsi thóh teiawénhen. 6Ó꞉nenk tsi thóh ensiterónhthake ne tsi kanatowanénhke tsi nió꞉re ne onhkwè꞉ne nón꞉we teniesahiató꞉rethe tánon tsík enrénheie ne rónhkwe né꞉ne Ratsihenstowá꞉nen í꞉ken ne nenhkahá꞉wike. Ethò꞉ne kik enwá꞉ton nahonshasaténhti ne tsi tisanatowá꞉nenhke niahonshá꞉se, né꞉ne tsi nón꞉we teshatékwen.”
7Káti nonhkweshón꞉as ne Israerʼró꞉nonhke iá꞉iak nikaná꞉thakes wahonthaterákwahse, áhsen nikaná꞉thake né꞉ne tsi iaʼtewatsénhtos nòkwah ne Jordan Kaniataratátie né꞉ne Kedesh né꞉ne Galilee nón꞉we, ne tsi ionhniarónhnions kanakerahseraké꞉rons né꞉ne Naphtali; Shechem, ne tsi iononhtharónhnions ne kanakerahseraké꞉rons né꞉ne Ephraim; tánon ne Hebron, né꞉ne tsi ionhniarónhnions kanakerahseraké꞉rons ne Judah. 8Tánon áhsen nikaná꞉thakes né꞉ne tsitkarahkwí꞉nekens nòkwah ne Jordan Kaniataratátie, né꞉ne Bezer né꞉ne tsi kanakerahserá꞉ien ne Reuben; Ramoth né꞉ne Gilead nón꞉we, né꞉ne tsi kanakerahserá꞉ien ne Gad nón꞉we, tánon ne Golan né꞉ne Bashan nón꞉we, né꞉ne tsi kanakerahserá꞉ien ne Manasseh. 9Ne kí꞉ken ne kanatowá꞉nens ne hiotekwasenhthákwa í꞉ken ne karakwáhton nonhkweʼthakwé꞉kon akorihwà꞉ke ne Israerʼró꞉nonhke tánon nónhka ne tihiakahontsáte ne skátke ratinákere. Ónhka ne iáh tehiakoʼnikonhrón꞉ni tsi tsakoterihwathewá꞉ton enwá꞉ton ne nón꞉we iahiontekwáhhsen né꞉ne tó꞉sa ashakohiaʼtatshén꞉ri ne ratesenhnanónhwaks nahonsahakháriaʼke; iáh thahónton nahionthatenonhwarià꞉kon tsik onhkwè꞉thake niá꞉reʼkwe enhontó꞉hetste tsi thahionthatiaʼtó꞉rethe.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.