Isaiah 41
41
Né Rawenni꞉io Orihwí꞉io Washakahónhnien Israerʼró꞉non
1Takwahtahónsatat kwáh sakʼthikénhak, Ó né tsi kawenó꞉tons ionhontsakérons;
Ánion nonkweshónhas áse shonónhni ne raotisatsʼténhsera;
ánion ákta nitón꞉ne, tánon rontáti;
ánion skát꞉ne tsi ákta í꞉tewet ne karihwenhtátshera.
2Ónhka rokétskwen natesenhniénhtshera ne tsitʼkarakwínekens nokwáhti,
iehonónhkon nahoterihwatsterístaʼse?
Sesakoniakéntha niaʼkahontsakeró꞉nons ne rahonhàke,
tánon ne tesakositakenhserákwah ne rontinontiʼióshons;
tsi ní꞉ioht nokénra sakahónhnis né꞉ne raoʼsarekówa ráts꞉tha,
kwáh tsi ní꞉ioht notsináhara ahiaʼkorehátie né꞉ne raoʼiénhkweri thóh nahioierenhátie.
3Sakósehre tánon sakotohetsténhnis kwáh skén꞉nonk thí꞉ken,
kwáh seronhkenéhak tsi tseharátas ne tsi iohatáse.
4Rahónha thóh nihohiothénhon tánon thóh kí kén nioiéren,
iesakonatón꞉nions ne tsi tahatinekwenhsatátie ne kwáh tsi tiotásawe?
Í꞉i, ne Watiá꞉ner tewakatierenhton,
tánon kwáh oná꞉ken enwakónhniaʼte.
5Né tsi kawenó꞉tons ionhontsaʼiéntons ionatkáton tánon kí waotí꞉teronhne,
ne tsi iehiotonhontiotʼtaníhon watsahontsíshionkwe;
ákta wakontkwiʼtánion tánon takónhne.
6Skát꞉tsions tsi watʼkontatiénawaʼse,
tekontatʼrohrhiá꞉nions, “Sewanikonranirónhak!”
7Né rakaratákwas enʼonikonraníraʼte ne rawistanoronhtserónhni,
tánon tsi nikáien ne rakétas iehnekonréksta rátstha enʼonikonranírate tsi nikáien ne raientánions notsikwahkó꞉wa rátsta,
rohrorhiánions ne raristó꞉seras, “Kwáh í꞉ken tsi ioiánere”;
tánon wahatinonwarotónhnion né ká꞉ti ne tó꞉sa ahontorhiáneron.
8Ók ní꞉se, Israel, akenhá꞉tshera,
Jacob, rahónha rihiatará꞉kwen,
Abraham nón꞉we nitotʼwatsirínon, onhtiaʼténhro;
9í꞉se ne ieskonhnón꞉kon tsi iehiotonhóntioʼte,
tánon iewakenáton ne kwáh ahí꞉non í꞉ken ne tsi iaʼtekahiósaiens,
konrorhiánions, “Í꞉se nakenhá꞉tshera í꞉ken,
í꞉i konhiatarákwen tánon iáh teskoniatekwáhton!”;
10tó꞉sa sáteron, asèken í꞉i tenikwé꞉kon,
tó꞉sa sáteron, asèken í꞉i ne Saní꞉io í꞉ken;
Kwáh kí enkonsasténhseron, kwáh kí enkoniénawaʼse,
Kwáh kí enkonhiatenháwa né watesenhniétha ne tsi keweientetákwen.
11Hén, ratikwé꞉kon ne iesanákwahse
kwáh enhontéhen tánon enhonwanatéhaʼte;
tsi niʼiákon nenhieshaʼtsatónhti
thóh nenhotiʼiátawen tsi ní꞉ioht ne iáh othènon thaʼkénhake tánon kwáh enhatiʼiatáton.
12Ní꞉se kwáh enseiatísake tsi nikáien ne tesewarihwawénhron,
ók iáh kí tasehiaʼtatʼtsénhri;
tsi niháti ne ronhteriʼioseranónh꞉we ne shonháke
kwáh thóh nenhotiʼiátawen tsi ní꞉ioht ne iáh othènon thakénhake.
13Asèken í꞉i, Watiá꞉ner sah Ní꞉io í꞉ken,
konnenhtsawá꞉kon ne sehseweientetákwen;
tsi Í꞉i ne konró꞉ris, “Tó꞉sa sáteronh,
Kwáh seh enkonsniénon.”
14Tó꞉sa sáteronh, í꞉se notsinonwanhéta Jacob,
í꞉se nontsinón꞉wa Israel!
Kwáh kí enkonsniénon, rá꞉ton ne Roiá꞉ner;
né shiaʼiatákwen né꞉ne Roiatatokénti khók í꞉ken ne Israerʼronónke.
15Nón꞉wa, kwáh kí enkonhiónhnien ne iewahék꞉tha kásehre,
iohiothí꞉ie, áse í꞉ken, tánon kanotsótons;
ní꞉se kwáh kí enswáheke ne tsi ionhnontarónhnions tánon tesaskwáhseron,
tánon né enshónniaʼte ne tsi ionhniarónhnions tsi ní꞉ioht ne kawá꞉he.
16Ní꞉se kwáh kí ensheiásehwe tánon tsi iowerá꞉re ienhkáhawe,
tánon ne tsi teioweratáse kwáh kí tenhiakoréniaʼte.
