Isaiah 26
26
Né Judah Aorénhna Naʼtesenhniéntshera
1Né éhʼtho entewenniseráteʼke kí꞉ken karénhna kwáh thenkarihwá꞉kwenh ne tsi watonhontsáien ne Judah:
Kashátste nonkwahnáta;
rakétskwas natesenhniétshera
tsi ní꞉ioht ne wathenhenró꞉tons tánon ne kanikató꞉tons.
2Sewaʼthenhenraʼnontonkwenhátons,
né káti nahónton ne tionkwetaiéris ne ratíhawe tewetákwen
ahónton iahontáwehiaʼte.
3Tsi nihiákon ne rotiʼnikonrató꞉ken seiatienawast ne skénnon í꞉ken—
né꞉ne skénnon tsioríhwa tsi tsesehtákwen.
4Tatsisewetakwénhak ne Roiá꞉ner né꞉ne tsi nénhwe akénhake,
asèken rahonháke ne Roiá꞉ner Ní꞉io
sáien ne tsi nénhwe ostʼténra í꞉ken.
5Asèken ehʼtàke naʼthetesakohiaténha;
né thóh nón꞉we nihatinákere tsi nón꞉we ne kwáh éhʼneken tiót꞉te í꞉ken;
kwáh kasenhnowáhnen kanatowánenhs rahón꞉ha ehʼtàke sarón꞉ni.
Èhʼtho ehʼtàke sahá꞉ien ohontsá꞉ke,
thonsahakenróiente.
6Thóh ratiratáties,
né꞉ne ionshitàke ne iakóten,
Tsi natehontekhahákwah ne teiontkárhias.
7Tsi nihotihahóten ne tionkwetaiéri iotʼthahakwahríshion í꞉ken;
Ó Saiá꞉neren, í꞉se stakwaríhshions tsi ronaháte ne tionkwetaiéris.
8Ne tsi iohatátie ne sarihwenhtátsheras,
Ó Saiá꞉ner, í꞉se kwahrá꞉re;
ne shasénhna tánon thisatʼtsénhnate
né natónnhets waskáneks.
9Nakatónnhets í꞉se saskánets ne tsi niwasónhtes,
nakenikonrá꞉kon iehiokontákwen saiatísaks.
Asèken nó꞉nenh ne sarihwenhtátshera ohontsàke í꞉wes,
ne ienakeré꞉nion ne tsi ionwenhtsá꞉tes ieweienhtétas ne karihwakwahrihʼshióntsheras.
10Tó꞉ka shí꞉ken kaiataterísera ionthatenatónhni ne ionkwetakétʼkens,
iáh kí tehatiweientétas ne karihwakwahrihshióntsheras;
ne tsi ionwenhtsáien ne tkariwaiéri né kénh enhonteriwaténtsiaʼte ne iáh tetkariwaiéri
tánon iáh tehontkáthos ne raoʼiatanerakwáhtshera ne Roiá꞉ner.
11Ó Saiá꞉ner, ne satsianàke iotharatáhton,
ók iáh kí tehontksatos.
Sheríhon nahontkátho tsi nisateriwaién꞉ni ne shonkwetaʼshónhas, tánon ronhtéhen.
Serí꞉hon nótsire ne iesáskwenhs ne ahonátonhte.
12Ó Saiá꞉ner í꞉se enserihwanírate ne skénnon í꞉ken nonkwahrihwàke,
asèken kwáh í꞉ken, tsi thokʼníkon ionkwáhien, ne tsi niskwahtsheràse.
13Ó Saiá꞉ner onkwahʼNí꞉io,
thiʼhátite ne rotiʼiáners waʼhonkiʼiatkoraserónhnien,
ók ionkwahrihwanirá꞉ton ne sasénhna iatekaiáti khók í꞉ken.
14Ne ronenʼhéion iáh tehonónhnhe;
ne tsi iothasátahreh iáh thatahonthontkétsko—
tsioríhwa tsi sherewáton tánon shehiatónhton,
tánon akwékon sarakéwenh ne nahonwenehiarastáhkwahke.
15Ók sheʼtsiokowanáton ne rononhontsakeró꞉nons, Ó Saiá꞉ner,
shetsiokowanáton ne ronhnonhontsaʼkerónons; wahesahiatanerákwahte;
sakowaná꞉ton akwékon ne tsi karistatátie ne tsi ionwenhtsàte.
16Ó Saiá꞉ner, aterientakariahtserákon tsi wahesahiatíshaʼke,
tahonwéron naʼterenhnaientátshera
nó꞉nenh ne sáwenk karehwatátshera sahotíraʼne.
17Kwáh tsi níoht ne tsiothonhwísen ne iowíraien,
tsi natewatsiathatahséons tánon tehiohenrétha tsi naʼtehiowehestánions
nó꞉nenh ákta í꞉wes niahiohiátiʼwe,
èhtho ó꞉ni ní꞉i nihionkwahiátawenhskwe Í꞉se saríhwah, Ó Saiá꞉ner;
18aionkwahwiraién꞉taʼon, ionkwatʼkarateniáton,
ók nekʼkhók wahakwanákeratsʼte nowé꞉ron.
Iáh thahóthen tatehionkwahténtion nonwenhtsàke,
tánon iáh ónhka teiakawenhnahkeráton nahienákereʼke nonwenhtsàke.
19Ne iesenhé꞉iaseh kwáh kíʼ entionhthonʼnhete, ne raoʼnonheióntas kwáh kíʼ tentewatʼkétsko.
Ó nokenhràke sewaná꞉kere, sewá꞉ie tánon tesewarí꞉wak natsenhnonhniátshera!
Asèken ne sahaweiásera kwáh teiostarát꞉te tsi iohá꞉weien,
tánon ne tsi ionwenhtsá꞉te kwáh entsaʼkahónnhete ne wahónhnise tsi ná꞉he thonenʼhéion.
20Káts, akonkwetaʼshón꞉has, iaʼsewatáwahiat ne sewáhwenk kahnaktaiéntons,
tánon thontasewanhó꞉ton ne tsi sewatenonhkáronʼte ne sewásonhne;
sewatáset niʼkarihwésha
tsi nió꞉re ienwatohetste ne kanakwáhtshera.
21Asèken ne Roiá꞉ner thahiákens tsi nón꞉we thénteron
ne nasakoréwaʼte ne ratinákereh nonhontsàke ne raoʼtirihwaneraháktsheras entkarihónhniaʼte;
nonwenhtsa kwáh enweneste nó꞉nekwenhsa nètho ionekwáhon,
tánon iáh shé꞉kon tahonsahiakoróhroke ne ronhwatíʼrio.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.