Joshua 13
13
Ne Roiá꞉ner Wahoró꞉ri Ne Joshua Niaháhawe Tsi Ní꞉kon Shé꞉kon Hiothaténron Nohóntsa Tánon Teshakohiaʼkónhas Tsi Naʼtehóntere Ne Raotitióhkwas Nisraerʼró꞉nonke.
1Ne Joshua ó꞉nen kwáh thóh tsi nithó꞉hion. Ne Roiá꞉ner wahawénhase, “Ó꞉nen saksténha, ók shé꞉kon wé꞉so ionhontsá꞉ien ne iakáhake: 2kanakerahserakwé꞉kon ne Philistia ó꞉ni ne Geshur, 3ó꞉ni tsi tkanakerahserá꞉ien ne Avvim nenhtiè꞉ne nokwá꞉ti. (Ne iohontsá꞉ien tsi nitiawé꞉non ne kahionhatátie Shihor, ne tsit karistatátie ne Egypt, kwáh tsi nió꞉re nothorè꞉ke nokwá꞉ti tkaristatátie ne Ekron, akénhake né꞉ne Canaanite; ne ronhtinontí꞉ios Philistines ratinákereʼkwe ne Gaza, Ashdod, Ashkelon, Gath, ó꞉ni ne Ekron.) 4Tánon shé꞉kon akwé꞉kon ne Canaanites rahotinakeráhseras, ó꞉ni ne Mearah (né꞉ne rahononhóntsa ne Sidonró꞉nons), tsi nió꞉re ne Aphek, né꞉ne tsi tonateristatátie ne Amorʼró꞉nons; 5ne rahononhontsà꞉ke ne Gebalró꞉nons; ohontsakwé꞉kon ne Lebanon né꞉ne tsitkarahkwí꞉nekens nokwá꞉ti, tánon ne Baalgad nitiawé꞉non, né꞉ne entiè꞉ne nokwá꞉ti ne tsi Ionónhte ne Hermon, tsi nió꞉re ne Hamath Iehiotohétston. 6Thóh í꞉kare kí꞉ken ne rahononhontsà꞉kes ne Sidonró꞉nons, thóh nonh nihatinákere ne tsi ionhniarónhnions kanakerahseraké꞉rons tsi naʼtetiátere ne Lebanon Ionhnontharónhnions tánon ne Misrephoth Maim. Kwáh ratikwé꞉kon kí꞉ken onhkweshón꞉ʼas enkhehiaʼtínekenhwe tsi nienhónhne Nisraerʼró꞉nons. Kwáh ó꞉nenk tsi thenshenahrí꞉ten nonhontsaʼshón꞉as Nisraerʼró꞉nons, kwáh ki tsi nikonhró꞉ri tsi náshiere. 7Ó꞉nen káti, theshinárit kí꞉ken ohóntsas tsi naʼtehóntere nó꞉ia tióhton nihotitióhkwakes tánon ne shatekanenhrí꞉hen ne Manasseh, ne ronónha ahontié꞉nawatste tsi ahonawenhkón꞉weke.”
