Isaiah 59
59
Né Iáh Tetkarihwaʼiéri Tánon Né Kawisenhehiónsera Tsi Enkareʼwátonke
1Satʼkátho, né Roiá꞉ner ratsaná꞉ke iáh shó꞉tsi kentehiónhsa nahiaʼkonónsthate,
khés ne rahontàke ne tahahontakwéʼkonhke ne iáh nahothónhteʼke.
2Ók khé꞉kenk, né꞉ne sarihwanerahák꞉tsheras kahió꞉tats
tsi naʼtetiátere ní꞉se tánon ne Saní꞉io,
tánon ne sarihwaneraháktshera né rokonshaséhtha tsi nó꞉kwah ní꞉se
né ká꞉ti né tó꞉sa ahonsahiatʼthónteke.
3Asèken né satshanáke kwáh tesanekwenhshó꞉hare,
tánon teshasʼnonshátions né꞉ne sarihwaneraháktshera iorihónhni;
né tiá꞉kes iotatíhon nonówenhs,
né senhnasáke tehiotiénhon ne karihwahetʼkénhsera.
4Iáh ónhka kaianerenhseráke tseiéntha niaʼtahiorihó꞉taʼke,
iáh ónhka kaianerenhseráke tienénhtha nahontakarihwaiérihke;
né ratiʼniahésen ne iáh othènon tahonwatiʼnitséron, ronhnowenhtánions,
né ronatienawáston ne iotakónta tánon né iehontiʼhéntʼthos ne karihwaneraháktshera.
5Né tehatiʼnónhsast nó꞉niaʼre ahonónhsa,
tánon tehatiʼnonwaiéntha ne takwahá꞉son ahoʼáre;
ónhka akénhake né aienón꞉sake kí꞉ken ahotiʼnónsas tsi enhiaʼiéheie,
tánon ne tekanetsʼtoraráh꞉kon onhnón꞉sa thóh thenkawí꞉riake ne kaniaʼráksen.
6Né raonáʼhares iáh thaʼhonton né꞉ne ahontakwenónhniaʼte;
iáh thahatiʼkwéni né꞉ne ahonteróroksʼte tsi nahó꞉ten enhonnónhni.
Né raotiʼiothénsera né꞉ne karihwaneraháktshera í꞉ken,
tánon ne kahiothénhsera né꞉ne kaiatatón꞉tshera í꞉ken ne ratiʼtsaná꞉kes.
7Né ronhshiʼtákes thóh nienkatá꞉ke tsi nó꞉kwah ne wahhét꞉ken í꞉ken,
tánon teoʼtisteríhens nahonwahnéh꞉kwahte ne iáh othènon tehoníkon;
né raonanontonhnióntsheras né꞉ne wanontonhniontsheráksens í꞉ken,
né nahatiʼrihwéntʼtho tánon atkaronhniátshera í꞉ken ne tsi ronahatátie ne iohahowánens.
8Tsi nihiohahó꞉ten ne skénnon iáh othènon tehatiʼientéri,
tánon iáh tekáien ne kaiáneren ne tsi ronahatátie.
Né raonahahashónhas tsi ronathaʼhónhni tehiotʼthahatʼtaníhon;
iáh ónhka né nón꞉we nenhionténhti theʼieientéri ne skénnon.
9Né ká꞉ti aoríhwa ne karihwenhthá꞉tshera ahí꞉non nió꞉re í꞉tewes nontionhá꞉ke,
tánon ne karihwaʼkwahrishióntshera iáh tehionkwahiaʼtórens;
né ionkwahrá꞉re ne teioswát꞉the, tánon sewatʼkátho! thóh káien ne tetsiókaʼras;
tánon né tahioswátheʼke, ók thóh nón꞉we nítewe nasá꞉takon.
10Tiosehrón꞉kwas né tsi wasonthaʼtátie kwáh né꞉ne teieronwékon,
tiosehrón꞉kwas kwáh tsi ní꞉ioht ne iáh thatehatiʼkáras;
tionkwasí꞉tsiaks nó꞉nen éntie nónh níkare kwáh né꞉ne asonhthénhne akénhake,
tsi nón꞉we nihónhnes né ronathonhnatakaríh꞉te tsi sí꞉ken ní꞉ioht nahionkwenhéion.
11Tewaʼkwé꞉kon ionkwahtonrá꞉ien tsi ni꞉ioht nokwá꞉ri;
kwáh né꞉ne oríh꞉te iontionsèhna tsi nihionkwahnikonráksens.
Né tewaráre ne tkarihwaiéri, ók iáh kí kanèka tekáien;
né kaienawaséhtshera, ók kwáh ahí꞉nonh nió꞉re í꞉tewes nontionhá꞉ke.
