Isaiah 57
57
Né Israerʼró꞉nons Ne Iáh Othènon Tekontiriwásthas Raotiʼiatonnisónhas
1Né tionkweʼtaiéris ronhnihé꞉ions,
tánon iáh ónka othé꞉non tehionsterístha;
né rotirihwiʼióstons iehonwatiʼhiathénha,
tsi ná꞉he iáh ónhka teiakonikonraiéntas.
Asèken ne tionkwetaiéris tsi tiontatsatón꞉ne tsi nó꞉kwah nateraswakʼsénhtshera,
2tánon ienhontáweiaʼte tsi nón꞉we ne skénnonk thí꞉ken;
né꞉ne tsi nihá꞉ti ne tkaʼrihwaiéri nón꞉we nihonakʼthahítake
kwáh entonterakáren ne raoʼnanitskwáhraʼne.
3Ók kí ní꞉se, kén꞉en nontá꞉se,
í꞉se ietsiʼienʼokónhas ne konthenhénhnaras,
í꞉se né ietsiʼienʼokónhas ne rontenakwahiesáthas tánon ne konthohkóktha
4Ónhka ní꞉se thiʼietʼtsiiéron?
Ónhka né kén akorihwá꞉ke tsi tesewatʼtsiakarónhston
tánon tesewaniʼnekarahwánions?
Iáh kén í꞉se teʼietsiʼienokónhas ne rotiʼriwanerahákskons,
né sakotiʼiookónhas ne ratiʼnikonrá꞉tha—
5í꞉se né kwáh tisewahiaʼtátets naskanéktsheras ne tsi iorontótons ne karítons,
kwáh tsi niaʼtekarónhtakes noronhtáse;
í꞉se ne sheʼiawéntʼton ne seiohʼokónhas nahonʼrakwahkónsons,
nàkons ne tsi ionitsthenhriá꞉kons?
6Tsi nón꞉we ne tsi tioʼnitstenrakwahríshion nahonrákwahkon thóh nón꞉we nisathaterakwénhni;
né꞉né sakwenhkʼónwe í꞉ken;
thóh tasnekawéron tsi né washétatʼtse tsi washeʼnekánonte,
thisá꞉ha nonátsia né tásheste.
Kwáh ká꞉ti kén né skénnon ahonkón꞉ni kí naorihoténhsons?
7Thóh né éhʼneken tánon ne tioʼtenón꞉tates
thóh washaʼtenákʼtaien,
tánon niahá꞉se nasatienkwarón꞉hiate.
8Isheʼnakanoháti tánon ne tsiʼtewathiʼtserónhni tsi kanonkáronʼte
né shonniáton nahonshaʼseiarasthákwahʼke;
asèken, né tsi takatewenhtéton, washaʼthatenatʼthorókshiaʼse,
eʼthonieshénon,
tesathaʼkarónston;
tánon í꞉se wesewaterihwasehrónhni ne iaʼteshiá꞉ti skát꞉ne ne ronónha,
sanonwéhon ne raotiʼnákʼte,
wasekenhénhion tsi raotineʼóhskonk thí꞉ken.
9Wateshatháʼhakwe Molech niaʼháse sehienenhá꞉wi,
tánon íʼshikʼnónwe tsi níkon ne satsiaʼtakonhonsthsakwah;
iasheʼiaténiete ne ieʼsarihwakareʼniénhnis ahiʼnónhson nió꞉re,
tánon iasheʼiaténiete iekaníhaʼre ne oné꞉shon (Sheol)
10Waʼteswisénheie tsi nió꞉re tsi tesatawerienháties,
ók iáh kí tésenh, “Iáh othènon tekarihwástha.”
Shasekʼtsénhri ne saskanék꞉tshera thonʼtahióteke,
tánon ká꞉ti iáh theʼsatesatsʼtenhserokʼtáhon.
11Ónhka wahiaterónhkwe tánon wesaterónhne
né ká꞉ti tsi wasanó꞉wenhte,
tánon iáh teskehiaʼráhon
khés naskanontonniónhon?
Iáh kén sák thiwakatatónhni tánon tewakateronhwékon,
tánon ká꞉ti iáh tesketsaníkon?
12Iáh thaʼtakerihwakènha ne sarihwakwarihshiónhtsheras tánon ne sahioténseras,
ók iáh kí né thènen tahiʼsahiatakènha.
13Nó꞉nen iathenshaséntho, áhnion tsi nihonahtiokowánen ne sahiaʼtonhnisónhas né iesahiaʼtanónstat!
Tsi iowerá꞉re nenhné꞉e ienkáháwe,
énska khók ahonhnísera ieniakoiaténhaʼwe.
Ók ónka nakonhá꞉ke enhiontekwáhsen kwáh kí eniehiéna nonwénhtsa
tánon akówenk enwáton nakenontatokentíʼke.
Né꞉ne Wahrahráts꞉ton Nahiontatiénawaʼse Tánon Ahonsahionthatétienhte
14Kwáh kí enhiaʼiéhron,
“Shewakwahtáko, sewakwahtáko, sewahahaserónhni,
akwé꞉kon éhʼren sewahawithánion tsi nahó꞉ten tehiotárons nakonkwetaʼshón꞉has raonahahá꞉kes.”
15Asèken né aoríhwa rá꞉ton ne éhʼneken tánon né kwáh tótʼte
tsi rahónha thóh nón꞉we nihénteron tsi nón꞉we ne tsi nénhwe í꞉ken, né raosénhna né꞉ne Iotokénti:
Thóh nón꞉we nikíteron ne kwáh éhʼneken ít꞉ken tánon iotenathatokénti,
tánon kí ó꞉ni tsi nihiá꞉kon ne teiakaweriaʼsaríhon tánon tiakonikonrénhen,
né náse ahonsónhton nakonikónhra ne tiaʼkonikonrénhen,
tánon á꞉se ahonsónhton nakawariáʼne ne teiakaweriaʼsaríhon.
16Asèken iáh tsiahontʼkhontákwenhke tsi akherihwarósehke,
khés né tsiókonte ahonkenakwénhenhake;
asèken eʼthó꞉ne kí nonikónra enwatakénheʼie nakʼkénton,
iekaníhare natónnhets ne kwáh Í꞉i wát꞉son.
17Tsioríhwa tsi niwahét꞉ken tsi nihonaskénaʼse wakenakwénhenhne;
Wakhé꞉iente, wakhekónraʼke tánon wakenakwénhenhne;
ók tiókonte thóh niensatí꞉iere tsi nithatiʼweienóthenhne.
18Wakatʼkáton tsi nihatiʼweienó꞉tens, ók kí kwáh ensheʼkhétienʼte;
Kwáh enkhehéntenhse tánon né ensheʼkhekariák꞉ten ne kanikonranirát꞉tshera,
tánon ensheʼkhenikonraní꞉rate ne iakokʼtiónhnion.
19Skénnonk, skénnonk, né nahinónsons nió꞉re ít꞉kens tánon naktatsiesónhas í꞉ken, ratónhnions ne Roiá꞉ner;
tánon kí enshekhétienʼte.
20Ók ne iakorihwanerahákskon kwáh né꞉ne ionontakwahrontónhties ne kaniatarakhekówaʼne
né꞉ne iáh thahónton thaʼtahontó thate;
naoné꞉ka né tiótses nonón꞉wa tánon onawástha.
21Iáh tehotí꞉ien ne skénnon, rá꞉ton nakeʼNí꞉io, ne iakorihwáneren.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.