Tsi Naʼtekenhnaríhthon Ne Tsi Kanakerahserá꞉ien Ne Tsitʼkarahkwí꞉nekens Nokwá꞉ti Ne Jordan
8Ne rahotitióhkwas ne Reuben ó꞉ni ne gad ó꞉ni nó꞉ia tióhton nihotitióhkwakes ne Manasseh ó꞉nen nénhne rotiienàhon nonhóntsas né꞉tho Mahís teshakó꞉wi, né꞉ne Roiá꞉ner raonhátsera, theshakó꞉wi; né꞉ne tsitʼkarahkwí꞉nekens nokwá꞉ti ne Jordan Kaniataratátie. 9Ne rahotinakeráhsera ióhio ne Aroer (né꞉ne tsi iehiotʼthe ne Arnon Ahonráhkwakon) tánon kwáh asénhnon nón꞉we nikaná꞉taien ne kanatowá꞉nen ne thóh ahonráhkwakon tánon thóh í꞉wa akwé꞉kon ne iotonhontsakwaríhshions ne tsi nitiawé꞉non ne Medeba nón꞉we tsi nió꞉re ne Dibon. 10Thóh nió꞉re nieiawè꞉non ne tsitkaristatátie ne Ammon tánon thóh í꞉wa akwé꞉kon ne tsi kanatowá꞉nens né꞉ne Amorʼró꞉nons ronhwanonhtí꞉iokwe Sihon thoniarotháronhne, né꞉ne Heshbon nón꞉we nihakó꞉rahkwe. 11Thóh í꞉wa ne Gilead, ne tsi kanakerahserá꞉iens ne Geshur tánon ne Maacah, akwé꞉kon ne tsi ionónhthe ne Hermon, tánon atenathakwé꞉kon ne Bashan kwáh tsi nió꞉re ne Salecah. 12Thóh í꞉kare ne rahonhnonhtihiótsera ne Og, né꞉ne iatesaonhà꞉a ne Rephaim, né꞉ne raónha thoniarotháronhne ne Ashtaroth ó꞉ni ne Edrei. Mahís kí꞉ken shakosénhnion ki onhkweshón꞉a tánon sakohiaʼtinekén꞉en. 13Ók ki, Nisraerʼró꞉nons iáh teshakotihiaʼtinekén꞉en nonhkweshón꞉as ne Geshur nón꞉we ó꞉ni ne Maacah; shé꞉kon nón꞉wa Israerró꞉nonhke ratinákere.
14Ne Mahís iáh othé꞉nen tesakahontsá꞉wi ne Levi. Tsi ki nihoró꞉ri ne Roiá꞉ner ne Mahís, ne enhatiié꞉na tsi enhontié꞉nawatste nahonawenhkhón꞉weke ne ronhwateskontá꞉ni ne ietsienharáhkwake ne Roiá꞉ner Raní꞉io ne Israerake.
Ne Kanakeráhsera Ne Thonwaná꞉wi Ne Reuben
15Ne Mahís ostónha shakahontsá꞉wi ne kahwá꞉tsires ne rahotitióhkwas ne Reuben nahonawenhkhón꞉weke. 16Ne rahotinakeráhsera iéhio ne Aroer (né꞉ne tsi ieiotʼthe ne Arnon ahonráhkwakon) tánon ne kwáh asénhnon nón꞉we nikaná꞉taien né꞉tho ahonráhkwakon ó꞉ni thóh í꞉kare akwé꞉kon ne ionhthonhontsakwahríhshion aktónhties ne Medeba. 17Iekakwékthon ne Heshbon tánon akwé꞉kon ne kanatowá꞉nens ne tsi nonhwésons ne iontonhontsakwahríhshions: né꞉ne Dibon, Bamoth, Baal, Beth Baalmeon, 18Jahaz, Kedemoth, Mephaath, 19Kiriathaim, Sibmah, Zereth Shahar ne ionhniáhere nahonráhkwakon nón꞉we, 20Bethpeor, ne tsi iononhthakárenhre ne tsi Ionónhthe ne Pisgah, ó꞉ni ne Beth Jeshimoth. 21Iekakwékthons akwé꞉kon ne kanatowá꞉nens ne tsi iothonhontsakwahríhshions tánon rahonnonhtiiotserakwé꞉kon ne Amorʼró꞉nons ronhwanonhtí꞉io Sihon, né꞉ne raónha rakó꞉raʼkwe ne Heshbon nón꞉we. Mahís ne rosénhnion, ó꞉ni ne ratikóras ne Midian: Evi, Rekem, Zur, Hur, ó꞉ni ne Reba. Ratikwé꞉kon ronatkorástonhne nonhóntsas né꞉ne ronhnontí꞉io Sihon rahoriwà꞉ke. 22Tsi niká꞉iens nonhkweshón꞉ʼas ne Israerʼró꞉nonhke washakotinonhwariaʼkón꞉nion né꞉ne shakokhiathonserátkenhse Balaam ne roiénha ne Beor. 23Ne Jordan né꞉ne tsi iaʼtewatsénhtos nokwahtí꞉son ronateristatátie ne rahotitióhkwas ne Reuben. Ne kí꞉ken ne kanatowá꞉nens ó꞉ni ne kanathakérons thonwanawí꞉hons ne rahothiwá꞉tsires ne rahotitióhkwas ne Reuben ne nahonawenhkón꞉weke.
