Isaiah 28
28
Wahonʼwatiríhwenʼte Ne Ratinikonrá꞉tha Ratikorá꞉shons, Ratiʼtsihénstaʼtsis, ó꞉ni Ne Rotiʼtókenhse
1Áh, ne rotiʼnaiéston ne katsitsaʼrahrá꞉kons tsi kakakwenhtónhni ne ratiʼnekakástha ne Ephraimke,
tánon ne iotashó꞉kwen notsítsa ne nahohiatanerakwáhtshera í꞉ken tsi niʼioràse,
thóh káhere ratiʼnontsínes tsi niháti ne ronatewehrénhko tsi nihónhneks ne iokwaréhsens, né꞉ne tsi niháti teotirenhkénhnies notsí꞉tsa!
2Satkátho, ne Roiá꞉ner rahonkwe:taien saiá꞉ta ónkak ne tehotenonhiaʼníton tánon rashátste;
kwáh né꞉ne teioweratáse tánon iowisónhtion, iakotónhtha kawerowánen,
kwáh tsi ní꞉ioht ne kawerashátsʼte, tsi niwatnekawenhrátʼthons;
ratsanàke énratste kwáh tsi onwenhtsàke enhshakohiatón꞉ti.
3Thenhonwanarasitaʼkenhseraʼkwe kwáh wáhi
ne rotatónhni ne katsiʼtsarahrákon ne kakakwenhtónhni ne ratinekakástha ne Ephraimke.
4Tánon ne iotashó꞉kwen notsítsa Né nahohiatanerakwáhtshera í꞉ken ne ioràse,
ne ne thóh ratinontsíne káhere tsi niháti ne ne rohnahtewehróhkwen ne iokhwaréhsen,
thóh nenhiotónhake tsi ní꞉ioht nenhtewatiérenhte enwahiári ne tsionionwarontonhakówa nohénton akenhnháke ahónton;
nónhka kí꞉iok ahionkʼkhátho, wahonhiáke kí
kwáh tsi niʼiostóre wahatiʼiéna.
5Ne thóh entewenhniseráte ne Sakoiá꞉ner ne ronterí꞉ios ratiʼronhiakeró꞉nons kwáh ne enkénhake ne kahkakwenhtónhni ne ne kaiatanerakwáhtshera,
tánon né꞉ne atenonwaranákta ne ioràse, ne raotirihwàke ne iaʼteonataténron rahonkwetaʼshónha;
6tánon ne akakenʼenniónhon ne kaiá꞉neren tsi nikáien nónhka enhá꞉tsien naharihwenhtàke,
ó꞉ni ahotiʼshatstenhseraʼién꞉take tsi niháti nahonsahónkʼthate nateriʼióshera ne tsi iothenhenrakáronte.
7Né ronón꞉ha ó꞉ni ne rotiréh꞉serons notsítsa
tánon né tehotiʼiatakentón꞉kwah ne ionekaníron;
ne ratitsihénstatsis tánon ne rotiʼtókenhse ne rotiréhserons ne ionekaníron,
né teiakohnithonʼniaténhnis notsítsa,
ne tehiakohiathentón꞉kwas ne ionekaníron;
iah tsateshatiʼkaraién꞉tas,
ne tehothiniotákwas tsi thontkáwas ne karihwenhtátshera.
8Akwékon natekwahrashónhas né ioteróron ne tehió꞉tsion watsʼtíkon;
iáh kanèka naonsaiotʼkweniénstonhke.
9“Ónhka ne kén asakorihónhnien naiakonikonraién꞉tahne,
tánon ónhka ne kén asakonikonhraientáten naterihwanhotátshera?
Né꞉ne tsi nihiákon ne iontatstarontákwen nonónhta,
né꞉ne tsi niʼiákon ne éhʼren ionthatsaʼtenhawíton ne iakónhkwe ienonhtàke?
10Asèken kwáh nek kok ne rokskwentatonwé꞉ton,
asè꞉ken tsi nihatónhnions iáh othénne tekariwástha,
asè꞉ken nek kok tetashasfáfa tsi nihatónhnions.”