12Asèken nonkwaterihwatewaʼtónhtshera ne sahénton tsi niʼiaweʼtowáhne,
ó꞉ni nonkwahrihwaʼneraháktsheras né karihwanírats ionkwatʼkónte nontionhá꞉ke.
Nonwaterihwaʼtewatón꞉tshera kwáh í꞉ken tsi iakwahkwékon,
tánon iakwahriwaʼhientéri nonkwarihwaʼneraháktsheras:
13tsehionkwahtaʼtewenhniʼiostonháties, tánon tsi tewatonhníha ne Roiá꞉ner,
tánon hionkwatsʼwaténion ne tó꞉sa atsitewá꞉sehre nónhkwah Ní꞉io,
né ionkwahthaʼrákwen ne karonhiakénhsera tánon nahiaʼkinenraká꞉ri,
né iatiónnhets nonówens owenhnaʼókons tánon tsi nihionkwahthaʼrákwen tsi nitewé꞉tha nonkweʼriá꞉ne.
14Né kaiáneren onàken skahawíton,
tánon né karihwakwahrishióntshera ahí꞉non nió꞉re ít꞉kaʼte;
asèken norihwí꞉io íken thóh tsioshiʼtsiásks tsi iontkenhnisahá꞉tha nón꞉kwe,
tánon né tkarihwaiéri iáh takakwéni niahontáweiaʼte.
15Noriwí꞉io í꞉ken né tioteríhokʼte,
tánon ónka akénhake tahonsahiontkaraténi tsi nó꞉kwah ne karihwahetkénsera wahonthaʼtenenhskwenháton.
Né Roiá꞉ner wahatʼkátho, tánon iáh tehawerientiʼióhon
né tsi iáh tekáien ne tkarihwaiéri í꞉ken.
16Wahatʼkátho tsi kwáh iáh ónhka,
tánon wahorihwaneráko tsi kwáh iáh ónka teiakotsiaʼtóronh;
sók kí rahónha raonénhtsa khók tsi wahatesénhnieʼte,
tánon né꞉ne iaʼtehahiáti khók raoʼrihwakwahrihshióntshera wahotiénawasʼte.
17Né wahatserón꞉niaʼte ne karihwaʼkwahrihshióntshera kwáh tsi ní꞉ioht ne iontetskweʼnorókʼtha,
tánon né nanónwaroʼre ne kaiatakenáhtshera wahanonwaróroʼke;
né wahatiátawí꞉te ne karewatátshera aotsherónh꞉niaʼt,
tánon watatatwahʼwénheke thóh kanakwahtsherákon tsi waʼthatewehiáren.
18Né entsoianénhaʼwe tsi nihotiʼiothenseró꞉tens, ne ká꞉ti nahonsahaká꞉riaʼke;
tsi sakonákwaʼse ne ronhwásons, iensheʼsakotiatónhti ne ronwáswenhs;
tsi nó꞉kwah ne kawenó꞉tons ionhontsaʼkérons kwáh kí ensheʼsakokáriakʼse tsi iensakotsatón꞉ti.
19Káti tsi nihiá꞉kon né tsi iatewatshéntos nókwahti iakoʼtohetstákwen tsi enhieʼkweniénstake ne raosénhna ne Roiá꞉ner,
tánon tsi nihiá꞉kon ne tsitʼkarakwínekens iakoʼtohetstákwen né nenhʼné꞉e enhiekweniénstake ne raoʼiatanerakwáhtshera;
asèken thóh ní꞉ioht tsi éntre tsi ní꞉ioht ne iawenhó꞉tonhtse
né꞉ne raonhniséhra ne Roiá꞉ner iorehátie.
20Tánon kwáh iénhraʼwe ne Zion nón꞉we né꞉ne sakoʼiatákwas í꞉ken,
né tsi nihiá꞉kon né Jacob rawatsiraʼtátie tsi nihá꞉ti ne teshonatkaraténion tsi nó꞉kwah ne raoʼtirihwaneraháktshera, rá꞉ton ne Roiá꞉ner.
21Tánon ní꞉i, né kí꞉ken naʼkaterihwasheʼronhniátshera tsi naʼteiakwáhtere, rá꞉ton ne Roiá꞉ner: nakenikónhra né tionháke káien, tánon nakewenhnaʼshónhas né thóh wakéthen tsi sewasaká꞉ronhtes, kwáh iáh thaʼtahontakaiákenhne né tsi sewahsaká꞉ronhte, iáh ó꞉ni ne tsi ratiʼsakarónhtons ne ietsiʼiohokónhas, iáh ó꞉ni né tsi ratisakaróntons né ietsiʼiatereʼokónhas, rá꞉ton ne Roiá꞉ner, kén ienwatásawen tánon né꞉ne tsi nénhwe enkénhake.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.