Eʼthó꞉ne kí ní꞉se kwáh ensatonhnáren rahonhá꞉ke ne Roiá꞉ner;
rahonhá꞉ke né Roiatatokénti khók í꞉ken NʼIsraerʼronónke ní꞉se kwáh kí ensará꞉sehse.
17Nó꞉nenh ne iakóten tánon ne tehiontkárias enienekí꞉shaʼke,
tánon iáh kanèka tekanekáien,
tánon ne ronhnenhnásake iostáthen tánon rotiniatáʼthens,
í꞉i ne Watiá꞉ner kwáh tenkheriwasehrá꞉kwahse,
í꞉i ne KheʼNí꞉io NʼIsraerʼronónke kwáh kí iáh takhehiatanikónren.
18Kwáh kí enkenontonkwenháton ne tsi kaniataraténions tsi nón꞉we ne iáh othènon tewatonhniá꞉tha ne tsi ionhniaʼrónhnions,
tánon entkanekóten nasénhnon nón꞉we nonhrahkwahkónshons;
Kwáh né enkónhniaʼte nahonwenhtsaʼthénhake nakanekónhnionhne,
tánon ne iahonwenhtsátʼthen enkanawerónhnionhne nonékanos.
19Kwáh thóh nón꞉we ne iahonwenhtsaʼthénhake enkeronhtaiéntʼtho nonenhtakwentétshera,
tánon ne ohiktakó꞉wa, tánon ne kaientanó꞉ron, tánon ne iakeniewátha karónta;
kwáh thóh iahonwenhtsáthénhake entiéntho ne ohnetóia,
otiehwá꞉ta karónhta tánon nonetakówah né enkontikwékonhke,
20né nahónton akwé꞉kon ahiontkátho tánon aiakoteriéntaraʼne,
akwé꞉kon taieiató꞉rete tánon aiakonikonraiéntane,
né꞉ne raohtsá꞉na ne Roiá꞉ner kí꞉ken thóh niʼioié꞉ren,
né꞉ne rahonhatsíwa khók Roiatatokénti ne Israerʼronónke rohsahánion.
Né Roiá꞉ner Waʼsakonenhrót꞉thaʼse Ne Rotinówenhs Niʼiohokónhas
21Ohénton sewáien ne sewarihwashónhas, rá꞉ton ne Roiá꞉ner;
tasewá꞉haf ne sewarihwanirátʼtsheras, rá꞉ton ne Raonontí꞉io Jacob.
22Ietsirí꞉hon nahontahatíhawe, tánon nahionkhiró꞉ri
tsi niʼiawénhsere.
Ionkhiró꞉ri nahoténshons nohénton tkènʼne, tsi nihiotá꞉nionwe,
né ká꞉ti nahónton taiethiʼiatoretáse,
tánon nahónton nahionkwahteriéntaraʼne tsi nienhiáwenhne;
khés nahionkhiró꞉ri tsi nahoténshons tsi nontaiawenonhátie.
23Takwahró꞉ri tsi nahó꞉ten tá꞉we ne kénʼen ienwatá꞉sawen,
né nahón꞉ton ahionkwahteriéntaraʼne tsi í꞉se ne niʼiohokónhas nisewahiaʼtótens;
ioiánere akénhake khés nahonhetʼkéntake,
né nontiérenk ahionkwáhteronhʼne tánon ahionkwahteronʼiénthen.
24Í꞉se, ne kwáh í꞉ken, né iáh othènon satèkena tsi niʼsewaiatótens
tánon né sewahioténseras kwáh iáh othènon tsiaʼteioríhonte;
nón꞉kak ahiontonkwetaráko ní꞉se né꞉ne atatswénhonh í꞉ken.
25Saiá꞉ta wahiʼiatorhiá꞉neron nothorèke nonkáhti, tánon kí wáh꞉rawe,
kwáh tsinentʼkarakwínekenʼne ienhakenáton
Kwáh kí tensakoskwahserón꞉kwahte ne ratikoráshons tsi ní꞉ioht nonawástha,
tsi ní꞉ioht ne ratʼtsetónhni teonawatsʼthawénrie ne ionawastʼthakarí꞉io.
26Ónhka rotʼróri ne kwáh shiʼtsiotásawe, né ká꞉ti nahónton ahionkwahteriéntaraʼne,
tánon né kwáh ohénton tkènʼne, né nahónton ahiʼtewénhron, “Thaʼiérits”?
Thóh nón꞉we kwáh iáh ónhka teotʼró꞉ri, iáh ónhka teohrihotáshion,
iáh ónhka teiakowenhnarón꞉ken ne sawenhnaókons.
27Né tewakatierénhton wakatró꞉ri ahonhàke ne Zion, né nahontiénawaste
tánon tekheiáwi ne Jerusalem ne kariowanáton ne karihwí꞉ios.
28Ók nó꞉nen shiakatkátho né nón꞉we iáh ónhka;
tsi nihá꞉ti né nón꞉we nasakotenikonrawíseke
ónhka, né sakerihwanónhton, ne taharihwaseráko.
29Iáh, kwáh ratikwé꞉kon thiʼhatirihónhni;
ne raotiʼioténseras kwáh iáh othènon tekariwásthas;
ne raotihiaʼtonhnisónhas oweroskonkʼtíken.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.