Isaiah 35
35
Tsi Nionsahónhne Né Zion Ne Shonwatihiatákwen
1Ne iahonwentsaʼthénhke kwáh kí enwatʼtsenhnónhni,
né iahonwentsaʼthénhake kwáh kí enwatonnáren tánon thenkatsitsanékare;
tsi ní꞉ioht ne onekwénhtara nikaʼtsitsóten 2kwáh í꞉ken tsi enkatsitsónten,
tánon né enwatonnáren natʼtsenhnonhniátshera tánon tenhkaríhwaʼkwe.
Né naoiatanerakwáhtshera ne Lebanon kwáh entʼkonhwénhnon,
né nahonatkweʼnienstátshera ne Carmel tánon ne Sharon.
Kwáh né entsiatʼkátho ne raoʼiatanerakwáhtshera ne Roiá꞉ner,
né nah ne rahotʼkwenienstátshera nonkwahʼNí꞉io.
3Sheʼshatsténseron ne ietsanàhkes,
tánon snírat ne iotsiʼióha iekwitsàkes.
4Sheʼiénhas tsi nihá꞉ti ne kwáh ne titkáhere ne raonerhiá꞉ne ne katerón꞉tshera,
“Sheʼshátstek, tó꞉sa saterónhsek!
Kénhen í꞉res ne Saní꞉io.
Entʼtháhawe ne karewatátshera,
né꞉ne teiotenonianíton tsi nenskakarhiákon.
Kwáh éntʼre nahonsahiaiatanóns꞉thaʼte.”
5Eʼthó꞉ne kí ne teieronwékon kwáh thentiontʼkakwahrísi,
tánon ne tehionhontakwékon entsakoktónhtene;
6ehthòne ne ióntsi nokátha iaʼthenhionhnitsiónkwahkwe tsi ní꞉ioht noskenónton,
tánon nawenhnáson né iáh tewatátis tekarihwákwe natʼtsenhnonhniátshera.
Asèken nonékanos kwáh entʼkanekóten ne iahonwenhtsaʼthénhake,
tánon enkahionhatenionhne ne iahonwenhtsathénhake;
7ne ionesharonhkwathé꞉kha né ienwáton ne tsi watnekarákwah,
tánon ne ioniatátʼthens nohóntsa entkanekóthen nonèkanos;
ne tsi rontsientákwahs ne okwáhos kwáh néʼe né ienhwáton kanawàkon,
ne ohontesónhas né꞉ne ienwáton oiónwi tánon ne onó꞉tas.
8Né iahohowánenn thóh nón꞉we nenhioháteke,
tánon né enkonwanatónhkwahke Iohahatokénti;
ne iáh tehiakokʼkwéniens kwáh iáh thóh nón꞉we tahionʼthahíta,
ók né kí ne Rawenni꞉io rahonkwetaʼshónhas khók raotirihwàke;
iáh ónhka ne tehiontstikáfʼfas, iáh shé꞉kon ne tsakotónhnokte, kwáh ahiakohiatátonhte.
9Iáh ne kénreks thóh nón꞉we takontináhkerehke,
iáh ne ionatekwahtétsien kontírios thóh niakónhne;
kwáh iáh thakonwatiʼiatatʼtsénhri né nón꞉we,
ók né꞉ne tiontaneniakénton thóh thenhontekhahákwahke.
10Tánon né꞉ne sesakohiatákwen ne Roiá꞉ner kwáh thentónhne,
tánon enshónnewe ne Zion thenhotiʼrihwakwenhátie;
né꞉ne tsi nénhwe enkénhake natsenhnonniátshera ratinontsíne enwatake;
kwáh ne enhatiʼiéna natonhnárat ó꞉ni natsenhnonhniátshera,
tánon ne kanikonraksénhtshera ó꞉ni ne taieríhwaʼkwe kwáh kenktshiénhwe.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.