11Oriwiʼiohónwe, né꞉ne iakoskwenhtontawéhton
tánon neh ne thiʼwenhnasate
kwáh kí ensakotháraʼse kí꞉ken onkweʼhókons,
12ronnón꞉hake tsi ráʼwen,
“Né kí꞉ken natorishéntshera í꞉ken;
taietsíhion natorishéntshera ne iakonikonkátste;
tánon né kí꞉ken nahtahkarihtétshera í꞉ken”;
nek kík sá꞉ka iáh thaonathón꞉teʼne.
13Eʼtho kíʼnón꞉we ne raowénhna ne Roiá꞉ner ronón꞉hake wakarihwaién꞉taʼne,
“Asè꞉ken kwáh nek kok ne rokskwentatonwéton,
asè꞉ken tsi nihatónhnions iáh othénne tekariwástha,
asè꞉ken nek kok tetashasfáfa tsi nihatónhnions;”
né nahónton niahónhne, tánon onàken ensatisathá꞉ne,
tánon nahotikaréwahte, tánon tahonwananikará꞉ren, tánon iahonwatiʼhiaténhawe.
14Ne káti ahoríhwa sewatahón꞉satat ne raowenhnaʼókon ne Roiá꞉ner, í꞉se ne kaierón꞉sehra í꞉ken
í꞉se ne ietsihenténhse kí꞉ken onkwehókons ne Jerusalemʼke.
15Tsioríwa tsi í꞉sewenh, “Iontsiónhni ne aterihwaseronhniátshera skát꞉ne ne kenhé꞉ion,
tánon ne tsi tsiohontsáien ne kenhéion ionkwaienʼnateriwasehronhniátshera;
nó꞉nenh ne teiotenonhianíton karehwatátshera iatenhiót꞉kaʼwe
kwáh iáh kíʼ tahionkwahiatórenhne;
asèken ionkwanhowènton nonkwané꞉tshera,
tánon thóh onowénhtake nón꞉we iehionkwataskwáhereh”;
16Ne káti wahón꞉ni tsi nihatónhnions ne Roiá꞉ner Ní꞉io,
Satkátho, watsiéntatse tho nón꞉we Zion nahonhnitskwará꞉kwe onénhia,
ne ne watenenhiátʼkenhse,
ne ne kanenhianóron thenwatʼiosaién꞉taʼkwe, ne ne ioníron tsi enwaʼnitskwáhraʼkwe:
“Ne tionkwé꞉ta nón꞉ka nentsiaʼkétakwe kwáh kíʼ iáh thaʼtahiakahonhnaríkʼkhon.”
17Tánon kwáh ne enkónhniaʼte ne kaiáneren asehrí꞉ie enwatstseriʼiétenhte;
tánon ne kariwakwarishióntshera ne ne iesehriʼiententákwah enkénhake;
nenhkawisónhti kwáh ienhiónhewe akwé꞉kon nonhowénhtas ne ne seniahé꞉sen,
tánon nenhwenhnó꞉tons kwáh né enwáhtonʼte ne sahiatanonstát꞉tshera.
18Ne ateriwaseronʼniátshera ne shón꞉ni skát꞉ne ne kenhé꞉ion kwáh kíʼ tentkaríshionke,
tánon tsi nisehwaterihwaʼserónhni skát꞉ne ne tsi tsioʼhontsáien ne kenhé꞉ion tsi kwáh iáh thakàtahke;
nó꞉nenh ne teiotenonhiaʼníton karewathatsherowáhnen iatenhiót꞉kaʼwe
ní꞉se kwáh kíʼ néʼe tensaiatoráhraʼke.
19Kwáh tsi niʼioriwàhke enwatohetsthá꞉nion, kwáh kíʼ iensaiaténhaʼwe;
áseʼken kwáh niaʼteioronkhetseràkes tsi enwatohétstahke,
neh nenhtiékheʼne tánon tsi niwashón꞉tes;
kwáh kíʼ entkakaʼrenrákwahte ne kateronkwáhtshera ne naiakonikonraién꞉taʼne nateriwanhotáhtshera.