Ne Kanakeráhseras Thonwaná꞉wi Ne Gad
24Ne Mahís teshakó꞉wi nónhne ostónha nohóntsa ne rahotiwá꞉tsires ne rahotitióhkwas ne Gad nahonawenhkón꞉weke. 25Ne rahothinakeráhseras eʼhí꞉kare ne Jazer ó꞉ni akwé꞉kon ne kanatowá꞉nens ne Gilead, satehiohontsí꞉ien ne Ammon tsi nió꞉re ne Aroer, né꞉ne tsitʼkarahkwí꞉nekens nokwá꞉ti ne Rabbah; 26ne rahononhóntsa et tsioténhtion ne Heshbon né꞉ne Ramath Mizpeh nietiawé꞉non tánon ne Betonim, tsi naʼtetiawé꞉non ne Mahanaim tsi nió꞉re ne tkaristatátie ne Lodebar. 27Nahonráhkwakon ne Jordan nón꞉we thóh í꞉kare ne Beth Haram, Bethnimrah, Sukkoth, ó꞉ni ne Zaphon, ne iothaténrons ne rahononhtiiótsera ne ronhnonhtí꞉io Sihon né꞉ne Heshbon nón꞉we. Né꞉ne tsi ronateristatátie ne tsi iaʼtewatsénhtos nokwá꞉ti thóh kaniataratátie ne Jordan tsi nió꞉re ne othorè꞉ke ne tkaniátaro ne Galilee. 28Ne kí꞉ken ne kanatowá꞉nen ó꞉ni ne kanataiéntons thonwanawíhon ne rahothiwá꞉tsires ne rahotitióhkwas ne Gad ne nahonawenhkón꞉weke.
Ne Kanakeráhseras Thonwanawí꞉hons Ne Tsitʼkarahkwí꞉nekens Nokwá꞉ti Ne Manasseh
29Ne Mahís ostónhas teshakowí꞉hon nohóntsas ne rahotiwá꞉tsires ne shatehothitiohkwí꞉ien ne Manasseh nahonawenhkón꞉weke. 30Ne rahotinakeráhseras iéhio ne Mahanaim tánon thóh í꞉kare akwé꞉kon ne Bashan—kanakerahserakwé꞉kon ne Og, né꞉ne ronhnonhtí꞉io ne Bashan, tánon ó꞉ni akwé꞉kon ne iá꞉iak-niwáhsen nikaná꞉takes ne Jair né꞉ne Bashan nón꞉we. 31Thóh í꞉kare nasénhnon ne Gilead, ó꞉ni ne Ashtaroth ó꞉ni ne Edrei, né꞉ne kanathakweʼní꞉io ne kanatowá꞉nens ne Og kanakerahserá꞉kons ne Bashan nón꞉we. Akwé꞉kon kí꞉ken ne thonwanawí꞉hons ne asénhnon rahotiwá꞉tsires tsi nithonatwatsirí꞉non ne Machir ne roiénha ne Manasseh.
32Thóh ki ní꞉ioht ne Mahís tsi tehonaríhtons nonhóntsas ne tsitʼkarahkwí꞉nekens nokwá꞉ti ne Jericho ó꞉ni ne Jordan nó꞉nen thóh shénreskwe ne iothonhontsakwaríhsons nón꞉we ne Moab. 33Ók ki ne Mahís iáh thahóthen teshakahontsá꞉wi ne rahotitióhkwas ne Levi. Washakohró꞉ri ne rahonawenhkón꞉we í꞉ken tsi ne enhatiiéna tsi nithonwá꞉wis ne Roiá꞉ner Sakoní꞉io ne Israerʼró꞉nonhke.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.