20Asèken shó꞉tsi nikanaktèsha ne tionkwé꞉ta thóh ahiontsiaʼtakwaríshion,
tánon ne ionkwátstha shó꞉tsi naʼtewataká꞉ronha ne ne tahiontatʼwahwenhék꞉te.
21Asék ne Roiá꞉ner kwáh thentáhtaʼne tsi ninihoiéren ne tsi ionón꞉te ne Perazim,
ne rahón꞉ha kwáh kíʼ enhotenakwahwenrát꞉tsheke tsi nenhiotónhake nahonrákwahkon ne Gibeon;
neh nahoióten ne raohioténsera—teiotierón꞉nion ne raoʼioténhsera!
Tánon neh naoʼiótenh ne raoioténhsera—ne ne teiakahontsá꞉tes ne raoioténhsera í꞉ken!
22Nón꞉wa nètho ní꞉ioht tó꞉sa sehrihwákwas,
khèhs tsi ihsnéren kwáh sénha enkahnirátonhke;
asèken onkatòntene ne kaianerénhsera ne kahkaronniátshera
thóh niteʼwé꞉tha ne raonhá꞉ke ne Roiá꞉ner SakoNí꞉io ne ronterí꞉ios ratiʼronhiakeró꞉nons thóh nonhontsakwékon í꞉ken.
23Tesatahhontó꞉ten, tánon satón꞉tenn nakewénhna;
sathenhnikonrá꞉ren, tánon satón꞉tenn tsi niwátʼthare.
24Ne tsi niháti ne rathiʼtahrakarátʼthos neh nahatiʼientʼthóhseron iehotiʼkontákwen ontèken tsi ratiʼtarakarátʼthos?
Kwáh kén tseotikontáhkwen ratiʼnetskátha tánon tehonhtonhontsaʼríhtha ne raononhontsàke?
25Ne nó꞉nen ronatakenrasehronʼníshon,
iáh kén thatehonrieʼniátha ne dill kanenh, wahá꞉tiiènt꞉to ne cumin,#28.25 Ne dill ne ne ohón꞉tesonha, herbs. Ne cumin, ne ne iontekhwakonhonsthakwa, for spicing food.
tánon wahatiʼienthóhseron nonátsias tsi kahaténions
tánon teiotikonstón꞉res tsi nón꞉we niʼiotinát꞉te,
tánon teiotikonstón꞉ronhte wahá꞉tiiènt꞉to ne tsi ieiotthetahte?
26Asèken kwáh í꞉ken tsi ronwatiʼrihonhniénhni;
ne ne raotiní꞉io sakorihhonhniénhni.
27Ne dill nenhatiwáheke iáh tewataskwíseres tehónstha,
khéhs ne kásehre aokakwénhtas ahatiʼkaraténiaʼte tsi kakéron ne cumin;
ók ne dill ne ne onekarahéhtsa óienʼte rónstha tsi nihatiʼientánions nahatiʼsahetí꞉nekenʼwe,
tánon ne cumin ne nònhʼneʼe ne wenhnekeraʼhétʼtses rónstha nahatiʼsahetinékenhwe.
28Nonátsia tekanatsiaʼríton ne rontenatahrón꞉niaʼtha,
ók iáh ónka tehathétha ne tsió꞉konte iahokontákwen;
tionkwéta ne rohonwíseres ne iokahkwentónhtons kásehre tsi kanatsiaʼkérons,
ók iáh kíʼ thatehanahʼtsarí꞉tha.
29Néh kí꞉ken thóh nonhné꞉e niʼtewé꞉tha raonhàke ne Sakoiá꞉ner ronterí꞉ios ratiʼronhiakeró꞉nons;
ne raónha kwáh í꞉ken tsi roiatanerákwat tsi ratiénhaiens,
tánon ioianerehkó꞉wa natthokhátshera.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.